ହାଇକୋର୍ଟଙ୍କ ଗୁରୁତ୍ବପୂର୍ଣ୍ଣ ନିର୍ଦ୍ଦେଶ; ମାଟ୍ରିକ୍ ସାର୍ଟିଫିକେଟର ଜନ୍ମ ତାରିଖ ସବୁ କ୍ଷେତ୍ରରେ ଗ୍ରହଣୀୟ
କଟକ,୨୯|୧୧: ମାଟ୍ରିକ୍ କିମ୍ବା ଏଚଏସସି ସାର୍ଟିଫିକେଟରେ ଉଲ୍ଲେଖ କରାଯାଇଥିବା ଜନ୍ମ ତାରିଖକୁ କେବଳ ଜନ୍ମ ତାରିଖ ଭାବେ ଗ୍ରହଣ କରାଯିବ ବୋଲି ହାଇକୋର୍ଟ ରାୟ ଦେଇଛନ୍ତି। ତେବେ ଏ ସମ୍ପର୍କିତ ଏକ ଶୁଣାଣି ଶୁଣାଇବାକୁ ଯାଇ ହାଇକୋର୍ଟ ଏପରି ରାୟ ଦେଇଛନ୍ତି | ଫୁଡ କର୍ପୋରେସନ ଅଫ୍ ଇଣ୍ଡିଆ(ଏଫସିଆଇ)ରେ କାର୍ଯ୍ୟରତ ଜଣେ କର୍ମଚାରୀଙ୍କ ଚାକିରି ସଂପର୍କିତ ରେକର୍ଡରେ ଏଚଏସସି ସାର୍ଟିଫିକେଟରେ ଥିବା ତଥ୍ୟ ଅନୁସାରେ ଜନ୍ମ ତାରିଖ ସଂଶୋଧନ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଦୁଇ ମାସ ଭିତରେ ଏହି ନିର୍ଦ୍ଦେଶ ପାଳନ କରି କର୍ତ୍ତୃପକ୍ଷ ଉପଯୁକ୍ତ ନିର୍ଦ୍ଦେଶନାମା ଜାରି କରିବେ। ଜଷ୍ଟିସ ବିରଜା ପ୍ରସନ୍ନ ଶତପଥୀଙ୍କୁ ନେଇ ଗଠିତ ଏହି ଖଣ୍ଡପୀଠରେ ପ୍ରବୀର କୁମାର ମୁଦୁଲିଙ୍କ ଆବେଦନର ଶୁଣାଣି କରି ହାଇକୋର୍ଟ ଏପରି ନିର୍ଦ୍ଦେଶ ଦେଇଛନ୍ତି |
ମାମଲାର ବିବରଣୀରୁ ପ୍ରକାଶ ଯେ, ୧୯୯୧ ଜାନୁଆରି ୧୭ରେ ଆବେଦନକାରୀ ଡବ୍ଲୁଏମସି ସିଷ୍ଟମ ୱାର୍କର ଭାବେ ଏଫସିଆଇ ଅଧୀନରେ ନିଯୁକ୍ତିରେ ଯୋଗ ଦେଇଥିଲେ | ଚାକିରି ସଂପର୍କିତ ରେକର୍ଡରେ ଆବେଦନକାରୀଙ୍କ ଜନ୍ମ ତାରିଖ ୧୯୬୬ ଅଗଷ୍ଟ ୫ ବୋଲି ଉଲ୍ଲେଖ କରାଯାଇଥିଲା। କିନ୍ତୁ ଆବେଦନକାରୀ ୧୯୯୨ ମସିହାରେ ମାଧ୍ୟମିକ ଶିକ୍ଷା ପରିଷଦର ଏଚଏସସି ପରୀକ୍ଷା ଦେଇ ପାସ୍ କରିଥିଲେ।
ସ୍କୁଲ ରେଜିଷ୍ଟରରେ ଉଲ୍ଲେଖ ଜନ୍ମତାରିଖକୁ ବିଚାରକୁ ନିଆଯାଇ ଆବେଦନକାରୀଙ୍କ ଏଚଏସସି ପାସ୍ ସାର୍ଟିଫିକେଟରେ ଜନ୍ମତାରିଖ ୧୯୭୨, ଏପ୍ରିଲ ୨୭ ବୋଲି ଉଲ୍ଲେଖ କରାଯାଇଥିଲା। ପରବର୍ତ୍ତୀ ତାରିଖରେ ଜନ୍ମ ତାରିଖ ସଂଶୋଧନ ପାଇଁ ଆବେଦନକାରୀ ଏଫସିଆଇ ପରିଚାଳକଙ୍କ ନିକଟରେ ସତ୍ୟପାଠ ଦାଖଲ କରିଥିଲେ।
ତେବେ ଏହି ସଂଶୋଧନ ପାଇଁ ସେ ବାରମ୍ବାର ଦରଖାସ୍ତ କର୍ତ୍ତୃପକ୍ଷଙ୍କ ନିକଟରେ ଦାଖଲ କରିଥିଲେ। ଶେଷରେ ୨୦୨୨ ଡିସେମ୍ବର ୨୬ରେ ଜନ୍ମ ତାରିଖ ସଂଶୋଧନ ପାଇଁ ଆବେଦନକାରୀ ଦାଖଲ କରିଥିବା ଦରଖାସ୍ତକୁ କର୍ତ୍ତୃପକ୍ଷ ଖାରଜ କରିଥିଲେ। ଏହାକୁ ଚାଲେଞ୍ଜ କରି ୨୦୨୩ରେ ଆବେଦନକାରୀ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଆବେଦନକାରୀଙ୍କ ତରଫରୁ ବରିଷ୍ଠ ଆଇନଜୀବୀ ଲକ୍ଷ୍ମୀଧର ପଙ୍ଗାରି ମାମଲା ପରିଚାଳନା କରୁଥିବା ବେଳେ ଆଇନଜୀବୀ ସୋହନ ମିଶ୍ର ସହାୟତା କରୁଥିଲେ।
