ମାଡ଼ିଆସୁଛି ‘ଡିଟଓ୍ୱା’ ; ୬ଟି ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷା: IMDର ରେଡ୍ ଓ୍ୱାର୍ଣ୍ଣିଂ
ନୂଆଦିଲ୍ଲୀ,୨୯|୧୧: ଶ୍ରୀଲଙ୍କାରେ ଭୟଙ୍କର ତାଣ୍ଡବ ରଚିଛି ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ‘ଡିଟଓ୍ୱା’। ଘୁର୍ଣ୍ଣିଝଡ ପ୍ରଭାବରେ ପ୍ରବଳ ବର୍ଷା ସାଙ୍ଗକୁ ଭୀଷଣ ପବନ ମଧ୍ୟ ହୋଇଛି | ଫଳରେ ଭୂସ୍ଖଳନ ଯୋଗୁଁ ଅନେକଙ୍କ ମୃତ୍ୟୁ ହୋଇଛି। ଆଜି ସକାଳ ୯ ଟା ସୁଦ୍ଧା ୮୦ ଲୋକଙ୍କର ମୃତ୍ୟୁ ହୋଇଛି | ତେବେ ମୃତ୍ୟୁ ସଂଖ୍ୟା ଆହୁରି ବଢିବାର ଆଶଙ୍କା କରାଯାଉଛି | ଏବେ ବାତ୍ୟା ଭାରତ ଆଡକୁ ମୁହାଉଁଛି ।ଏହା ପ୍ରଭାବରେ ଦକ୍ଷିଣ ଭାରତର ପାଞ୍ଚଟି ରାଜ୍ୟ ପାଇଁ ପ୍ରବଳ ବର୍ଷା ଆଲର୍ଟ ଜାରି କରାଯାଇଛି।
ଏହି ବାତ୍ୟା ପ୍ରଭାବରେ ୮୦ ଲୋକଙ୍କ ଜୀବନ ଯିବା ସହିତ ଏବେ ବି ଅଧିକାଂଶ ଲୋକଙ୍କ ପତ୍ତା ମିଳୁନାହିଁ | ଅପରେସନ ସାଗର ବନ୍ଧୁ ଅଧୀନରେ ପଡ଼ୋଶୀ ଦେଶଗୁଡ଼ିକୁ ଭାରତ ସରକାର ତୁରନ୍ତ ସହାୟତା ପଠାଇଛନ୍ତି। ଘୂର୍ଣ୍ଣିଝଡ଼ ଡିଟଓ୍ୱା ଭାରତ ଆଡକୁ ମୁହାଇଁବାରେ ଲାଗିଛି ଏବଂ ଶନିବାର ଅପରାହ୍ନ ସୁଦ୍ଧା ଏହା ଭାରତୀୟ ଅଞ୍ଚଳରେ ପ୍ରବେଶ କରିବ ବୋଲି ଆଶା କରାଯାଉଛି।
ପାଣିପାଗ ବିଭାଗ କହିବା ଅନୁସାରେ,ବାତ୍ୟା ସିଧାସଳଖ ଭାରତୀୟ ଉପକୂଳରେ ମାଡ଼ ହେବ ନାହିଁ, ବରଂ ଆଗକୁ ବଢ଼ିବ, ଯାହା ଦକ୍ଷିଣ ଭାରତୀୟ ରାଜ୍ୟଗୁଡ଼ିକ ଉପରେ ବ୍ୟାପକ ପ୍ରଭାବ ପକାଇବ। ଶନିବାର ଅପରାହ୍ନ ସୁଦ୍ଧା ଝଡ଼ ତାମିଲନାଡୁ ଉପକୂଳ ନିକଟରେ ପ୍ରବେଶ କରି କ୍ରମେ ଏହା ଉତ୍ତର ଆଡ଼କୁ ଗତି କରିବା ସହିତ ଦୁର୍ବଳ ହେବ।
ତେବେ ଏହାର ପ୍ରଭାବରେ ସର୍ବାଧିକ ୬ଟି ରାଜ୍ୟ ବେଶୀ ପରିମାଣରେ ପ୍ରଭାବିତ ହେବ ସେ ରାଜ୍ୟ ଗୁଡିକ ହେଉଛି ତାମିଲନାଡୁ ଏବଂ ଆନ୍ଧ୍ର ପ୍ରଦେଶ, କେରଳ, କର୍ଣ୍ଣାଟକ, ପୁଡୁଚେରୀ ଏବଂ ତେଲେଙ୍ଗାନାରେ | ଏହି ସବୁ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି | ତେବେ ଅତ୍ୟଧିକ ବର୍ଷାକୁ ଦୃଷ୍ଟିରେ ରଖି ପାଣିପାଗ ବିଭାଗ ରେଡ ଆଲର୍ଟ ଜାରି କରିଛି | ଏବଂ ତାହା ସହିତ ଚେନ୍ନାଇକୁ ଯାଉଥିବା ୫୦ ବିମାନକୁ ମଧ୍ୟ ବାତିଲ କରାଯାଇଛି।
ଏହି ସମୟରେ ଉତ୍ତର ଭାରତରେ ଶୀତ ଆରମ୍ଭ ହୋଇଛି। ଅନେକ ରାଜ୍ୟରେ ସର୍ବନିମ୍ନ ତାପମାତ୍ରା ୧୦ ଡିଗ୍ରୀ ସେଲସିୟସ ତଳକୁ ଆସିଛି। ପାଣିପାଗ ବିଭାଗର ରିପୋର୍ଟ ଅନୁଯାୟୀ, ଉତ୍ତର-ପଶ୍ଚିମ ଭାରତରେ ତାପମାତ୍ରା ୨ ରୁ ୪ ଡିଗ୍ରୀ ସେଲସିୟସ ହ୍ରାସ ପାଇବାର ସମ୍ଭାବନା ଅଛି। ତଥାପି, କେନ୍ଦ୍ରୀୟ ଭାରତର ତଥା ମଧ୍ୟପ୍ରଦେଶ, ପୂର୍ବ ରାଜସ୍ଥାନ, ପଶ୍ଚିମ ମହାରାଷ୍ଟ୍ର ଏବଂ ଛତିଶଗଡ଼ରେ ତାପମାତ୍ରା ବୃଦ୍ଧି ପାଇବାର ସମ୍ଭାବନା ରହିଛି।
