ବିଧାନସଭାକୁ ପ୍ରଥମ ଥର ପାଇଁ ରାଷ୍ଟ୍ରପତିଙ୍କୁ ଆଣି ଲୋକଙ୍କ ମନରେ ସ୍ବତନ୍ତ୍ର ଛାପ ଛାଡ଼ିବାକୁ ଚେଷ୍ଟା କରୁଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ…
ଭୁବନେଶ୍ୱର;୨୯|୧୧: ଟ୍ରେଣ୍ଡରେ ଚାଲିଛନ୍ତି ମୋହନ ଏବଂ ଧର୍ମେନ୍ଦ୍ର | ପ୍ରଥମଥର ପାଇଁ ବିଧାନସଭାକୁ ଆସିଲେ ରାଷ୍ଟ୍ରପତି | ଲୋକଙ୍କ ମନରେ ଛାପ ଛାଡିବା ପାଇଁ ସରକାର ବିଭିନ୍ନ ପ୍ରକାରର ଜାତୀୟ ସ୍ତରୀର କାର୍ଯ୍ୟକ୍ରମ ଆୟୋଜନ କରୁଛନ୍ତି | ଅନ୍ୟପଟେ ଗତକାଲିର ନବୀନ ଓ ଧର୍ମେନ୍ଦ୍ରଙ୍କ ଫଟୋକୁ ନେଇ ବି ଚର୍ଚ୍ଚା ଜୋର୍ ଧରିଛି । ଓଡ଼ିଶାରେ ପ୍ରଥମ ଥର ପାଇଁ ଏହି ସବୁ କାର୍ଯ୍ୟକ୍ରମ ଆୟୋଜନ, ମୋହନ ମାଝୀଙ୍କ ସରକାର ପାଇଁ ସାଜିଛି ବଡ଼ ପ୍ଲସ୍ ପଏଣ୍ଟ୍ । ଗତକାଲି ପ୍ରଥମ ଥର ପାଇଁ ବିଧାନସଭାକୁ ଆସିଥିଲେ ରାଷ୍ଟ୍ରପତି ।
ଦ୍ରୌପଦୀ ମୁର୍ମୁ ଗତ ୯ ବର୍ଷ ଧରି ବିଧାନସଭାରେ ସଦସ୍ୟା ରହିଥିଲେ। ନବୀନଙ୍କ ମନ୍ତ୍ରିମଣ୍ଡଳରେ ୪ ବର୍ଷ ମନ୍ତ୍ରୀ ବି ଥିଲେ । ତେବେ ରାଜ୍ୟ ସରକାରଙ୍କ ଅନୁରୋଧ ରଖି କାଲି ରାଷ୍ଟ୍ରପତି ଭାବେ ସେ ବିଧାନସଭାକୁ ଆସିଲେ । ଗତବର୍ଷ ଡିଜିପି ସମ୍ମିଳନୀ ଏବଂ ଜାନୁଆରିରେ ପ୍ରବାସୀ ଭାରତୀୟ ଦିବସ ରାଜ୍ୟରେ ପ୍ରଥମ ଥର ଆୟୋଜନ କରାଯାଇଛି | ଏହାକୁ ନେଇ ମୁଖ୍ୟମନ୍ତ୍ରୀ କହିଛନ୍ତି ଯେ ବର୍ତ୍ତମାନ ସମୟରେ ହେଉଥିବା କାର୍ଯ୍ୟକ୍ରମ ଗୁଡିକ ଏକ ଐତିହାସିକ ପଦକ୍ଷେପ । ବିଜେପି ବି ଏହାର ଶ୍ରେୟ ମୁଖ୍ୟମନ୍ତ୍ରୀଙ୍କୁ ଦେଇଛନ୍ତି | ଅପରପକ୍ଷରେ ବିରୋଧୀ ଦଳ ଶାସକ ଦଳକୁ ଏକ ଇଭେଣ୍ଟ ମ୍ୟାନେଜମେଣ୍ଟ ସରକାର କହି କଟାକ୍ଷ କରିଛନ୍ତି।
ଗତକାଲି ରାଷ୍ଟ୍ରପତିଙ୍କ ଗସ୍ତ ବେଳେ ନବୀନ ଓ ଧର୍ମେନ୍ଦ୍ରଙ୍କ ଫଟୋ ବି ରାଜନୈତିକ ଚର୍ଚ୍ଚାକୁ ବଢ଼ାଇଛି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ହାତ ଧରି ହସି ହସି କଥା ହେଉଥିବା ଦେଖିବାକୁ ମିଳିଛି । ରାଜନୈତିକ କ୍ଷେତ୍ରରେ ଉଭୟ ବିରୋଧୀ ଦଳର ନେତା ହେଲେ ମଧ୍ୟ ବ୍ୟକ୍ତିଗତ ସ୍ତରରେ ପରସ୍ପର ପ୍ରତି ଉଭୟ ନେତାଙ୍କ ସମ୍ମାନ ଫଟୋରେ ଦେଖିବାକୁ ମିଳୁଛି। ପୂର୍ବରୁ ମଧ୍ୟ ମୋହନଙ୍କ ଶପଥ ସମାରୋହରେ ଧର୍ମେନ୍ଦ୍ର, ନବୀନଙ୍କୁ ବାଟ କଢ଼େଇ ନେଇଥିଲେ | ପୁରୀ ରଥଯାତ୍ରା ବେଳେ ମଞ୍ଚ ତଳେ ନବୀନଙ୍କୁ ଦେଖି, ହାତ ଧରି ତାଙ୍କୁ ମଞ୍ଚ ଉପରକୁ ପାଛୋଟି ନେଇଯିବା ଦୃଶ୍ୟ ଦର୍ଶକଙ୍କ ଦୃଷ୍ଟି ଆକର୍ଷଣ କରିଥିଲା ।
