ଅପେକ୍ଷାରେ ଯୋଗ୍ୟ ହିତାଧିକାରୀ; ଅଯୋଗ୍ୟ ହିତାଧିକାରୀଙ୍କୁ କାଟିବାରେ ଅସମର୍ଥ ହେଉଛନ୍ତି ସରକାର
ଭୁବନେଶ୍ବର;୨୯|୧୧: ରାଜ୍ୟରେ ଯୋଗ୍ୟ ହିତାଧିକାରୀଙ୍କୁ ମିଳୁନି ଟଙ୍କା | ସରକାରଙ୍କ ପକ୍ଷେ ଅସମ୍ଭବ ହୋଇପଡିଲାଣି ଅଯୋଗ୍ୟ ହିତାଧିକାରଙ୍କୁ ହଟାଇବା | ତେବେ ଯୋଗ୍ୟ ହିତାଧିକାରୀ ଏବେ ଅନ୍ୟର ମୃତ୍ୟୁର ଅପେକ୍ଷାରେ ରହିଛନ୍ତି | ତେବେ ସରକାର ମଧ୍ୟ ନିରୁପାୟ | ହିତାଧିକାରୀଙ୍କ ପଞ୍ଜିକରଣ କରିବା ଏବଂ ନାମ ହଟାଇବା ଏ ସବୁ ଜନଗଣନା ଉପରେ ନିର୍ଭର କରେ | ତେବେ ସୂଚନା ଅନୁଯାଇ ଜନଗଣନା ୨୦୨୧ ହୋଇଥାନ୍ତା କିନ୍ତୁ ମହାମାରୀ ପାଇଁ ଏହା ଆଜି ପଯ୍ୟନ୍ତ ଅଟକି ରହିଛି | ତେବେ ଏହି ନାମ ପଞ୍ଜିକରଣ ଏବଂ ନାମ ହଟାଇବା ସବୁକିଛି ଭୋଟର ତାଲିକା ଉପରେ ନିର୍ଭର କରେ | ତେବେ ଏ ସବୁ ଭିତରେ ରାଜ୍ୟର ସବୁ ଜିଲ୍ଲାରେ କିଛି ପରିମାଣରେ ଅଯୋଗ୍ୟ ହିତାଧିକାରୀ ରହିଛନ୍ତି | ଯାହାକୁ ହଟାଇବା ପାଇଁ ସରକାରଙ୍କ ପକ୍ଷେ କଷ୍ଟକର ହେଉଛି | ଏହାଫଳରେ ଯୋଗ୍ୟ ହିତାଧିକାରୀ ସରକାରଙ୍କ ଏହି ସୁବିଧା ସୁଯୋଗରୁ ବଞ୍ଚିତ ରହୁଛନ୍ତି | ଏହି ସୁବିଧାକୁ ପାଇବା ପାଇଁ ଲୋକେ ଅପେକ୍ଷା କରି ନିଜର ଜୀବନ କାଟୁଛନ୍ତି | ଏହି ବିଷୟରେ ସରକାର ମଧ୍ୟ ଚିନ୍ତାରେ ପଡିଲେଣି |
ଭୋଟର ତାଲିକାର ଆକଳନ ଅନୁଯାୟୀ ପ୍ରାୟ ସବୁ ଜିଲ୍ଲାରେ ଅଯୋଗ୍ୟ ହିତାଧିକାରୀ ଅଛନ୍ତି। ଅଯୋଗ୍ୟ ହିତାଧିକାରୀଙ୍କୁ କାଟିବା ପାଇଁ ବିଭାଗ ପକ୍ଷରୁ ଜିଲ୍ଲାପାଳମାନଙ୍କୁ କୁହାଯାଇଥିଲା। କିନ୍ତୁ ଏହି ପ୍ରକ୍ରିୟା ଅତ୍ୟନ୍ତ ଧିମା ହୋଇଯାଇଛି। ବିଭିନ୍ନ ସମୟରେ ରାଜନୈତିକ କାରଣରୁ ମନଇଚ୍ଛା ହିତାଧିକାରୀଙ୍କୁ ଯୋଡ଼ି ଦିଆଯାଇଥିଲା। ଜିଲ୍ଲା ଓ ବ୍ଲକ୍ ସ୍ତରରେ ଦାୟିତ୍ବରେ ଥିବା ପ୍ରଶାସନିକ ଅଧିକାରୀମାନେ ମଧ୍ୟ ଏଥି ପ୍ରତି ଆଖି ବୁଜି ଦେଇଥିଲେ। ଫଳରେ କିଏ ବୟସ ଜାଲିଆତି କରି ତ ଆଉ କିଏ ଆର୍ଥିକ ଦୁର୍ବଳ ନଥାଇ ବି ବାର୍ଦ୍ଧକ୍ୟ ଭତ୍ତା ହାତେଇଥିଲା। ରାଜନୈତିକ ପୃଷ୍ଠପୋଷକତାରେ ଏହା ଖୋଲାଖୋଲି ଚାଲିଥିଲା। ବର୍ତ୍ତମାନ ଖୋଳତାଡ଼ ପରେ ଏହି ଅନିୟମିତତା ସ୍ପଷ୍ଟ ଜଣାପଡ଼ୁଛି। କିନ୍ତୁ ବଡ଼ଧରଣର କାର୍ଯ୍ୟାନୁଷ୍ଠାନ ନେବାକୁ ସରକାର ସାହସ ଜୁଟାଇ ପାରୁନାହାନ୍ତି। ଏପରି ଅଯୋଗ୍ୟଙ୍କ ପାଇଁ ଯୋଗ୍ୟ ଆବେଦନକାରୀ ଭତ୍ତାରୁ ବଞ୍ଚିତ ହେଉଛନ୍ତି।
ଆଜି ମଧ୍ୟ ବିଧାନସଭାରେ ବିଧାୟକମାନେ ଏ ସଂକ୍ରାନ୍ତରେ ପ୍ରଶ୍ନ କରିଥିଲେ। ପଦ୍ମଲୋଚନ ପଣ୍ଡା, କାଡ୍ରାକା ଆପାଲା ସ୍ବାମୀ, ପବିତ୍ର ସାଉଁନ୍ତା ଓ ସୋଫିଆ ଫିରଦୋସ୍ ପ୍ରମୁଖ ଏ ସଂକ୍ରାନ୍ତରେ କରିଥିବା ଲିଖିତ ପ୍ରଶ୍ନର ଉତ୍ତରରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଦେଇଥିବା ଉତ୍ତର ଅନୁଯାୟୀ ବର୍ତ୍ତମାନ ମଧୁବାବୁ ପେନ୍ସନ୍ ଯୋଜନାରେ ୩୬,୬୨,୯୪୫ ଏବଂ ଜାତୀୟ ସାମାଜିକ ସୁରକ୍ଷା କାର୍ଯ୍ୟକ୍ରମ ଅଧୀନରେ ୧୯,୫୫,୩୯୧ ଜଣ ହିତାଧିକାରୀଙ୍କୁ ମାସିକ ଭତ୍ତା ଯୋଗାଇ ଦିଆଯାଉଛି। ଏହା ମଧ୍ୟରେ ୮୦ ବର୍ଷରୁ ଅଧିକ ବୟସ୍କ ହିତାଧିକାରୀଙ୍କ ସଂଖ୍ୟା ୩,୮୫,୭୯୭। ସେହିପରି ୮୦% ବା ତାହାଠାରୁ ଅଧିକ ଭିନ୍ନକ୍ଷମ ହିତାଧିକାରୀଙ୍କ ସଂଖ୍ୟା ୧,୦୬,୩୧୭। ୨୦୨୩-୨୪ରେ ସରକାର ମଧୁବାବୁ ଭତ୍ତା ଯୋଜନାରେ ହିତାଧିକାରୀଙ୍କ ସଂଖ୍ୟାରେ ୮,୧୩,୮୧୩ ବୃଦ୍ଧି କରିଥିଲେ। ତାହା ପରେ ଆଉ ସଂଖ୍ୟାରେ ବୃଦ୍ଧି କରାଯାଇ ନାହିଁ। କେବଳ ମୃତ୍ୟୁ ହେଲେ ହିଁ ଅନ୍ୟମାନେ ସାମିଲ ହେଉଛନ୍ତି।
୨୦୨୪-୨୫ ଓ ଚଳିତ ବର୍ଷ ୨୦୨୫-୨୬ ଆର୍ଥିକ ବର୍ଷରେ ଆଜି ପର୍ଯ୍ୟନ୍ତ ନୂଆ ଭାବେ ୩,୩୭,୫୫୦ ଜଣ ଯୋଗ୍ୟ ହିତାଧିକାରୀଙ୍କୁ ଭତ୍ତା ଦିଆଯାଇଛି।
