ଇଣ୍ଡିଗୋ ଏୟାରଲାଇନ୍ସର ୫୫୦ରୁ ଅଧିକ ବିମାନ ବାତିଲ, ଯାତ୍ରୀ ହଟହଟା
ନୂଆଦିଲ୍ଲୀ: ଇଣ୍ଡିଗୋ ଏୟାରଲାଇନ୍ସର ଅନେକ ଉଡ଼ାଣ ବାତିଲ ପରେ ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦର (RGIA) ରେ ବିଶୃଙ୍ଖଳା ଦେଖାଦେଇଥିଲା। ଲଗାତାର ତୃତୀୟ ଦିନ ପାଇଁ ବିମାନ କମ୍ପାନୀ ଅନେକ ଉଡ଼ାଣ ବାତିଲ କରିଛି। ଯାହା ଫଳରେ ହଜାର ହଜାର ଯାତ୍ରୀଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି।
ତେବେ ଇଣ୍ଡିଗୋର କାର୍ଯ୍ୟସୂଚୀ ହଠାତ୍ ବିଭିନ୍ନ କାରଣ ଯୋଗୁଁ ଏକପ୍ରକାର ଭୁଶୁଡ଼ି ପଡ଼ିଛି। ଯେଉଁଥିରେ କ୍ରୁ ସଦସ୍ୟଙ୍କ ଅଭାବ, ନୂତନ ଡ୍ୟୁଟି-ଟାଇମ୍ ନିୟମ ଏବଂ ଯାନ୍ତ୍ରିକ ତ୍ରୁଟି ସାମିଲ ରହିଛି।
ବିମାନବନ୍ଦରର ଜଣେ ମୁଖପାତ୍ର କହିଛନ୍ତି ଯେ ଦିନସାରା ମୋଟ ୭୪ଟି ଇଣ୍ଡିଗୋ ଉଡ଼ାଣ ବାତିଲ କରାଯାଇଛି। ଯେଉଁଥିରେ ୩୭ଟି ଆଗମନ ଏବଂ ୩୭ଟି ପ୍ରସ୍ଥାନ ଅନ୍ତର୍ଭୁକ୍ତ। ବିଳମ୍ବ ଏବଂ ବାତିଲକରଣ ଯୋଗୁଁ ଯାତ୍ରୀମାନେ ସେମାନଙ୍କ ଗନ୍ତବ୍ୟସ୍ଥଳରେ ପହଞ୍ଚିପାରିନଥିଲେ ଏବଂ ଘଣ୍ଟା ଘଣ୍ଟା ଧରି ବିମାନବନ୍ଦରରେ ଅପେକ୍ଷା କରିଥିଲେ। ଏହା ଫଳରେ ବିମାନବନ୍ଦର ଟର୍ମିନାଲ ଭିତରେ ଏବଂ ବାହାରେ ଲମ୍ବା ଧାଡି ଲାଗି ରହିଥିଲା। ଟର୍ମିନାଲ କୋଠାରେ ବିମାନ କର୍ମଚାରୀଙ୍କ ସହିତ ଯାତ୍ରୀମାନଙ୍କ ଯୁକ୍ତିତର୍କ ହେବାର ରିପୋର୍ଟ ମଧ୍ୟ ଆସିଛି। ଏହି ସମୟରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ବାରମ୍ବାର ଇଣ୍ଡିଗୋ ଉଡ଼ାଣ ବାତିଲକୁ ଗମ୍ଭୀରତାର ସହ ନେଇଛି।
ମନ୍ତ୍ରୀ କିଞ୍ଜରାପୁ ରାମ ମୋହନ ନାଇଡୁ ଏକ ପ୍ରମୁଖ ବୈଠକ କରିଥିଲେ, ଯେଉଁଥିରେ ଅନେକ ବରିଷ୍ଠ ଅଧିକାରୀ ଯୋଗ ଦେଇଥିଲେ। ସେ ଇଣ୍ଡିଗୋର ପରିଚାଳନା ପ୍ରତି ନିଜର ଅସନ୍ତୋଷ ପ୍ରକାଶ କରିଥିଲେ ଏବଂ ସମସ୍ୟାର ସମାଧାନ ପାଇଁ କଠୋର ନିର୍ଦ୍ଦେଶ ଜାରି କରିଥିଲେ।କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ କିଞ୍ଜାରପୁ ରାମ ମୋହନ ନାଇଡୁ ନିଜେ ଇଣ୍ଡିଗୋର ବରିଷ୍ଠ ପରିଚାଳନା ସହିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକର ଅଧ୍ୟକ୍ଷତା କରିଥିଲେ। ଯେଉଁଥିରେ ବେସାମରିକ ବିମାନ ଚଳାଚଳ ସଚିବ, ବେସାମରିକ ବିମାନ ଚଳାଚଳ ମହାନିର୍ଦ୍ଦେଶକ, ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ ଭାରତୀୟ ବିମାନବନ୍ଦର ପ୍ରାଧିକରଣର ଅଧିକାରୀମାନେ ଉପସ୍ଥିତ ଥିଲେ।
ଅପରପକ୍ଷରେ କହିବାକୁ ଗଲେ ଇଣ୍ଡିଗୋ ଗତ ଦୁଇ ଦିନରେ ବହୁ ରୁ ଅଧିକ ବିମାନ ଉଡ଼ାଣ ବାତିଲ କରିଛି। ଏହି ବାତିଲ ଯୋଗୁଁ ଦିଲ୍ଲୀ, ମୁମ୍ବାଇ, ବେଙ୍ଗାଲୁରୁ, ହାଇଦ୍ରାବାଦ ଏବଂ ପୁଣେ ସମେତ ଅନେକ ପ୍ରମୁଖ ବିମାନବନ୍ଦରରେ ବିଶୃଙ୍ଖଳା ସୃଷ୍ଟି ହୋଇଛି। ତେବେ ଏସବୁକୁ ନେଇ ଯାତ୍ରୀମାନେ ମଧ୍ୟ ସୋସିଆଲ ମିଡିଆରେ ନିଜ ଅସନ୍ତୋଷ ଜାହିର କରିବାରେ ଲାଗିଛନ୍ତି।
