ନବ ଦମ୍ପତ୍ତିଙ୍କ ନିଆରା ରିସେପ୍ସନ୍; ଭିଡିଓ କଲ୍ ଦ୍ୱାରା ରିସେପ୍ସନ୍ ଭୋଜିରେ ହେଲେ ସାମିଲ
ଆଜିକାଲି ସବୁକିଛି କାର୍ଯ୍ୟ ଖୁବ ଶୀଘ୍ର ଅନଲାଇନ ମାଧ୍ୟମରେ ହୋଇଯାଉଛି | ପାଠପଢ଼ା, ଅଫିସ ମିଟିଙ୍ଗ ଠୁ ଆରମ୍ଭ କରି ଫୁଡ୍ ଡେଲିଭରି ପର୍ଯ୍ୟନ୍ତ ସବୁ କିଛି ଅନଲାଇନ ମାଧ୍ୟମରେ ହେଉଛି | କିନ୍ତୁ କେବେ ଅନଲାଇନ୍ ରିସେପ୍ସନ୍ ଦେଖିଛନ୍ତି କି ? ତେବେ କର୍ଣ୍ଣାଟକର ହୁବଲିରେ ଏକ ନବବିବାହିତ ଦମ୍ପତିଙ୍କ ପାଇଁ ରିସେପ୍ସନ୍ ର ସମସ୍ତ ପ୍ରସ୍ତୁତି ସରିଥିଲା । ଆଡମ୍ବରରେ ସଜା ହୋଇଥିଲା ରିସେପ୍ସନ୍ ହଲ୍,ଲାଗିଥିଲା ପ୍ରୋଜେକ୍ଟର । ହେଲେ ହଲରେ ଷ୍ଟେଜରେ ଛିଡ଼ା ହୋଇନଥିଲେ ଉଭୟ ବର ଓ କନିଆ । ନବବିବାହିତଙ୍କ ଜାଗାରେ ଛିଡ଼ା ହୋଇଥିଲେ କନିଆଙ୍କ ବାପା ଓ ମା’ । ଝିଅ ଓ ଜ୍ବାଇଁଙ୍କ ବଦଳରେ ଭୋଜିକୁ ଆସିଥିବା ଅତିଥିଙ୍କଠାରୁ ଗିଫ୍ଟ ନେଉଥିଲେ। ଆଉ ପ୍ରୋଜେକ୍ଟରରେ ବସି ଅତିଥିଙ୍କଠାରୁ ଡିଜିଟାଲ୍ ଜରିଆରେ ଆଶିର୍ବାଦ ନେଉଥିଲେ ନବଦମ୍ପତି । ହେଲେ ନିଜ ରିସେପ୍ସନରେ କାହିଁକି ଭିଡିଓ କଲ ଜରିଆରେ ଆଟେଣ୍ଡ କଲେ ରିସେପ୍ସନ?
ତେବେ ଦୀର୍ଘ ପାଞ୍ଚଦିନ ଧରି ଲଗାତାର ଭାବେ ଇଣ୍ଡିଗୋ ବିମାନ ବାତିଲ ଯୋଗୁଁ ନବବିବାହିତ ସମୟ ସୁଦ୍ଧା ରିସେପ୍ସନରେ ପହଞ୍ଚିପାରିଲେ ନାହିଁ । ଭିଡିଓ କଲ ବ୍ୟତୀତ ପାଖରେ ଆଉ କିଛି ଅପ୍ସନ୍ ନଥିବାରୁ ବାପା,ମା’ ହିଁ ତାଙ୍କ ଜାଗାରେ ଛିଡ଼ା ହୋଇ ଗିଫ୍ଟ ଗ୍ରହଣ କରିଥିଲେ ଏବଂ ନବବିବାହିତ ଭିଡ଼ିଓ କଲ୍ ଜରିଆରେ ସମସ୍ତଙ୍କୁ ପ୍ରଣାମ କରୁଥିଲେ।
ସୂଚନା ଅନୁସାରେ, ହୁବଲିର ମେଧା କ୍ଷୀର ସାଗର ଏବଂ ବେଙ୍ଗାଲୁରୁର ସଫ୍ଟୱେର୍ ଇଞ୍ଜିନିୟର ଭୁବନେଶ୍ୱର ର ସଙ୍ଗମ ଦାସ ନଭେମ୍ବର ୨୩ ରେ ଭୁବନେଶ୍ୱରରେ ବିବାହ କରିଥିଲେ । ଏହା ପରେ ବୁଧବାର କନିଆଙ୍କ ଜନ୍ମସ୍ଥାନ ହୁବଲିରେ ଏକ ରିସେପ୍ସନର ଆୟୋଜନ କରାଯାଇଥିଲା । କନ୍ୟା ପରିବାର ଏଥିପାଇଁ ହୁବଲିର ଗୁଜରାଟ ଭବନରେ ସମସ୍ତ ପ୍ରସ୍ତୁତି କରିଥିଲେ । ବର ଏବଂ କନ୍ୟା ଡିସେମ୍ବର ୨ ତାରିଖରେ ଭୁବନେଶ୍ୱରରୁ ବେଙ୍ଗାଲୁରୁ ଏବଂ ସେଠାରୁ ହୁବଲି ପାଇଁ ଏକ ବିମାନ ବୁକ୍ କରିଥିଲେ । କିଛି ସମ୍ପର୍କୀୟ ଭୁବନେଶ୍ୱରରୁ ମୁମ୍ବାଇ ଏବଂ ସେଠାରୁ ହୁବଲି ପାଇଁ ଏକ ବିମାନ ବୁକ୍ କରିଥିଲେ କିନ୍ତୁ ଡିସେମ୍ବର ୨ ତାରିଖ ସକାଳ ୯ଟାରୁ ପରଦିନ ଡିସେମ୍ବର ୩ ତାରିଖ ସକାଳ ୪ ରୁ ୫ ଟା ପର୍ଯ୍ୟନ୍ତ ଉଡ଼ାଣ ବିଳମ୍ବ ହୋଇଥିଲା । ତା’ପରେ ହଠାତ୍ ଡିସେମ୍ବର ୩ ତାରିଖ ସକାଳେ ଉଡ଼ାଣ ବାତିଲ ହୋଇଗଲା । ଏହି କାରଣରୁ ମେଧା ଏବଂ ସଙ୍ଗମ ଠିକ୍ ସମୟରେ ହୁବଲି ପହଞ୍ଚିପାରିଲେ ନାହିଁ । ଉଭୟ ଭୁବନେଶ୍ୱରରୁ ଅନଲାଇନ୍ ରିସେପ୍ସନରେ ଯୋଗ ଦେଇଥିଲେ । ହୁବଲିରେ ମେଧାଙ୍କ ପିତାମାତା ବର ଏବଂ କନ୍ୟାଙ୍କ ଚେୟାରରେ ବସିଥିଲେ ଯାହା ପରେ ରିସେପ୍ସନ ଅନଲାଇନ୍ ମାଧ୍ୟମରେ କରାଯାଇଥିଲା ।
ତେବେ ଶୁକ୍ରବାର ସକାଳେ ମୁମ୍ବାଇ ଏବଂ ଦିଲ୍ଲୀ ସମେତ ଦେଶର ଅନେକ ବିମାନବନ୍ଦରରେ ଇଣ୍ଡିଗୋ ବିମାନ ବାତିଲ ସଙ୍କଟ ଆହୁରି ଘନୀଭୂତ ହୋଇଥିଲା । ଶହ ଶହ ଯାତ୍ରୀ ଘଣ୍ଟା ଘଣ୍ଟା ଧରି ଟର୍ମିନାଲରେ ଫସି ରହିଥିଲେ । କିଛି ଲୋକ କନେକ୍ଟିଂ ଫ୍ଲାଇଟ୍ ହରାଇଥିଲେ। ଅନ୍ୟମାନେ ସେମାନଙ୍କ ପିଲାମାନଙ୍କ ସ୍କୁଲ କାର୍ଯ୍ୟକ୍ରମ ହରାଇଥିଲେ । ବର୍ତ୍ତମାନ ପରିସ୍ଥିତି ଏପରି ହୋଇଛି ଯେ ଇଣ୍ଡିଗୋର ବିମାନ ବାତିଲ ପରେ ଅନ୍ୟ ଏୟାରଲାଇନ୍ସ ଟିକେଟ୍ ମୂଲ୍ୟ ଅନେକ ଥର ବୃଦ୍ଧି କରିଛନ୍ତି । ଦିଲ୍ଲୀ ବିମାନବନ୍ଦରରୁ ସମସ୍ତ ଘରୋଇ ଇଣ୍ଡିଗୋ ବିମାନ ଉଡ଼ାଣ ଶୁକ୍ରବାର ମଧ୍ୟରାତ୍ରି ପର୍ଯ୍ୟନ୍ତ ବାତିଲ କରାଯାଇଛି । ଏନେଇ ବିମାନବନ୍ଦର ଅପରେଟର DIAL କହିଛି । ଯାତ୍ରୀମାନଙ୍କୁ ସେମାନଙ୍କର ଉଡ଼ାଣ ସୂଚୀ ପୂର୍ବରୁ ନିଶ୍ଚିତ କରିବାକୁ ଏବଂ ଯାତ୍ରା ଅସୁବିଧା ପାଇଁ ପ୍ରସ୍ତୁତ ରହିବାକୁ ପରାମର୍ଶ ଦିଆଯାଇଛି ।
