ଟାଟା-ଏର୍ନାକୁଲମ୍ ଏକ୍ସପ୍ରେସରେ ଅଗ୍ନିକାଣ୍ଡ, ଜଣେ ଯାତ୍ରୀ ମୃତ
ଟାଟା-ଏର୍ନାକୁଲମ୍ ଏକ୍ସପ୍ରେସ୍ ଟ୍ରେନ୍ରେ ଅଗ୍ନିକାଣ୍ଡ ଘଟି ଜଣେ ଯାତ୍ରୀଙ୍କ ମୃତ୍ୟୁ ଘଟିଛି। ରବିବାର ମଧ୍ୟରାତ୍ରି ପରେ ଆନ୍ଧ୍ରପ୍ରଦେଶର ଏଲାମାଞ୍ଚିଲି ନିକଟରେ ଟାଟା-ଏର୍ନାକୁଲମ୍ ଏକ୍ସପ୍ରେସ୍ରେ ଏକ ଭୟଙ୍କର ଅଗ୍ନିକାଣ୍ଡ ଘଟିଥିଲା। ଟ୍ରେନ୍ଟି ଏଲାମାଞ୍ଚିଲି ନିକଟରେ ଅତିକ୍ରମ କରୁଥିବା ସମୟରେ ପ୍ରାୟ ୧:୩୦ ସମୟରେ ଏହି ଅଘଟଣ ଘଟିଥିଲା। ପ୍ୟାଣ୍ଟ୍ରି କାର୍କୁ ଲାଗି ରହିଥିବା B-1 ଏବଂ M-2 ଏସି କୋଚ୍ରେ କୌଣସି କାରଣବଶତଃ ହଠାତ୍ ନିଆଁ ଲାଗିଯାଇଥିଲା।
ରେଳବାଇ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଧୂଆଁ ଏବଂ ନିଆଁ ଦେଖିବା ପରେ ଟ୍ରେନ୍ର ଲୋକୋ ପାଇଲଟ୍ମାନେ ତୁରନ୍ତ ଟ୍ରେନ୍କୁ ଅଟକାଇ ଦେଇଥିଲେ। କିନ୍ତୁ ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚିବା ପୂର୍ବରୁ ଉଭୟ ଏସି କୋଚ୍ ସମ୍ପୂର୍ଣ୍ଣ ଜଳିଯାଇଥିଲା। ନିଆଁ କୋଚ୍ଗୁଡ଼ିକ ଘନ ଧୂଆଁରେ ପୂର୍ଣ୍ଣ ହୋଇଯାଇଥିଲା, ଯାହା ଫଳରେ ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ଅନେକ ଯାତ୍ରୀ ଭୟଭୀତ ହୋଇ ଟ୍ରେନରୁ ଓହ୍ଲାଇ ପଡ଼ି ଜୀବନ ବଞ୍ଚାଇଥିଲେ। ଘଟଣାରେ ଜଣେ ଯାତ୍ରୀ ପୋଡ଼ି ମୃତ୍ୟୁବରଣ କରିଥିବା ଜଣାପଡ଼ିଛି। ନିକଟସ୍ଥ ଅଗ୍ନିଶମ କେନ୍ଦ୍ରର ଅଗ୍ନିଶମ ବାହିନୀ ଦଳ ଘଟଣାସ୍ଥଳରେ ପହଞ୍ଚି ବହୁତ ଚେଷ୍ଟା ପରେ ନିଆଁକୁ ନିୟନ୍ତ୍ରଣ କରିଥିଲେ।
ତେବେ ଦୁର୍ଘଟଣା ପରେ ପ୍ରାୟ ୨୦୦୦ ଯାତ୍ରୀ ଷ୍ଟେସନରେ ଫସି ରହିଥିଲେ। ଏପରିକି ଶୀତରେ ଦୀର୍ଘ ସମୟ ଅପେକ୍ଷା କରିବାକୁ ବାଧ୍ୟ ହୋଇଥିଲେ। ଏହି ଦୁଃଖଦ ଘଟଣା ବିଜୟୱାଡାର ୭୦ ବର୍ଷୀୟ ଚନ୍ଦ୍ରଶେଖର ସୁନ୍ଦରଙ୍କ ଜୀବନ ନେଇଥିଲା। ସେ ଏକ B-1 AC କୋଚରେ ଯାତ୍ରା କରୁଥିଲେ ଏବଂ ନିଆଁରେ ଜୀବନ୍ତ ଦଗ୍ଧ ହୋଇଯାଇଥିଲେ। ଏହା ବ୍ୟତୀତ ଦୁଇଟି ପ୍ରଭାବିତ କୋଚରେ ଥିବା ସମସ୍ତ ଯାତ୍ରୀଙ୍କ ଲଗେଜ ନଷ୍ଟ ହୋଇଯାଇଥିଲା। ଏହି ଘଟଣା ବିଶାଖାପାଟଣା-ବିଜୟୱାଡା ରେଳ ରୁଟକୁ ମଧ୍ୟ ପ୍ରଭାବିତ କରିଥିଲା। ଏହି ରୁଟରେ ଅନେକ ଟ୍ରେନ ଅଟକିଥିଲା କିମ୍ବା ବିଳମ୍ବ ହୋଇଥିଲା। ପରେ ଯାତ୍ରୀମାନଙ୍କୁ ଅନ୍ୟ କୋଚକୁ ସ୍ଥାନାନ୍ତର କରାଯାଇଥିଲା ଏବଂ ପୋଡ଼ି ଯାଇଥିବା କୋଚଗୁଡ଼ିକୁ ହଟାଇବା ପରେ ଟ୍ରେନ ପୁଣି ଥରେ ଯାତ୍ରା ଆରମ୍ଭ କରିଥିଲା।
ରେଳ ପ୍ରଶାସନ ଦୁର୍ଘଟଣାର ତଦନ୍ତ ନିର୍ଦ୍ଦେଶ ଦେଇଛି ଏବଂ ଅଗ୍ନିକାଣ୍ଡର କାରଣ ନେଇ ଯାଞ୍ଚ କରାଯାଉଛି। ତେବେ ରେଳବାଇ ଆଶ୍ୱାସନା ଦେଇଛି ଯେ ଯାତ୍ରୀମାନଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଆବଶ୍ୟକ ପଦକ୍ଷେପ ନିଆଯିବ।
