ମକର ସଂକ୍ରାନ୍ତି ପୂର୍ବରୁ ପୁରୀ ପୋଲିସର ସ୍ୱତନ୍ତ୍ର ଅଭିଯାନ; ମାଞ୍ଜା ସୁତା ବିକ୍ରି ଏବଂ ବ୍ୟବହାର ଉପରେ ରୋକ
ପୁରୀ,୧୩|୦୧: ପୁରୀ ପାଇଁ ବିପଦ ସାଜିଛି ମାଞ୍ଜା ସୂତାରେ ଉଡୁଥିବା ଗୁଡ଼ି । ଏହା ଉପରେ ରୋକ ଲଗାଇବା ପାଇଁ ପୁରୀ ପୋଲିସ ପକ୍ଷରୁ ଆରମ୍ଭ ହୋଇଛି କାର୍ଯ୍ୟାନୁଷ୍ଠାନ | ପୁରୀ ଏକ ଆନ୍ତର୍ଜାତୀୟ ପର୍ଯ୍ୟଟନ ତଥା ଧାର୍ମିକ ସହର। ପ୍ରତିଦିନ ହଜାର ହଜାର ସଂଖ୍ୟାରେ ପର୍ଯ୍ୟଟକ କିମ୍ବା ଶ୍ରଦ୍ଧାଳୁ ଜଗନ୍ନାଥଙ୍କ ଦର୍ଶନ ପାଇଁ ଏଠାକୁ ଆସିଥାନ୍ତି | ତେବେ ଏଠାକୁ ଆସୁଥିବା ଭକ୍ତଙ୍କ ସୁରକ୍ଷାକୁ ଦୃଷ୍ଟିରେ ରଖି ମାଞ୍ଜା ସୁତା ଦ୍ୱାରା ଗୁଡ଼ି ଉଡିଯାଉଥିବା ଉପରେ ପୋଲିସ ରୋକ ଲଗାଇଛି |
ମାଞ୍ଜା ଲାଗିଥିବା ଗୁଡ଼ି ସୂତା ଦ୍ୱାରା ଦୁର୍ଘଟଣା ମଧ୍ୟ ଘଟୁଛି | ନିକଟରେ ପିଉସୀ ଏବଂ ତାଙ୍କ ପୁତୁରା ବାଇକରେ ଯାଉଥିବା ସମୟରେ ମାଞ୍ଜା ଲାଗିଥିବା ଗୁଡ଼ି ସୂତା ଦ୍ୱାରା ଆହତ ହୋଇ ଗୁରୁତର ଭାବେ ଆହତ ହୋଇଥିଲେ | ସେଥିପାଇଁ ପୁରୀ ଏସପି ପ୍ରତୀକ ସିଂଙ୍କ ନିର୍ଦ୍ଦେଶରେ ପୁରୀ ସହରରେ ଏହି ଅଭିଯାନ ଆରମ୍ଭ ହୋଇଛି । ବଡ଼ଦାଣ୍ଡ ସମେତ ବିଭିନ୍ନ ଅଞ୍ଚଳରେ ମାଞ୍ଜା ସୂତାର ବିକ୍ରୟ ଏବଂ ବ୍ୟବହାର ଉପରେ ରୋକ ଲଗାଇବାକୁ ଜୋର ସୋରରେ ଅଭିଯାନ ଆରମ୍ଭ କରିଛି ପୋଲିସ |
ବିଭିନ୍ନ ଗୁଡ଼ି ଦୋକାନ ସହ ବ୍ୟବସାୟୀଙ୍କ ପାଖରୁ ମୋଟ ୭୦ ବଣ୍ଡଲ୍ ମାଞ୍ଜା ଗୁଡ଼ି ସୂତା ଜବତ କରିଛି ପୋଲିସ | ସେହିପରି ବେଆଇନ ଭାବେ ମାଞ୍ଜା ସୂତା ବିକ୍ରି କରୁଥିବା ଦୋକାନୀମାନଙ୍କୁ ମଧ୍ୟ କଡା ଚେତାବନୀ ଦିଆଯାଇଛି । ପୋଲିସର ବାରଣ ସତ୍ତ୍ୱେ ଯଦି ଏହି ବିକ୍ରି ଜାରି ରୁହେ ତେବେ ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ।
ପୁରୀ ପୁଲିସ ସୂଚନା ଅନୁସାରେ, ମାଞ୍ଜା ସୂତା ବ୍ୟବହାର ଏବଂ ବିକ୍ରି ଆଇନତଃ ଅପରାଧ । ଏହା ମନୁଷ୍ୟ ଜୀବନ ସହିତ ପକ୍ଷୀ, ପଶୁ ଓ ପରିବେଶ ପାଇଁ ମଧ୍ୟ ଭୟଙ୍କର ଅଟେ । ବଡ଼ଦାଣ୍ଡ ଏବଂ ସହର ଅନ୍ୟ ଅଞ୍ଚଳରେ ମାଞ୍ଜା ସୂତା ଦ୍ୱାରା ଗୁଡ଼ି ନ ଉଡ଼ାଇବାକୁ ସାଧାରଣ ଜନତାଙ୍କୁ ଅପିଲ କରିଛି ପୋଲିସ | ଯଦି କୌଣସି ବ୍ୟକ୍ତି ମାଞ୍ଜା ସୂତା ବିକ୍ରି କିମ୍ବା ବ୍ୟବହାର କରୁଥିବା ଦେଖିବେ, ତେବେ ନିକଟରେ ଥିବା ଥାନାକୁ କିମ୍ୱା ୧୧୨ କୁ କଲ କରି ସୂଚନା ଦେବାକୁ ପୋଲିସ ପକ୍ଷରୁ ସାଧାରଣ ବର୍ଗଙ୍କୁ ନିବେଦନ କରାଯାଇଛି।
