ଭାରତ-ୟୁରୋପୀୟ ସଂଘ ବାଣିଜ୍ୟ ଚୁକ୍ତି ଚୂଡ଼ାନ୍ତ; ‘ମଦର୍ ଅଫ୍ ଅଲ୍’ ଡିଲ୍, ଶସ୍ତା ହେବ କାର୍, ମଦ,ଏବଂ ମେଡିକାଲ ଉପକରଣ
ନୂଆଦିଲ୍ଲୀ,୨୭|୧: ଭାରତ ଓ ୟୁରୋପୀୟ ସଂଘ ମଧ୍ୟରେ ଏକ ବାଣିଜ୍ୟ ଚୁକ୍ତି ଚୂଡ଼ାନ୍ତ ହୋଇଛି। ୧୬ତମ ଭାରତ-ୟୁରୋପୀୟ ସଂଘ ଶିଖର ସମ୍ମିଳନୀରେ ଏହା ଫାଇନାଲ୍ ହୋଇଛି । ୟୁରୋପୀୟ ପରିଷଦ ଅଧ୍ୟକ୍ଷ ଆଣ୍ଟୋନିଓ ଲୁଇସ୍ ସାଣ୍ଟୋସ୍ ଡା କୋଷ୍ଟା ଏବଂ ୟୁରୋପୀୟ କମିଶ ଅଧ୍ୟକ୍ଷ ଉର୍ସୁଲା ଭନ୍ ଡେରଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଛି । ଦୁଇ ଦେଶ ମଧ୍ୟରେ ଚୁକ୍ତି ହୋଇଥିବା ମଦର୍ ଅଫ୍ ଡିଲ ଦ୍ୱାରା ଭାରତରେ ଦାମୀ କାର୍, ମଦ, କେମିକାଲ ଏବଂ ମେଡିକାଲ ଉପକରଣ ଗୁଡିକ ଶସ୍ତା ହେବ । କାରଣ ମଦର୍ ଅଫ୍ ଡିଲ୍ ରେ ଭାରତରେ ପ୍ରାୟ ୯୭% ୟୁରୋପୀୟ ସଂଘ ରପ୍ତାନି ଉପରେ ଶୁଳ୍କ ହ୍ରାସ କରିଛି । ଏହାଦ୍ୱାରା ଭାରତରୁ ୨ ଗୁଣା ଅଧିକ ରପ୍ତାନୀ ହେବ ବୋଲି କହିଛି ଇୟୁ ।
ଦୁଇ ଦେଶର ମିଳିତ ସାମ୍ବାଦିକ ସମ୍ମିଳନୀରେ ପ୍ରଧାନମନ୍ତ୍ରୀ ମୋଦି କହିଛନ୍ତି,” ଭାରତ-ଇୟୁ ମଧ୍ୟରେ ଏହା ସବୁଠାରୁ ବଡ଼ ଚୁକ୍ତି । ଏହା ବିଶ୍ୱର ସବୁଠାରୁ ଐତିହାସିକ ବାଣିଜ୍ୟ ଚୁକ୍ତି, ଏଥିରେ ସମସ୍ତଙ୍କୁ ନୂଆ ସୁଯୋଗ ମିଳିବ । ୨୭ଟି ୟୁରୋପୀୟ ଦେଶ ସହ ଡିଲ୍ ହୋଇଛି, ବିଶ୍ବରେ ବାଣିଜ୍ୟ କ୍ଷେତ୍ରରେ ଏହା ସ୍ଥିରତା ଆଣିବ । ଏହି ଚୁକ୍ତି ଦ୍ବାରା ୟୁରୋପ-ଭାରତ ମଧ୍ୟରେ ବାଣିଜ୍ୟ ସମ୍ପର୍କ ମଜଭୁତ ହୋଇଛି । ଆଜିଠାରୁ ନୂଆ ଯୁଗର ଆରମ୍ଭ ହୋଇଛି । ଆମେ ଆଗାମୀ ୫ ବର୍ଷ ପାଇଁ ଏକ ମହତ୍ୱାକାଂକ୍ଷୀ ଏବଂ ସାମଗ୍ରିକ ରଣନୈତିକ କାର୍ଯ୍ୟସୂଚୀ ଆରମ୍ଭ କରୁଛୁ । ଏହି ଜଟିଳ ବିଶ୍ୱ ପରିବେଶରେ, ଏହି କାର୍ଯ୍ୟସୂଚୀ ସ୍ପଷ୍ଟ ଦିଗଦର୍ଶନ ପ୍ରଦାନ କରିବ, ଆମର ସହଭାଗୀ ସମୃଦ୍ଧିକୁ ଆଗକୁ ବଢାଇବା ସହିତ ପ୍ରତିରକ୍ଷା କ୍ଷେତ୍ରରେ ସହଯୋଗକୁ ମଧ୍ୟ ମଜବୁତ କରିବ |”
ଏହି ବାଣିଜ୍ୟ ଚୁକ୍ତି ପରେ, ୟୁରୋପୀୟ ପରିଷଦ ଅଧ୍ୟକ୍ଷ ଆଣ୍ଟୋନିଓ ଲୁଇସ୍ ସାଣ୍ଟୋସ୍ ଡା କୋଷ୍ଟା କହିଛନ୍ତି, “ଆଜି ଆମେ ଆମର ବାଣିଜ୍ୟ ଆଲୋଚନା ଶେଷ କରିଛୁ । ମୋ ପୂର୍ବ କ୍ଷମତାରେ ମୁଁ ୨୦୨୧ ମେ ମାସରେ ଆୟୋଜନ କରିବାର ସୌଭାଗ୍ୟ ପାଇଥିବା ସଦ୍ୟତମ ବୈଠକରେ ଆମେ ପୁଣି ଆରମ୍ଭ କଲୁ । ଆମର ଶିଖର ସମ୍ମିଳନୀ ବିଶ୍ୱକୁ ଏକ ସ୍ପଷ୍ଟ ବାର୍ତ୍ତା ଦେଇଛି । ୟୁରୋପୀୟ ସଂଘ ଏବଂ ଭାରତ ରଣନୈତିକ ଏବଂ ନିର୍ଭରଯୋଗ୍ୟ ଅଂଶୀଦାର ଭାବରେ ଏକାଠି ଛିଡା ହୋଇଛନ୍ତି । ବିଶ୍ୱର ଦୁଇଟି ସର୍ବବୃହତ ଗଣତନ୍ତ୍ର ଭାବରେ, ଆମେ ଆମର ନାଗରିକମାନଙ୍କ ପାଇଁ ଶାନ୍ତି ଏବଂ ସ୍ଥିରତା, ଆର୍ଥିକ ଅଭିବୃଦ୍ଧି ଏବଂ ସ୍ଥାୟୀ ବିକାଶକୁ ଆଧାର କରିବା ପାଇଁ ହାତ ମିଶାଇ କାମ କରୁଛୁ । “
ଭାରତ-ଇୟୁ ଚୁକ୍ତି ଅନୁସାରେ, ୟୁରୋପୀୟ ସଂଘର କେମିକାଲ୍ସ ଉପରେ ପ୍ରାୟ ସବୁ ଉତ୍ପାଦରେ ଟାରିଫ୍ ଶେଷ ହେବ । ସେହିପରି ଅପ୍ଟିକଲ, ମେଡିକାଲ ଏବଂ ସର୍ଜିକାଲ ଉପକରଣ ଉପରେ ଇୟୁର ୯୦ ପ୍ରତିଶତ ଉତ୍ପାଦ ପାଇଁ ଟାରିଫ୍ ସମାପ୍ତ ହେବ । ଏହା ସହିତ ଇୟୁ ମଦ ଉପରେ ଟାରିଫ୍ ହ୍ରାସ ହୋଇ ୫୦ ପ୍ରତିଶତ ହେବ ।
