ଲୋକେ କାହାକୁ ପ୍ରଧାନମନ୍ତ୍ରୀ ଭାବେ ବେଶି ପସନ୍ଦ କରନ୍ତି?,ମୋଦି ନା ଇନ୍ଦିରା ? ସର୍ଭେ ରିପୋର୍ଟରୁ ଏମିତି କିଛି ଜଣାପଡିଲା…
ନୂଆଦିଲ୍ଲୀ,୩୦।୧: ମନୁଷ୍ୟ ଜୀବନରେ କାହାକୁ କାହା ସହିତ ତୁଳନା କରିବା ଏକ ସାଧାରଣ କଥା କିନ୍ତୁ ଏଥିରୁ ବାଦପଡି ନାହାନ୍ତି ଜନନାୟକ ନେତା | ଆଜିର ସମୟରେ ସାଧାରଣରେ ପ୍ରାୟତଃ ବର୍ତ୍ତମାନର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ କାର୍ଯ୍ୟକାଳ ସମୟର ତୁଳନା କରିଥାନ୍ତି । ଏନେଇ ଇଣ୍ଡିଆ ଟୁଡେ-ସି ଭୋଟରଙ୍କ ‘ମୁଡ ଅଫ ଦି ନେସନ’ (MOTN) ସର୍ଭେ ଏକ ସର୍ଭେ କରିଥିଲା। ସର୍ଭେ ଅନୁସାରେ, ୫୦ ପ୍ରତିଶତ ଉତ୍ତରଦାତା ନରେନ୍ଦ୍ର ମୋଦିଙ୍କୁ ଦେଶର ଲୋକପ୍ରିୟ ପ୍ରଧାନମନ୍ତ୍ରୀ ଭାବରେ ନାମିତ କରିଥିଲେ, ଅନ୍ୟପଟେ,୧୨ ପ୍ରତିଶତ ଉତ୍ତରଦାତା ଇନ୍ଦିରା ଗାନ୍ଧୀ ଏବଂ ଅଟଳ ବିହାରୀ ବାଜପେୟୀଙ୍କୁ ସର୍ବୋତ୍ତମ ପ୍ରଧାନମନ୍ତ୍ରୀ ଭାବରେ ନାମିତ କରିଥିଲେ।
ସି-ଭୋଟର ସର୍ଭେରେ, ୧୧% ଉତ୍ତରଦାତା ଡକ୍ଟର ମନମୋହନ ସିଂହ ଏବଂ ୬% ଜବାହରଲାଲ ନେହେରୁଙ୍କୁ ସର୍ବୋତ୍ତମ ପ୍ରଧାନମନ୍ତ୍ରୀ ଭାବରେ ନାମିତ କରିଥିଲେ। ସେହିପରି ୫୫ % ଲୋକ ବର୍ତ୍ତମାନ ସମୟରେ ପ୍ରଧାନମନ୍ତ୍ରୀ ପାଇଁ ନରେନ୍ଦ୍ର ମୋଦିଙ୍କୁ ପ୍ରଧାମନ୍ତ୍ରୀ ପଦବୀ ପାଇଁ ଉପଯୁକ୍ତ ପ୍ରାର୍ଥୀ ଭାବେ ମନୋନୀତ କରିଥିଲେ | ଏହା ସହିତ ୨୭ ପ୍ରତିଶତ ଲୋକ ବର୍ତ୍ତମାନର ପ୍ରଧାନମନ୍ତ୍ରୀ ଭାବରେ ରାହୁଲ ଗାନ୍ଧୀଙ୍କ ଉପରେ ଆଶା ପ୍ରକାଶ କରିଥିଲେ।
ତେବେ ୨୦୨୪ ଲୋକ ସଭା ନିର୍ବାଚନ ପରେ, ଦେଶର ରାଜନୀତିରେ ଏକ ବଡ଼ ପ୍ରଭାବ ପକାଇଥିଲା। ଏହାର ମୁଖ୍ୟ କାରଣ ଥିଲା ଉତ୍ତର ପ୍ରଦେଶ ଏବଂ ମହାରାଷ୍ଟ୍ରରେ ବିଜେପିର ଖରାପ ପ୍ରଦର୍ଶନ। ଯେତେବେଳେ ଅଖିଳେଶ ଯାଦବ ଏବଂ ରାହୁଲ ଗାନ୍ଧୀଙ୍କ ଯୋଡ଼ି ଉତ୍ତର ପ୍ରଦେଶରେ ବିଜେପିକୁ ପରାସ୍ତ କଲେ, ସେତେବେଳେ ମନେ ହେଉଥିଲା ଯେ ରାଜନୈତିକ ଦୃଶ୍ୟପଟ କିଛି ଦିନ ମଧ୍ୟରେ ପରିବର୍ତ୍ତନ ହୋଇପାରେ, କିନ୍ତୁ ବିଜେପି ପୁଣିଥରେ ତାର ପୂର୍ବ ସ୍ଥିତିକୁ ଫେରିଥିଲା |
ଲୋକ ସଭା ନିର୍ବାଚନ ପରେ, ସମଗ୍ର ଦେଶର ଧ୍ୟାନ ମହାରାଷ୍ଟ୍ର ବିଧାନସଭା ନିର୍ବାଚନ ଉପରେ କେନ୍ଦ୍ରିତ ହୋଇଥିଲା, ଯେଉଁଠାରେ ବିଜେପିର ସ୍ଥିତି ଭଲ ନଥିଲା। କିନ୍ତୁ, ବିଜେପିର ନେତୃତ୍ୱାଧୀନ ମହାୟୁତି ଏହାର ତୃଣମୂଳ ସଂଗଠନକୁ ପୁଣିଥରେ ଏକାଠି କରିଥିଲା ଏବଂ ନିକଟରେ ବିଧାନସଭା ନିର୍ବାଚନରେ ଏତେ ଭଲ ପ୍ରଦର୍ଶନ କରିଥିଲା ଯେ, ବିରୋଧୀ ଦଳ ପାଖାପାଖି ମଧ୍ୟ ପହଞ୍ଚି ପାରିନଥିଲା । ସୂଚନାଯୋଗ୍ୟ, ଏହି ନିର୍ବାଚନରେ, ଭାଜପାି ୧୩୨ ଆସନ, ଶିବସେନା (ଶିନ୍ଦେ) ୫୭ ଆସନ ଏବଂ ଏନସିପି ୪୧ଟି ଆସନ ଜିତିଥିଲା।
ଗତ ବର୍ଷ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ପକ୍ଷରୁ କରାଯାଇଥିବା ଅପରେଶନ ସିନ୍ଦୂର ପରେ ପାକିସ୍ତାନ ସହିତ ଯୁଦ୍ଧବିରତି ପାଇଁ ନିଜକୁ ଶ୍ରେୟ ଦେଇଥିଲେ। ଏନେଇ ଭାରତ ବାରମ୍ବାର କହିଛି ଯେ, ଏଥିରେ ଆମେରିକାର କୌଣସି ଭୂମିକା ନାହିଁ। ବାରମ୍ବାର ମନା କରିବା ସତ୍ତ୍ୱେ ଟ୍ରମ୍ପ ନିଜକୁ ଏଥିପାଇଁ ଶ୍ରେୟ ଦେବାରେ ଜମା ଅବହେଳା କରୁ ନାହାନ୍ତି | ଆମେରିକୀୟ ରାଷ୍ଟ୍ରପତିଙ୍କ ଦାବି ପରେ, ବିରୋଧୀ ଦଳ କଂଗ୍ରେସ ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ କରିଥିଲା ଏବଂ ପାକିସ୍ତାନ ବିରୁଦ୍ଧରେ ଇନ୍ଦିରା ଗାନ୍ଧୀଙ୍କ ସହ ତାଙ୍କୁ ତୁଳନା କରିବା ଆରମ୍ଭ କରି ଦେଇଥିଲା | ଏନେଇ କଂଗ୍ରେସ ନେତା ରାହୁଲ ଗାନ୍ଧୀ କହିଥିଲେ, ‘ଇନ୍ଦିରା ଗାନ୍ଧୀ ଜଣେ ମହିଳା ଥିଲେ, କିନ୍ତୁ ତାଙ୍କ ପାଖରେ ଏହି ପୁରୁଷ (ନରେନ୍ଦ୍ର ମୋଦି)ଙ୍କଠାରୁ ଅଧିକ ଶକ୍ତି ଥିଲା। ସେ ବହୁତ ନିର୍ଭୀକ ଏବଂ ସାହସୀ ଥିଲେ | ନରେନ୍ଦ୍ର ମୋଦି ଜଣେ ଭୀରୁ, ସେ ଡରୁଛନ୍ତି। ୧୯୭୧ ମସିହାରେ, ଇନ୍ଦିରା ଗାନ୍ଧୀ ଆମେରିକାକୁ ଭୟ କରିନଥିଲେ, କି ସେମାନଙ୍କ ଆଗରେ ମୁଣ୍ଡ ମଧ୍ୟ ନୁଆଁଇ ନଥିଲେ।’ ତେବେ ଯଦି ନରେନ୍ଦ୍ର ମୋଦିଙ୍କର ସାହସ ଅଛି, ତେବେ ସେ ଦୃଢତାର ସହିତ କୁହନ୍ତୁ ଯେ, ଟ୍ରମ୍ପ ଅପରେଶନ ସିନ୍ଦୂର ବନ୍ଦ କରି ନଥିଲେ। ଆଉ ଏଥିରେ ଟ୍ରମ୍ପଙ୍କର କୌଣସି ପ୍ରକାରର ଭୂମିକା ନାହିଁ |
