କଣ ଏହି ମାଇଗ୍ରେନ୍ ସମସ୍ୟା? କିପରି ଏହାକୁ ଏଡାଇ ହେବ ଜାଣନ୍ତୁ…
ଗ୍ରୀଷ୍ମ ଋତୁ ଆରମ୍ଭ ହୋଇଗଲାଣି, ଏବଂ ତାପମାତ୍ରା ବୃଦ୍ଧି ସହିତ, ଅତ୍ୟଧିକ ଗରମ ଯୋଗୁଁ ହେଉଥିବା ଅନେକ ସମସ୍ୟା ମଧ୍ୟ ଦେଖାଦେଇଛି। ତେବେ ପାଗର ଏହି ହଠାତ୍ ପରିବର୍ତ୍ତନ ଅନେକ ସମସ୍ୟା ସୃଷ୍ଟି କରିପାରେ, ଯାହା ମଧ୍ୟରୁ ଗୋଟିଏ ହେଉଛି ମାଇଗ୍ରେନ୍।
ମାଇଗ୍ରେନ୍ ପୀଡିତ ବ୍ୟକ୍ତିଙ୍କ ପାଇଁ ପାଗ ପରିବର୍ତ୍ତନ ଏକ ଗମ୍ଭୀର ସମସ୍ୟା ହୋଇପାରେ। ପ୍ରାୟତଃ ଦେଖାଯାଏ ଯେ, ସକାଳ ସମୟ ଥଣ୍ଡା ଅନୁଭୂତ ହୋଇଥାଏ, କିନ୍ତୁ ଅପରାହ୍ନ ସୁଦ୍ଧା ପ୍ରବଳ ଗରମରେ ପରିଣତ ହୁଏ। ଏହି ତାପମାତ୍ରା ପରିବର୍ତ୍ତନ ଆମ ଶରୀରର ଆଭ୍ୟନ୍ତରୀଣ ସନ୍ତୁଳନକୁ ବିପର୍ଯ୍ୟସ୍ତ କରିଥାଏ, ଯାହା ଫଳରେ ମୁଣ୍ଡବିନ୍ଧା ହୋଇଥାଏ ।
ମୁଣ୍ଡବିନ୍ଧା ବୃଦ୍ଧି ପାଇବାର କାରଣ?ମ୍ୟାକ୍ସ ହସ୍ପିଟାଲ (ଦ୍ୱାରକା)ର ନ୍ୟୁରୋଲୋଜି ବିଭାଗର ମୁଖ୍ୟ ଡାକ୍ତର ଆନନ୍ଦ କୁମାର ସକ୍ସେନାଙ୍କୁ ଅନୁଯାୟୀ, ଏହାର ମୁଖ୍ୟ କାରଣ ହେଉଛି ଆମ ଶରୀରର ସମ୍ବେଦନଶୀଳତା। ସକାଳର ଥଣ୍ଡା ଶରୀରର ସ୍ନାୟୁଗୁଡ଼ିକୁ ସଙ୍କୁଚିତ କରିଦିଏ, ଏବଂ ଅପରାହ୍ନର ଗରମ ହଠାତ୍ ଭାବେ ସେଗୁଡ଼ିକୁ ପ୍ରସାରିତ କରିଦିଏ।
ତେବେ ସ୍ନାୟୁ ଆବେଗରେ ଏହି ଦ୍ରୁତ ପରିବର୍ତ୍ତନ ମାଇଗ୍ରେନ୍ ଯନ୍ତ୍ରଣାକୁ ତ୍ୱରାନ୍ୱିତ କରେ। ଏହା ବ୍ୟତୀତ, ବୃଦ୍ଧି ପାଉଥିବା ଗରମ ଯୋଗୁଁ ଶରୀରରେ ଜଳୀୟଅଂଶର ଅଭାବ ହୋଇପାରେ, ଯାହା ମାଇଗ୍ରେନର ଏକ ପ୍ରମୁଖ କାରଣ ହୋଇଥାଏ | ଏହାସହିତ ଆର୍ଦ୍ରତା ଏବଂ ବୃଦ୍ଧି ପାଉଥିବା ତାପମାତ୍ରା ମଧ୍ୟ ବ୍ୟକ୍ତିକୁ କ୍ଳାନ୍ତ କରିପାରେ, ଯାହା ଫଳରେ ଚିଡ଼ିଚିଡ଼ା ଏବଂ ନିଦ୍ରା ଅଭାବ ଧୀରେ ଧୀରେ ବୃଦ୍ଧି ପାଇଥାଏ ।
ଏହାକୁ ଏଡ଼ାଇବାର ଉପାୟ:ମାଇଗ୍ରେନର ପ୍ରଭାବକୁ କମାଇବା ଅତି ଛୋଟ ଛୋଟ ସତର୍କତାର ଆଵଶ୍ୟକତା ରହିଛି | ଡାକ୍ତର କିଛି ଛୋଟ କିନ୍ତୁ ଗୁରୁତ୍ୱପୂର୍ଣ୍ଣ କଥା ପ୍ରତି ଯତ୍ନ ନେବାକୁ ପରାମର୍ଶ ଦେଇଛନ୍ତି | ତେବେ କଣ ସେହି ପରାମର୍ଶ ଗୁଡିକ ଆସନ୍ତୁ ଜାଣିବା…
୧.ପ୍ରଚୁର ପାଣି ପିଅନ୍ତୁ: ଶୋଷ ଲାଗିବା ପର୍ଯ୍ୟନ୍ତ ଅପେକ୍ଷା କରନ୍ତୁ ନାହିଁ; ଦିନସାରା ଅଳ୍ପ ଅଳ୍ପ ମାତ୍ରାରେ ପାଣି ପିଅନ୍ତୁ। ଆପଣ ଲେମ୍ବୁ ପାଣି କିମ୍ବା ନଡ଼ିଆ ପାଣି ଭଳି ଇଲେକ୍ଟ୍ରୋଲାଇଟ୍ ଯୁକ୍ତ ପାନୀୟ ମଧ୍ୟ ପିଇପାରିବେ | ଶରୀର ପାଇଁ ଅତ୍ୟନ୍ତ ଲାଭପ୍ରଦ |
୨.ସୂର୍ଯ୍ୟ କିରଣକୁ ଏଡାନ୍ତୁ: ଅପରାହ୍ନର କଠୋର ସୂର୍ଯ୍ୟ କିରଣ ଏବଂ ଆଖିର ଚମକରୁ ନିଜକୁ ରକ୍ଷା କରିବା ପାଇଁ ସନଗ୍ଲାସ୍ ପିନ୍ଧନ୍ତୁ।
୩.ଆପଣଙ୍କର ନିତ୍ୟକର୍ମ ଠିକ ରଖନ୍ତୁ : ଠିକ୍ ସମୟରେ ଖାଦ୍ୟ ଖାଆନ୍ତୁ। ଖାଲି ପେଟ କିମ୍ବା ରକ୍ତ ଶର୍କରା କମ୍ ରହିବା ମୁଣ୍ଡବିନ୍ଧାକୁ ଆହୁରି ଅତ୍ୟଧିକ ବଢାଇପାରେ ।
୪.ଲେୟରିଂ କୌଶଳ: ଯଦି ଆପଣ ଥଣ୍ଡା ସକାଳେ ଘରୁ ବାହାରକୁ ଯାଉଛନ୍ତି, ତେବେ ଅପରାହ୍ନର ଗରମରେ ନିଜକୁ ଆରାମଦାୟକ ରଖିବା ପାଇଁ ହାଲୁକା ପୋଷାକ ସାଙ୍ଗରେ ରଖନ୍ତୁ।
୫.ଏକ ଡାଏରୀ ରଖନ୍ତୁ: ଯଦି ପାଗ ପରିବର୍ତ୍ତନ ହେଲେ ଆପଣଙ୍କର ପ୍ରାୟତଃ ମୁଣ୍ଡବିନ୍ଧା ହୁଏ, ତେବେ ତାହା ପୂର୍ବରୁ କେବେ ଏବଂ କାହିଁକି ଯନ୍ତ୍ରଣା ଆରମ୍ଭ ହୋଇଥିଲା ତାହା ଏକ ଡାଏରୀ ଲେଖିକି ରଖନ୍ତୁ। ଏହା ଆପଣଙ୍କୁ ଆପଣଙ୍କର ମୁଣ୍ଡବିନ୍ଧାର ଲକ୍ଷଣ ଗୁଡିକୁ ଚିହ୍ନଟ କରିବାରେ ସାହାଯ୍ୟ କରିବ।
ତେବେ ଡାକ୍ତର ମଧ୍ୟ ଏହା ପରାମର୍ଶ ଦେଇଛନ୍ତି ଯେ, ଯଦି ମାଇଗ୍ରେନ୍ ଯନ୍ତ୍ରଣା ବାରମ୍ବାର ହୁଏ କିମ୍ବା ଅସହ୍ୟ ହୁଏ, ତେବେ ଘରୋଇ ଉପଚାର ଉପରେ ଜମା ନିର୍ଭର କରନ୍ତୁ ନାହିଁ ଏବଂ ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ। ଜୀବନଶୈଳୀରେ ଛୋଟ ଛୋଟ ପରିବର୍ତ୍ତନ ଆଣିଲେ ଏହି ସମସ୍ୟାକୁ ଯଥେଷ୍ଟ ହ୍ରାସ କରାଯାଇପାରିବ।
