ଓଡ଼ିଶାରେ ଜମି ଚୁକ୍ତିକୁ ନେଇ ବିବାଦରେ ଫସିଛି ପର୍ଯ୍ୟଟନ ଯୋଜନା
ସମ୍ବଲପୁର,୩୦।୪: ହୀରାକୁଦ ଜଳଭଣ୍ଡାର ପାଖରେ ପ୍ରସ୍ତାବିତ ପର୍ଯ୍ୟଟନ ପ୍ରକଳ୍ପ ବିବାଦରେ ଫସି ରହିଛି। ସ୍ଥାନୀୟ ପ୍ରତିନିଧିମାନେ ଦାବି କରିଛନ୍ତି ଯେ କମ ମୂଲ୍ୟରେ ତାରକା- ହୋଟେଲ ନିର୍ମାଣ ପାଇଁ ହୀରାକୁଦ ଜଳଭଣ୍ଡାର ଚାରିପାଖରେ ସମ୍ବଲପୁର, ଝାରସୁଗୁଡ଼ା ଏବଂ ବରଗଡ଼ ଜିଲ୍ଲାରେ ଥିବା ୨୦୦୦ ଏକର ଜମିକୁ ହସ୍ତାନ୍ତର କରାଯାଉଛି।
ଏପ୍ରିଲ ୨୪ ତାରିଖରେ ଓଡ଼ିଶା ଶିଳ୍ପ ଭିତ୍ତିଭୂମି ବିକାଶ ନିଗମ (ଆଇଡକୋ) ଦ୍ୱାରା ସମ୍ବଲପୁର ସଦର ତହସିଲଦାରଙ୍କୁ ଜାରି କରାଯାଇଥିବା ଏକ ସରକାରୀ ସୂଚନାରୁ ଏହା ନିଶ୍ଚିତ ହୋଇଛି ଯେ, ପର୍ଯ୍ୟଟନ ପ୍ରକଳ୍ପ ପାଇଁ ପାଞ୍ଚଟି ଗ୍ରାମର ୧୨୭.୦୮ ଏକର ସରକାରୀ ଜମି ଅଧିଗ୍ରହଣ ପାଇଁ ୪୨.୬୦ କୋଟି ଟଙ୍କା ଜମା କରାଯାଇଛି। ଏହି ଜମିଗୁଡ଼ିକ ବଲବାସପୁର, ତାଲାବ, କିଲାସମା, ଲାରାବଙ୍ଗା ଏବଂ ସୋଲବଣ୍ଟା ଗ୍ରାମରେ ଅବସ୍ଥିତ।
ଜମିର ମୂଲ୍ୟ ପ୍ରତି ଦଶମିକ ୩୬,୩୦୭.୫୦ ଟଙ୍କା ରଖାଯାଇଛି, ଯାହା ପ୍ରାୟ ଏକର ପିଛା ୩୩-୩୬ ଲକ୍ଷ ଟଙ୍କା ହେବ। ତଥାପି, ସ୍ଥାନୀୟ ନେତାମାନେ ଦାବି କରିଛନ୍ତି ଯେ, ଏହା ପ୍ରଚଳିତ ବଜାର ଦରଠାରୁ ବହୁତ କମ୍। “ହୀରାକୁଦ ନିକଟରେ ଜମି ସହଜରେ ପ୍ରତି ଦଶମିକ ୧ ଲକ୍ଷ ଟଙ୍କାରୁ ଅଧିକ ବିକ୍ରି ହୁଏ, ଏପରିକି ପ୍ରତି ଏକର ୧ କୋଟି ଟଙ୍କା ଛୁଇଁଥାଏ। ଏତେ କମ୍ ମୂଲ୍ୟରେ ଏହାକୁ କିପରି ହସ୍ତାନ୍ତର କରାଯାଉଛି?” ତାଲାବ ସରପଞ୍ଚ ବିଷ୍ଣୁ ପ୍ରଧାନ ପ୍ରଶ୍ନ କରିଛନ୍ତି।
ଅନ୍ୟପଟେ, ଗ୍ରାମବାସୀଙ୍କ କହିବା ଅନୁସାରେ, ବାଣିଜ୍ୟିକ ସ୍ୱାର୍ଥ ପାଇଁ ମୂଲ୍ୟବାନ ପ୍ରାକୃତିକ ଏବଂ ସାମୁହିକ ସମ୍ପଦକୁ ବଳି ଦିଆଯାଉଛି। ଏହା ବ୍ୟତୀତ, ପୂର୍ବରୁ ବିସ୍ଥାପିତ ହୋଇଥିବା ପରିବାରର ସ୍ଥିତି ଏପର୍ଯ୍ୟନ୍ତ ସମାଧାନ ହୋଇନାହିଁ ନଥିଲା ବେଳେ ଏବେ ପୁଣିଥରେ ବିସ୍ଥାପିତ ପ୍ରକ୍ରିୟା ଆରମ୍ଭ ହୋଇଛି। । କିଲାସମାରେ, ପ୍ରାୟ ୭୦ ପ୍ରତିଶତ ବାସିନ୍ଦା ହୀରାକୁଦ-ବିସ୍ଥାପିତ ପରିବାର ଅଟନ୍ତି, ଯେଉଁମାନେ ସ୍ଥାନୀୟ ଲୋକଙ୍କ କହିବା ଅନୁସାରେ, ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ଜମି ଅଧିକାର ପାଇନାହାଁନ୍ତି ଏବଂ ପଟା ବିନା ଜମି ଚାଷ କରୁଛନ୍ତି।
ସରକାର ଙ୍କ ଏନେଇ କୌଣସି ଚିନ୍ତା ନଥିଲା ଭଳି ଲାଗୁଛି। “ବଡ଼ ବଡ଼ ହୋଟେଲଗୁଡ଼ିକୁ ଜମି ଦେବା ପରିବର୍ତ୍ତେ, ସରକାର ଦୀର୍ଘ ବର୍ଷ ଧରି ଅନିଶ୍ଚିତତାରେ ରହୁଥିବା ବିସ୍ଥାପିତ ପରିବାରଗୁଡ଼ିକୁ ନ୍ୟାୟ ପ୍ରଦାନ କରିବା ଉଚିତ,” ବୋଲି କିଲାସମା ସରପଞ୍ଚ ଗୌରୀ ବାରିକ କହିଛନ୍ତି।
ଗ୍ରାମବାସୀମାନେ ଏହା ମଧ୍ୟ ଅଭିଯୋଗ କରିଛନ୍ତି ଯେ, ପର୍ଯ୍ୟଟନ ପ୍ରକଳ୍ପ ପାଇଁ ହସ୍ତାନ୍ତରିତ ହେଉଥିବା ଜମିର ଏକ ଗୁରୁତ୍ୱପୂର୍ଣ୍ଣ ଅଂଶ ଚାଷ ଜମି, ଯାହା ଜୀବନ ଜୀବିକା ହାନିର ଆଶଙ୍କା ସୃଷ୍ଟି କରୁଛି। ସ୍ଥାନୀୟ ସ୍କୁଲଗୁଡ଼ିକର ଉନ୍ନତିକରଣ ଏବଂ ସମବାୟ ପ୍ରତିଷ୍ଠାନ ସ୍ଥାପନ ସମେତ ମୌଳିକ ବିକାଶମୂଳକ ସହାୟତା ପାଇଁ ଦାବି କରାଯାଇଛି, କିନ୍ତୁ ଗ୍ରାମବାସୀମାନେ ଅଭିଯୋଗ କରିଛନ୍ତି ଯେ ଏହି ଚିନ୍ତାଗୁଡ଼ିକୁ ଅଣଦେଖା କରାଯାଇଛି।
ତେବେ ଆଗାମୀ ଦିନରେ ସମ୍ବଲପୁର ଜିଲ୍ଲା ଅନ୍ତର୍ଗତ ୧୦୦୦ ଏକର ଜମି ପାଖାପାଖି ଏହି ସମାନ ମୂଲ୍ୟରେ ଗୋଟିଏ ପରେ ଗୋଟିଏ ହୋଟେଲ କିମ୍ବା ବ୍ୟବସାୟିକ ସଂସ୍ଥାମାନଙ୍କୁ ଏହି ପ୍ରକ୍ରିୟାରେ ଟେକିଦିଆଯିବ ବୋଲି ଆଲୋଚନା ହେଉଛି।ବିଶେଷଜ୍ଞଙ୍କ କହିବା ଅନୁସାରେ, ଖୋଲା ବଜାରରେ ହୀରାକୁଦ ଜଳଭଣ୍ଡାର ନିକଟସ୍ଥ ଏହି ଜମିର ମୂଲ୍ୟ ଡେସିମିଲ ପିଛା ଲକ୍ଷାଧିକ ଟଙ୍କା ହେବ। କିନ୍ତୁ, ଏହି ବଡ଼ ହୋଟେଲ ମାଲିକମାନେ ନାମମାତ୍ର ମୂଲ୍ୟରେ ତାହା ପାଇବେ।
କିଛିଦିନ ପୂର୍ବରୁ ହୀରାକୁଦ ଜଳଭଣ୍ଡାର ନିକଟରେ ହୋଟେଲ କରିବା ପାଇଁ ୫ ତାରକା ହୋଟେଲ ମାଲିକ ସମ୍ବଲପୁରକୁ ଆସି ହୀରାକୁଦ ଜଳଭଣ୍ଡାର ଜମି ଗୁଡ଼ିକ ଦେଖି ଯାଇଥିଲେ। ତେବେ କେଉଁ ହୋଟେଲମାନଙ୍କୁ ଏହି ଜମି ଦିଆଯିବ ତାହା ପର୍ଯ୍ୟଟନ ବିଭାଗ ନିଷ୍ପତ୍ତି ନେବ ବୋଲି ସମ୍ବଲପୁର ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି।
