କକ୍ରୋଚ୍ ଜନତା ପାର୍ଟିକୁ ନେଇ ପ୍ରଶାନ୍ତ କିଶୋରଙ୍କ ବଡ଼ ବୟାନ! କହିଲେ- ‘୨ କୋଟି ଲୋକଙ୍କ ଅସନ୍ତୋଷ ସରକାର ପାଇଁ ଚିନ୍ତାର ବିଷୟ’
ଭାରତୀୟ ରାଜନୀତିରେ “କକ୍ରୋଚ୍ ଜନତା ପାର୍ଟି” (CJP)କୁ ନେଇ ଚର୍ଚ୍ଚା ଜୋର ଧରିଥିବାବେଳେ, ଏହାକୁ ନେଇ ଜନ ସ୍ୱରାଜ ଦଳର ପ୍ରତିଷ୍ଠାତା ପ୍ରଶାନ୍ତ କିଶୋର ପ୍ରଥମଥର ପ୍ରତିକ୍ରିୟା ରଖିଛନ୍ତି। ଝାଞ୍ଜରପୁରରେ ଗଣମାଧ୍ୟମ ସହ କଥାହେଉଥିବା ବେଳେ ସେ କହିଛନ୍ତି ଯେ, CJP କୌଣସି ସରକାରୀ ରାଜନୈତିକ ଦଳ ନୁହେଁ, ବରଂ ଏହାକୁ କେହି ଜଣେ ଅନଲାଇନ୍ ଅଭିଯାନ ଭାବେ ଆରମ୍ଭ କରିଥିଲେ। ତେବେ ଇନଷ୍ଟାଗ୍ରାମରେ ପ୍ରାୟ ୨ କୋଟି ଲୋକ ଏହାକୁ ଫଲୋ କରୁଥିବାରୁ ଏହା ଏବେ ଜାତୀୟ ଚର୍ଚ୍ଚାର ବିଷୟ ପାଲଟିଛି।
ପ୍ରଶାନ୍ତ କିଶୋର କହିଛନ୍ତି, “ଏହାର କୌଣସି ନୀତି କିମ୍ବା ନିର୍ଦ୍ଦିଷ୍ଟ ନେତା ନାହାନ୍ତି। କିନ୍ତୁ ଯଦି ଏତେ ସଂଖ୍ୟକ ଲୋକ ଏକ ମଞ୍ଚରେ ଆସି ସରକାରଙ୍କ ବିରୋଧରେ ନିଜର ମତ ପ୍ରକାଶ କରୁଛନ୍ତି, ତେବେ ଏହା ସରକାର ପାଇଁ ଚିନ୍ତାର ବିଷୟ ହେବା ଉଚିତ।” ସେ କହିଛନ୍ତି, ଏହା ସ୍ପଷ୍ଟ କରୁଛି ଯେ ବର୍ତ୍ତମାନର ବ୍ୟବସ୍ଥାକୁ ନେଇ ସମାଜର ଏକ ବଡ଼ ଅଂଶ ଅସନ୍ତୁଷ୍ଟ ଅଛନ୍ତି।
ଅନ୍ୟପଟେ ବାଙ୍କିପୁର ଆସନରୁ ନିର୍ବାଚନ ଲଢ଼ିବାକୁ ନେଇ ପ୍ରଶ୍ନର ଉତ୍ତରରେ ପିକେ କହିଛନ୍ତି ଯେ ଜନ ସ୍ୱରାଜ ଏଥର ବାଙ୍କିପୁରରୁ ନିର୍ବାଚନ ଲଢ଼ିବ ଏବଂ ବିଜେପିକୁ ଟକ୍କର ଦେବ। ସେ କହିଛନ୍ତି, “ବାଙ୍କିପୁରର ଲୋକଙ୍କର ଆମ ଉପରେ ଭରସା ଅଛି। ଦଳ ଏଥର ଜଣେ ଦୃଢ଼ ପ୍ରାର୍ଥୀ ଦେବ।” ତେବେ ପ୍ରାର୍ଥୀଙ୍କ ନାମ ଦଳ ପରେ ଘୋଷଣା କରିବ ବୋଲି ସେ ସୂଚନା ଦେଇଛନ୍ତି।
