୨ ମାସ ହେବ ମିଳିନାହିଁ ବାର୍ଦ୍ଧକ୍ୟ ଭତ୍ତା,ବଞ୍ଚିତ ହିତାଧିକାରୀ ବ୍ଲକ ପ୍ରଶାସନ ର ଦ୍ୱାରସ୍ଥ।
କଳାହାଣ୍ଡି,୨୫/୦୫
ବାବୁ ୨ ମାସ ହେଲା ଭତ୍ତା ମିଳୁନାହିଁ, ଟାଣଖରା ରେ ବଳ ପାଉନାହିଁ,ଆଖି କୁ ଭଲ ଦେଖା ଯାଉନାହିଁ, ଔଷଧ କିଣିବାକୁ ମଧ୍ୟ କାଣି କଉଡ଼ି ଟିଏ ନାହିଁ,ଏମିତି କିଛି କୋହଭରା କଣ୍ଠ ରେ ନିଜର ଦୁଃଖ ଯନ୍ତ୍ରଣା ସହ ୨ ମାସ ହେବ ବ୍ୟାଙ୍କ ଖାତା ରେ ଭତ୍ତା ଟଙ୍କା ପଡୁନାହିଁ ଓ ନିଜ ପଞ୍ଚାୟତ ରେ ହାତାହାତି ଟଙ୍କା ମିଳୁ ବୋଳି ଅଭିଯୋଗ ନେଇ ଗମ୍ଭାରୀଗୁଡା ପଞ୍ଚାୟତ ର ହିତାଧିକାରୀ ବୃଦ୍ଧବୃଦ୍ଧା ମାନେ କୋକସରା ବ୍ଲକ ପ୍ରଶାସନ ର ଦ୍ୱାରସ୍ଥ ହୋଇ ଦୁଃଖ ଜଣାଇଛନ୍ତି। ତେବେ ବିଡ଼ିଓ ଅନୁପସ୍ଥିତ ଥିବା କାରଣରୁ ମୁଖ୍ୟ କିରାଣୀ ଓ ହିସାବ ରକ୍ଷକ ଅଧିକାରୀ ଙ୍କୁ ସେମାନଙ୍କ ଲିଖିତ ଦାବିପତ୍ର ପ୍ରଦାନ କରି ନିରାଶ ହୋଇ ଫେରିଛନ୍ତି।
ସୂଚନା ମତେ ଗତ ଅପ୍ରେଲ ଓ ଚଳିତ ମେ ମାସ ର ଡିବିଟି ମାଧ୍ୟମରେ ହିତାଧିକାରୀଙ୍କ ବ୍ୟାଙ୍କ ଜମାଖାତା ରେ ମିଳୁଥିବା ବାର୍ଦ୍ଧକ୍ୟ ଓ ବିଧବା ଭତ୍ତା ଟଙ୍କା ମିଳିନାହିଁ। ଫଳରେ ଟାଣ ଖରା ରେ ନିଜ ଗ୍ରାମ ରେ ଥିବା ଜନସେବା କେନ୍ଦ୍ର ଓ ବ୍ୟାଙ୍କ କୁ ଭତ୍ତା ଟଙ୍କା ଉଠାଇବା ପାଇଁ ବାରମ୍ବାର ଯାଇ ଟଙ୍କା ନଥିବା ଶୁଣି ନିରାଶ ହୋଇ ଶେଷରେ ବ୍ଲକ ପ୍ରଶାସନ ର ଦ୍ୱାରସ୍ଥ ହୋଇଥିବା ଦେଖିବାକୁ ମିଳିଛି। କୋକସରା ବ୍ଲକ ୨୨ ପଞ୍ଚାୟତ ରେ ମୋଟ ୧୭୦୦୦ ହଜାର ହିତାଧିକାରୀ ରହିଥିବା ବେଳେ ୧୧,୧୩୩ ଜଣ ହିତାଧିକାରୀ ଙ୍କୁ ହାତାହାତି ଭତ୍ତା ପ୍ରଦାନ ହେଉଛି ଓ ଡିବିଟି ମାଧ୍ୟମରେ ୬୯୩୫ ଜଣ ହିତାଧିକାରୀ ଙ୍କୁ ଭତ୍ତା ମିଳୁଥିବା ସୂଚନା ମିଳିଛି। ତେବେ ଏନେଇ କୋକସରା ବ୍ଲକ ଭାରପ୍ରାପ୍ତ ସାମାଜିକ ସୁରକ୍ଷା ଅଧିକାରୀ ସୌନ୍ଦର୍ଯ୍ୟ ନାଏକ ଙ୍କ ପ୍ରତିକ୍ରିୟା ନେବାରୁ ୨୮/୦୪/୨୬ ରେ ମିଳିଥିବା ବିଭାଗୀୟ ଚିଠି ଅନୁସାରେ ଡିବିଟି ଜରିଆରେ ଭତ୍ତା ପାଉଥିବା ହିତାଧିକାରୀ ଙ୍କୁ ଅପ୍ରେଲ,ମେ ୨ ମାସ ର ଭତ୍ତା ଟଙ୍କା ଚଳିତ ମାସ ରେ ଦିଆଯିବ ନେଇ ସୂଚାଇ ଦିଆଯାଇଛି। ଏଣୁ ଭତ୍ତା ସେମାନଙ୍କ ବ୍ୟାଙ୍କ ଆକାଉଣ୍ଟ ରେ ଏହି ମାସ ଶେଷ ସୁଦ୍ଧା ଜମା ହେବ ବୋଳି କହିଛନ୍ତି।
