ନୋଏଡାର ହାଇରାଇଜ୍ ସୋସାଇଟିରେ ଭୟଙ୍କର ଅଗ୍ନିକାଣ୍ଡ, ୧୨ତମ ମହଲାରୁ ବ୍ୟାପିଲା ନିଆଁ
ଦିଲ୍ଲୀ ସଂଲଗ୍ନ ନୋଏଡାର ସେକ୍ଟର-୭୫ ସ୍ଥିତ ଆଇଭି କାଉଣ୍ଟି (IVY County) ହାଇରାଇଜ୍ ଆବାସିକ ସୋସାଇଟିରେ ଗୁରୁବାର ଏକ ଭୟଙ୍କର ଅଗ୍ନିକାଣ୍ଡ ଘଟିଛି। ସୋସାଇଟିର ଏକ ବହୁତଳ କୋଠାର ୧୨ତମ ମହଲାରେ ଥିବା ଏକ ଫ୍ଲାଟ୍ରେ ହଠାତ୍ ନିଆଁ ଲାଗିଥିବା ବେଳେ କିଛି ମିନିଟ୍ ମଧ୍ୟରେ ଏହା ଭୟାବହ ରୂପ ନେଇଥିଲା।
ନିଆଁ ଏତେ ତୀବ୍ର ଥିଲା ଯେ ଫ୍ଲାଟ୍ର ଝରକା ଓ ବାଲକୋନିରୁ ଉଚ୍ଚ ଉଚ୍ଚ ଅଗ୍ନିଶିଖା ଏବଂ କଳା ଧୂଆଁର ଗୁବାର ଦୂରରୁ ମଧ୍ୟ ଦେଖିବାକୁ ମିଳିଥିଲା। ଦେଖୁଦେଖୁ ନିଆଁ ନିକଟବର୍ତ୍ତୀ ଅନେକ ଫ୍ଲାଟ୍କୁ ମଧ୍ୟ ବ୍ୟାପି ଯାଇଥିଲା। ଘଟଣା ପରେ ସମଗ୍ର ସୋସାଇଟିରେ ଆତଙ୍କ ଓ ଅଫରାତଫରୀ ସୃଷ୍ଟି ହୋଇଥିଲା।
ଖବର ପାଇବା ପରେ ଦମକଳ ବାହିନୀର ଏକାଧିକ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବା ସହ ଉଦ୍ଧାର କାର୍ଯ୍ୟ ଆରମ୍ଭ କରିଛି। ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବା ବେଳେ କୌଣସି ଜୀବନହାନି ଘଟିଛି କି ନାହିଁ ସେନେଇ ଅଧିକୃତ ସୂଚନା ମିଳିନାହିଁ। ପ୍ରଶାସନ ପକ୍ଷରୁ ସ୍ଥାନୀୟ ଲୋକଙ୍କୁ ସତର୍କ ରହିବାକୁ ଏବଂ ଗୁଜବରେ ବିଶ୍ୱାସ ନ କରିବାକୁ ପରାମର୍ଶ ଦିଆଯାଇଛି।
