ଫିଲିପାଇନ୍ସରେ ୭.୮ ତୀବ୍ରତାର ଭୂମିକମ୍ପ, ସୁନାମି ସତର୍କତା ଜାରି
ଫିଲିପାଇନ୍ସର ଦକ୍ଷିଣ ମିଣ୍ଡାନାଓ ଅଞ୍ଚଳରେ ସୋମବାର ସକାଳେ ୭.୮ ତୀବ୍ରତାର ଏକ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଆମେରିକା ଭୂତତ୍ତ୍ୱ ସର୍ଭେ (USGS) ଅନୁସାରେ, ସ୍ଥାନୀୟ ସମୟ ସକାଳ ପ୍ରାୟ ୭ଟା ୩୭ ମିନିଟ୍ରେ ଏହି ଭୂମିକମ୍ପ ଘଟିଥିଲା। ଏହାର କେନ୍ଦ୍ରସ୍ଥଳ ଭୂପୃଷ୍ଠରୁ ପ୍ରାୟ ୩୫ କିଲୋମିଟର ଗଭୀରରେ ଥିଲା। ଭୂମିକମ୍ପ ପରେ ଫିଲିପାଇନ୍ସ, ଇଣ୍ଡୋନେସିଆ ଏବଂ ଜାପାନରେ ସୁନାମି ସତର୍କତା ଜାରି କରାଯାଇଛି।
ଫିଲିପାଇନ୍ସର ଭୂକମ୍ପ ବିଜ୍ଞାନ ସଂସ୍ଥା (Phivolcs) କହିଛି ଯେ, ସାରାଙ୍ଗାନି ପ୍ରଦେଶର ଜେନେରାଲ ସାଣ୍ଟୋସ ସିଟି ଉପକୂଳ ନିକଟରେ ଏହି ଭୂମିକମ୍ପର କେନ୍ଦ୍ରସ୍ଥଳ ଥିଲା। ସମୁଦ୍ର କୂଳବର୍ତ୍ତୀ ଅଞ୍ଚଳର ଲୋକମାନଙ୍କୁ ତୁରନ୍ତ ଉଚ୍ଚ ସ୍ଥାନକୁ ଯିବାକୁ ସତର୍କ କରାଯାଇଛି। ଆମେରିକା ସୁନାମି ସତର୍କତା ବ୍ୟବସ୍ଥା ଅନୁସାରେ, କିଛି ଅଞ୍ଚଳରେ ୧ରୁ ୩ ମିଟର ଉଚ୍ଚତାର ସୁନାମି ତରଙ୍ଗ ସୃଷ୍ଟି ହୋଇପାରେ।
ଭୂମିକମ୍ପ ପରେ ଜେନେରାଲ ସାଣ୍ଟୋସ ସହରରୁ ଆସିଥିବା ଚିତ୍ରରେ କିଛି ଘର ଏବଂ ଦୋକାନ କ୍ଷତିଗ୍ରସ୍ତ ହୋଇଥିବା ଦେଖାଯାଇଛି। ଫିଲିପାଇନ୍ସ ରାଷ୍ଟ୍ରପତି ଫର୍ଡିନାଣ୍ଡ ମାର୍କୋସ ଜୁନିୟର ଉଦ୍ଧାର ଓ ସ୍ଥାନାନ୍ତର କାର୍ଯ୍ୟ ତୁରନ୍ତ ଆରମ୍ଭ କରିବାକୁ ସମ୍ପୃକ୍ତ ସରକାରୀ ସଂସ୍ଥାଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ତେବେ ବର୍ତ୍ତମାନ ସୁଦ୍ଧା କୌଣସି ମୃତାହତ ସମ୍ପର୍କିତ ସୂଚନା ମିଳିନାହିଁ।
