H-1B ଭିସା ଶୁଳ୍କ ରଦ୍ଦ ପରେ କ୍ଷୁବ୍ଧ ଟ୍ରମ୍ପ, କହିଲେ- ‘ଏହି ବିଚାରପତିମାନେ ଦେଶର କ୍ଷତି କରୁଛନ୍ତି’
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ H-1B ଭିସା ପାଇଁ ଲାଗୁ କରିଥିବା 1 ଲକ୍ଷ ଡଲାର ଶୁଳ୍କକୁ ଫେଡେରାଲ୍ କୋର୍ଟ ରଦ୍ଦ କରିବା ପରେ ତୀବ୍ର ପ୍ରତିକ୍ରିୟା ଦେଇଛନ୍ତି। କୋର୍ଟର ଏହି ରାୟକୁ ନେଇ ସେ କହିଛନ୍ତି ଯେ, “ଫେଡେରାଲ୍ ବିଚାରପତିମାନେ ଆମକୁ ବହୁତ ଅସୁବିଧାରେ ପକାଉଛନ୍ତି। କୋର୍ଟ ବ୍ୟବସ୍ଥାରେ ଯାହା ଚାଲିଛି ତାହା ସତରେ ପାଗଳାମି। ସେମାନେ ଦେଶର ଭୟଙ୍କର କ୍ଷତି କରୁଛନ୍ତି।”
ବୋଷ୍ଟନର ଆମେରିକୀୟ ଜିଲ୍ଲା ଜଜ୍ ଲିଓ ସୋରୋକିନ ଟ୍ରମ୍ପ ପ୍ରଶାସନର ଏହି ନିଷ୍ପତ୍ତିକୁ ବେଆଇନ କର ବୋଲି ରାୟ ଦେଇଥିଲେ। ତାଙ୍କ କହିବା ଅନୁସାରେ, କଂଗ୍ରେସର ଅନୁମତି ବିନା ରାଷ୍ଟ୍ରପତି ଏଭଳି କର ଲାଗୁ କରିପାରିବେ ନାହିଁ। ଏହି ମାମଲାରେ 20 ଜଣ ଡେମୋକ୍ରାଟ ରାଜ୍ୟର ଆଟର୍ଣ୍ଣି ଜେନେରାଲ୍ ଆପତ୍ତି ଉଠାଇ ଆଦାଲତର ଦ୍ୱାରସ୍ଥ ହୋଇଥିଲେ।
ଗତ ସେପ୍ଟେମ୍ବରରେ ଟ୍ରମ୍ପ ପ୍ରଶାସନ H-1B ଭିସା ଶୁଳ୍କକୁ ହଠାତ୍ 1 ଲକ୍ଷ ଡଲାରକୁ ବୃଦ୍ଧି କରିଥିଲା। ଏହା ପୂର୍ବରୁ ଏହି ଶୁଳ୍କ ପ୍ରାୟ 2,000ରୁ 5,000 ଡଲାର ମଧ୍ୟରେ ଥିଲା। ଏହି ବୃଦ୍ଧି ପରେ H-1B ଭିସା ଆବେଦନରେ ବଡ଼ ହ୍ରାସ ଦେଖାଯାଇଥିଲା। ଆମେରିକୀୟ ଟେକ୍ କମ୍ପାନୀଗୁଡ଼ିକ ବିଦେଶୀ ଦକ୍ଷ କର୍ମଚାରୀଙ୍କୁ ନିଯୁକ୍ତି ପାଇଁ H-1B ଭିସା ଉପରେ ବହୁତ ନିର୍ଭର କରନ୍ତି।
କୋର୍ଟଙ୍କ ରାୟ ପରେ H-1B ଭିସା ଧାରୀ ଏବଂ ଆମେରିକାରେ ଚାକିରି ଆଶା ରଖିଥିବା ହଜାର ହଜାର ବିଦେଶୀ ପେଶାଦାରଙ୍କ ମଧ୍ୟରେ ଆଶ୍ୱସ୍ତି ଦେଖାଦେଇଛି। ଭାରତୀୟ IT କ୍ଷେତ୍ର ପାଇଁ ମଧ୍ୟ ଏହି ରାୟକୁ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି, କାରଣ H-1B ଭିସା ପାଇଥିବା ବିଦେଶୀ କର୍ମଚାରୀଙ୍କ ମଧ୍ୟରେ ଭାରତୀୟଙ୍କ ସଂଖ୍ୟା ସର୍ବାଧିକ।
