‘ଦିଦି ସବୁ ସମାଧାନ କରିଦେବେ, କଲ୍ୟାଣ କେଉଁଠି ଯିବେନି’: କୀର୍ତ୍ତି ଆଜାଦଙ୍କ ବୟାନକୁ ନେଇ ରାଜନୈତିକ ଚର୍ଚ୍ଚା ଜୋରଦାର
ତୃଣମୂଳ କଂଗ୍ରେସ (ଟିଏମସି) ଭିତରେ ବର୍ତ୍ତମାନ ଅସନ୍ତୋଷ ଏବଂ ମତଭେଦକୁ ନେଇ ରାଜନୈତିକ ମହଲରେ ଚର୍ଚ୍ଚା ବଢ଼ିଛି। ଦଳର ବରିଷ୍ଠ ନେତା ତଥା ସାଂସଦ କଲ୍ୟାଣ ବାନାର୍ଜୀଙ୍କ ସମ୍ପ୍ରତିକ ବୟାନ ପରେ ଟିଏମସି ଭିତରେ ଫାଟ ସୃଷ୍ଟି ହୋଇଥିବା ନେଇ ଅନେକ କଳ୍ପନାଜଳ୍ପନା ଆରମ୍ଭ ହୋଇଛି। ଏହି ପରିପ୍ରେକ୍ଷୀରେ ଦଳର ଅନ୍ୟତମ ସାଂସଦ କୀର୍ତ୍ତି ଆଜାଦ ମମତା ବାନାର୍ଜୀଙ୍କ ନେତୃତ୍ୱ ଉପରେ ଭରସା ପ୍ରକାଶ କରି ସମସ୍ତ ବିବାଦର ସମାଧାନ ହେବ ବୋଲି କହିଛନ୍ତି।
କୀର୍ତ୍ତି ଆଜାଦ କହିଛନ୍ତି ଯେ, କଲ୍ୟାଣ ବାନାର୍ଜୀ ଦଳର ଜଣେ ଯୋଦ୍ଧା ଏବଂ ଆରମ୍ଭରୁ ମମତା ବାନାର୍ଜୀଙ୍କ ସହ ରହିଆସିଛନ୍ତି। ସେ କେବେ ଦଳ ଛାଡ଼ିବେ ନାହିଁ। ତାଙ୍କ ମତରେ କଲ୍ୟାଣ ଜଣେ ଭାବପ୍ରବଣ ବ୍ୟକ୍ତି ଏବଂ ତାଙ୍କ ଭାବନାକୁ ସମ୍ମାନ ଦିଆଯିବା ଉଚିତ। ମମତା ବାନାର୍ଜୀ ଖୁବ୍ ଶୀଘ୍ର ତାଙ୍କ ସହ ଆଲୋଚନା କରି ବିବାଦର ସମାଧାନ କରିଦେବେ ବୋଲି ସେ ଆଶାବାଦୀ ଅଛନ୍ତି।
ସମ୍ପ୍ରତି କଲ୍ୟାଣ ବାନାର୍ଜୀ ଦଳର ଜାତୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କୁ ନେଇ କଠୋର ମନ୍ତବ୍ୟ ଦେଇଥିଲେ। ସେ ଅଭିଯୋଗ କରିଥିଲେ ଯେ ଦଳ ଭିତରେ କିଛି ନିଷ୍ପତ୍ତି ଏକପାଖିଆ ଭାବେ ନିଆଯାଉଛି ଏବଂ ଅଭିଷେକଙ୍କ ଶୈଳୀ ସହ ସେ ସହମତ ନୁହଁନ୍ତି। ତେବେ ସେ ମମତା ବାନାର୍ଜୀଙ୍କ ପ୍ରତି ନିଜର ସମର୍ଥନ ଅବ୍ୟାହତ ରହିବ ବୋଲି ସ୍ପଷ୍ଟ କରିଛନ୍ତି। ଏହି ଘଟଣା ପରେ ଟିଏମସିର ଆଭ୍ୟନ୍ତରୀଣ ରାଜନୀତିକୁ ନେଇ ଚର୍ଚ୍ଚା ଜୋର ଧରିଥିବା ବେଳେ ଦଳୀୟ ନେତୃତ୍ୱ ପରିସ୍ଥିତିକୁ ସମ୍ଭାଳିବାକୁ ଉଦ୍ୟମ ଚଳାଇଛି।
