ବଞ୍ଚି ଯାଇଛନ୍ତି, କିନ୍ତୁ ଭୁଲିପାରୁନାହାନ୍ତି ଦୁର୍ଘଟଣାର ଦୁଃସ୍ୱପ୍ନ; ଏୟାର ଇଣ୍ଡିଆ ବିମାନ ଦୁର୍ଘଟଣାର ଏକମାତ୍ର ଜୀବିତ ଯାତ୍ରୀଙ୍କ ଯନ୍ତ୍ରଣା
ଏୟାର ଇଣ୍ଡିଆର AI-171 ବିମାନ ଦୁର୍ଘଟଣାର ଏକ ବର୍ଷ ପୂର୍ତ୍ତି ଅବସରରେ ଏହାର ଏକମାତ୍ର ଜୀବିତ ଯାତ୍ରୀ ବିଶ୍ୱଶକୁମାର ରମେଶ ନିଜ ଅନୁଭୂତି ବାଣ୍ଟିଛନ୍ତି। ଦୁର୍ଘଟଣାରୁ ବଞ୍ଚି ଯାଇଥିବାରୁ ସେ କୃତଜ୍ଞ ବୋଲି କହିଥିବା ବେଳେ, ଗତ ଏକ ବର୍ଷ ଧରି ସେ ମାନସିକ, ଶାରୀରିକ ଏବଂ ଆର୍ଥିକ ସଂଘର୍ଷ ମଧ୍ୟରେ ଦିନ କାଟୁଥିବା କଥା ପ୍ରକାଶ କରିଛନ୍ତି।
୨୦୨୫ ଜୁନ୍ ୧୨ରେ ଘଟିଥିବା ଏହି ଭୟଙ୍କର ବିମାନ ଦୁର୍ଘଟଣାରେ ୨୪୨ ଜଣ ଯାତ୍ରୀ ଓ କର୍ମଚାରୀ ଥିଲେ। ଉଡ଼ାଣର ମାତ୍ର ୩୨ ସେକେଣ୍ଡ ପରେ ବୋଇଂ ୭୮୭ ଡ୍ରିମଲାଇନର ବିମାନଟି ଏକ ମେଡିକାଲ କଲେଜର ଛାତ୍ରାବାସ ଓ କ୍ୟାଣ୍ଟିନ୍ ଉପରେ ଖସିପଡ଼ିଥିଲା। ଏହି ଦୁର୍ଘଟଣାରେ ମୋଟ ୨୬୦ ଜଣଙ୍କ ମୃତ୍ୟୁ ଘଟିଥିଲା। ସେଥିମଧ୍ୟରୁ ୨୪୧ ଜଣ ବିମାନରେ ଥିବା ଯାତ୍ରୀ ଓ କର୍ମଚାରୀ ଥିବା ବେଳେ ୧୯ ଜଣ ଭୂମିରେ ଥିଲେ।
ଦୁର୍ଘଟଣା ପରେ ରକ୍ତାକ୍ତ ଅବସ୍ଥାରେ ଘଟଣାସ୍ଥଳରୁ ଚାଲି ବାହାରୁଥିବା ବିଶ୍ୱଶକୁମାର ରମେଶଙ୍କ ଛବି ସାରା ବିଶ୍ୱର ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଥିଲା। କିନ୍ତୁ ଆଜି ସେ କହୁଛନ୍ତି, “ଲୋକେ ମୋତେ ବଞ୍ଚିଯାଇଥିବା ମଣିଷ ଭାବେ ଦେଖନ୍ତି, କିନ୍ତୁ ମୋ ଭିତରେ ଚାଲୁଥିବା ଯନ୍ତ୍ରଣାକୁ ଦେଖିପାରନ୍ତି ନାହିଁ।” ଲେଷ୍ଟରରେ ପରିବାର ସହ ରହୁଥିବା ୩୯ ବର୍ଷୀୟ ରମେଶ ଏହି ଦୁର୍ଘଟଣାରେ ନିଜ ଭାଇ ଅଜୟଙ୍କୁ ହରାଇଥିଲେ। ସେ କହିଛନ୍ତି ଯେ, ଏହି ଘଟଣା ତାଙ୍କ ଜୀବନକୁ ସମ୍ପୂର୍ଣ୍ଣ ବଦଳାଇ ଦେଇଛି। ଏବେ ମଧ୍ୟ ସେ ନିଦ୍ରାହୀନତା, ଚିନ୍ତା ଓ ଦୁଃସ୍ମୃତି ସହ ଲଢ଼ୁଛନ୍ତି।
ଏହି ମାମଲାରେ ରମେଶ ବ୍ରିଟେନର ହଡ୍ଗେଲ୍ ସଲିସିଟର୍ସକୁ ନିଜ ପକ୍ଷରୁ ଆଇନଗତ ପ୍ରତିନିଧିତ୍ୱ ପାଇଁ ନିଯୁକ୍ତ କରିଛନ୍ତି। ଦୁର୍ଘଟଣା ସମ୍ପର୍କିତ ସମ୍ଭାବ୍ୟ କ୍ଷତିପୂରଣ ଦାବି ନେଇ ଆଇନଜୀବୀମାନେ ବିଚାର କରୁଥିବା ବେଳେ ଏୟାର ଇଣ୍ଡିଆ ସହ ତାଙ୍କ ଶାରୀରିକ ଓ ମାନସିକ ପୁନର୍ବାସନ ସହାୟତା ନେଇ ଆଲୋଚନା ଚାଲିଛି। ଏପଟେ ଏୟାର ଇଣ୍ଡିଆ ପକ୍ଷରୁ କୁହାଯାଇଛି ଯେ, AI-171 ଦୁର୍ଘଟଣାରେ ପ୍ରଭାବିତ ପ୍ରତ୍ୟେକ ବ୍ୟକ୍ତିଙ୍କୁ ସହାନୁଭୂତି ଓ ସହଯୋଗ ପ୍ରଦାନ କରିବା ପାଇଁ ସଂସ୍ଥା ପ୍ରତିବଦ୍ଧ ରହିଛି।
