ଓମାନ ଉପକୂଳରେ ଜାହାଜ ଉପରେ ଆକ୍ରମଣ: ଦ୍ୱିତୀୟ ଥର ପାଇଁ ଆମେରିକୀୟ କୂଟନୀତିଜ୍ଞଙ୍କୁ ତଲବ କଲା ଭାରତ
ଓମାନ ଉପକୂଳରେ ବାଣିଜ୍ୟିକ ଜାହାଜ ଉପରେ ଆମେରିକାର ସାମରିକ ଆକ୍ରମଣକୁ ନେଇ ଭାରତ ସରକାର ତୀବ୍ର ଅସନ୍ତୋଷ ପ୍ରକାଶ କରିଛି। ଗତ ତିନି ଦିନ ମଧ୍ୟରେ ଦ୍ୱିତୀୟ ଥର ପାଇଁ ନୂଆଦିଲ୍ଲୀରେ ଥିବା ଆମେରିକାର ଉପ-ମିଶନ ମୁଖ୍ୟ ଜେସନ୍ ମିକ୍ସଙ୍କୁ ତଲବ କରି ଭାରତ କଡ଼ା ପ୍ରତିବାଦ ଜଣାଇଛି। ଏହି ଆକ୍ରମଣଗୁଡ଼ିକରେ ତିନିଜଣ ଭାରତୀୟ ନାବିକଙ୍କ ମୃତ୍ୟୁ ଘଟିଥିବାବେଳେ ଅନେକ ଭାରତୀୟ କ୍ରୁ ସଦସ୍ୟ ପ୍ରଭାବିତ ହୋଇଛନ୍ତି।
ଆମେରିକାର ସେଣ୍ଟ୍ରାଲ କମାଣ୍ଡ (CENTCOM) ଦାବି କରିଛି ଯେ, ଇରାନୀ ତେଲ ପରିବହନ ଓ ନିର୍ଦ୍ଦେଶ ଅମାନ୍ୟ କରିବା ଅଭିଯୋଗରେ ମାରିଭେକ୍ସ, ସେଟେବେଲୋ ଓ ଜାଲଭିର ନାମକ ତିନୋଟି ବାଣିଜ୍ୟିକ ଜାହାଜକୁ ଲକ୍ଷ୍ୟ କରାଯାଇଥିଲା। ସେଟେବେଲୋ ଉପରେ ହୋଇଥିବା ଆକ୍ରମଣରେ ୨୪ ଜଣ ଭାରତୀୟ ନାବିକଙ୍କ ମଧ୍ୟରୁ ୩ ଜଣଙ୍କ ମୃତ୍ୟୁ ଘଟିଥିଲା। ଅନ୍ୟପକ୍ଷରେ ଜାଲଭିର ଜାହାଜରେ ଥିବା ୨୦ ଜଣ ଭାରତୀୟ ନାବିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।
ବୈଦେଶିକ ବ୍ୟାପାର ମନ୍ତ୍ରଣାଳୟର ପ୍ରବକ୍ତା ରନ୍ଧୀର ଜୈସୱାଲ କହିଛନ୍ତି ଯେ, ଭାରତ ନିଜର ନାବିକ ସମୁଦାୟର ସୁରକ୍ଷା ଓ କଲ୍ୟାଣକୁ ସର୍ବାଧିକ ଗୁରୁତ୍ୱ ଦେଇଥାଏ। ସେଟେବେଲୋ ଉପରେ ଆକ୍ରମଣ ପରେ ଆମେରିକା ପକ୍ଷକୁ କଡ଼ା ପ୍ରତିବାଦ ଜଣାଯାଇଥିଲା। ଭାରତ ସ୍ପଷ୍ଟ କରିଛି ଯେ ବାଣିଜ୍ୟିକ ଜାହାଜ ଉପରେ ଏଭଳି ସାମରିକ ଆକ୍ରମଣ ତୁରନ୍ତ ବନ୍ଦ ହେବା ଦରକାର। ଏହାସହ ହର୍ମୁଜ୍ ପ୍ରଣାଳୀ ଦେଇ ଆନ୍ତର୍ଜାତିକ ଆଇନ ଅନୁଯାୟୀ ଅବାଧ ଜାହାଜ ଚଳାଚଳ ସୁନିଶ୍ଚିତ କରିବା ଏବଂ ସମସ୍ୟାର ସମାଧାନ ପାଇଁ ସଂଳାପ ଓ କୂଟନୀତିକୁ ପ୍ରାଧାନ୍ୟ ଦେବାକୁ ଭାରତ ଆହ୍ୱାନ କରିଛି।
