ଭାରତ-ବାଂଲାଦେଶ ସୀମାରେ ଶାନ୍ତି ଓ ସ୍ଥିରତା ବଜାୟ ରଖିବାକୁ ପୁନଃ ପ୍ରତିବଦ୍ଧତା
ଭାରତ ଏବଂ ବାଂଲାଦେଶ ଉଭୟ ଦେଶ ମଧ୍ୟରେ ଥିବା ସାଧାରଣ ସୀମାରେ ଶାନ୍ତି, ସ୍ଥିରତା ଏବଂ ସୌହାର୍ଦ୍ୟପୂର୍ଣ୍ଣ ପରିବେଶ ବଜାୟ ରଖିବା ପ୍ରତି ପୁନର୍ବାର ପ୍ରତିବଦ୍ଧତା ପ୍ରକାଶ କରିଛନ୍ତି। ନୂଆଦିଲ୍ଲୀସ୍ଥିତ ବିଏସଏଫ୍ ମୁଖ୍ୟାଳୟରେ ଜୁନ୍ ୮ରୁ ୧୧ ତାରିଖ ପର୍ଯ୍ୟନ୍ତ ଆୟୋଜିତ ୫୭ତମ ଡିଜି ସ୍ତରୀୟ ସୀମା ସମନ୍ୱୟ ସମ୍ମିଳନୀରେ ଏହି ସହମତି ପ୍ରକାଶ ପାଇଛି। ଏହି ବୈଠକରେ ଉଭୟ ଦେଶର ସୀମା ସୁରକ୍ଷା ବାହିନୀ ବର୍ତ୍ତମାନର ସୀମା ପରିସ୍ଥିତିର ସମୀକ୍ଷା କରିବା ସହ ସୀମା ପରିଚାଳନା ଓ ସୁରକ୍ଷା ସମ୍ପର୍କିତ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଥିଲେ।
ସମ୍ମିଳନୀରେ ସୀମା ଅଞ୍ଚଳରେ ସମନ୍ୱିତ ପାଟ୍ରୋଲିଂକୁ ଆହୁରି ସୁଦୃଢ଼ କରିବା, ନଜରଦାରି ବୃଦ୍ଧି କରିବା, ତତ୍କାଳ ସୂଚନା ଆଦାନ-ପ୍ରଦାନ ବ୍ୟବସ୍ଥାକୁ ମଜବୁତ କରିବା ଏବଂ ସୀମାପାର ଅପରାଧିକ ନେଟୱାର୍କ ବିରୋଧରେ ମିଳିତ ଭାବେ କାର୍ଯ୍ୟ କରିବା ନେଇ ସହମତି ହୋଇଥିଲା। ଭାରତୀୟ ପ୍ରତିନିଧି ଦଳର ନେତୃତ୍ୱ ବିଏସଏଫ୍ ମହାନିର୍ଦ୍ଦେଶକ ପ୍ରବୀଣ କୁମାର କରିଥିବା ବେଳେ ବାଂଲାଦେଶ ପକ୍ଷରୁ ବର୍ଡର ଗାର୍ଡ ବାଂଲାଦେଶ (ବିଜିବି) ମହାନିର୍ଦ୍ଦେଶକ ମେଜର ଜେନେରାଲ ମହମ୍ମଦ ଅଶରାଫୁଜ୍ଜାମାନ ସିଦ୍ଦିକୀ ନେତୃତ୍ୱ ନେଇଥିଲେ।
ବୈଠକ ଶେଷରେ ମିଳିତ ଆଲୋଚନା ରେକର୍ଡରେ ସ୍ୱାକ୍ଷର କରାଯାଇଥିଲା। ଉଭୟ ପକ୍ଷ ବିଶ୍ୱାସ ପ୍ରକାଶ କରିଛନ୍ତି ଯେ, ଏହି ସମ୍ମିଳନୀରେ ନିଆଯାଇଥିବା ନିଷ୍ପତ୍ତି ଓ ବୁଝାମଣା ଦ୍ୱିପାକ୍ଷିକ ସହଯୋଗକୁ ଆହୁରି ମଜବୁତ କରିବ ଏବଂ ପ୍ରଭାବଶାଳୀ ସୀମା ପରିଚାଳନା ସହିତ ଭାରତ-ବାଂଲାଦେଶ ମୈତ୍ରୀପୂର୍ଣ୍ଣ ସମ୍ପର୍କକୁ ଆଗକୁ ବଢ଼ାଇବ। ପରବର୍ତ୍ତୀ ଡିଜି ସ୍ତରୀୟ ସମ୍ମିଳନୀ ୨୦୨୬ ନଭେମ୍ବର ମାସରେ ଢାକାରେ ପାରସ୍ପରିକ ସୁବିଧାଜନକ ସମୟରେ ଆୟୋଜିତ ହେବ ବୋଲି ପ୍ରସ୍ତାବ ରହିଛି।
