ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ କକରୋଚ୍ ଜନତା ପାର୍ଟିର ଦେଶବ୍ୟାପୀ ଆନ୍ଦୋଳନ ଜୋରଦାର, ହାଇଦ୍ରାବାଦ ଓ ବେଙ୍ଗାଲୁରୁରେ ବିକ୍ଷୋଭ
ନୂଆଦିଲ୍ଲୀ: ନିଟ୍ ପ୍ରଶ୍ନପତ୍ର ଲିକ୍ ଏବଂ ଶିକ୍ଷା କ୍ଷେତ୍ରରେ ଅନିୟମିତତା ଅଭିଯୋଗକୁ ନେଇ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ‘କକରୋଚ୍ ଜନତା ପାର୍ଟି’ (CJP) ଏବଂ ଅନ୍ୟାନ୍ୟ ସଂଗଠନ ପକ୍ଷରୁ ଦେଶବ୍ୟାପୀ ଆନ୍ଦୋଳନ ତୀବ୍ର ହୋଇଛି। ରବିବାର ହାଇଦ୍ରାବାଦ ଓ ବେଙ୍ଗାଲୁରୁରେ ବ୍ୟାପକ ବିକ୍ଷୋଭ ପ୍ରଦର୍ଶନ ହୋଇଥିବା ବେଳେ ସୋମବାର ଜୟପୁରରେ ମଧ୍ୟ ସମାନ ଆନ୍ଦୋଳନର ଘୋଷଣା କରାଯାଇଛି।
ହାଇଦ୍ରାବାଦର ଧର୍ଣ୍ଣା ଚକରେ ହଜାର ହଜାର ଲୋକ ଏକତ୍ରିତ ହୋଇ ନିଟ୍ ପେପର ଲିକ୍, ସିବିଏସଇର ଅନ୍ସ୍କ୍ରିନ୍ ମାର୍କିଂ ବ୍ୟବସ୍ଥାରେ ଅନିୟମିତତା, ବେକାରି ସମସ୍ୟା ଓ ଶିକ୍ଷା କ୍ଷେତ୍ରର ଅବ୍ୟବସ୍ଥା ବିରୋଧରେ ସ୍ୱର ଉଠାଇଥିଲେ। ଏହି ବିକ୍ଷୋଭରେ ଯୋଗ ଦେଇଥିବା ସାମାଜିକ କର୍ମୀ ଏବଂ ଶିକ୍ଷାବିତ୍ ସୋନମ ୱାଙ୍ଗଚୁକ ‘ଭୟମୁକ୍ତ ଭାରତ’ ଗଠନର ଆହ୍ୱାନ ଦେଇଥିଲେ। ସେ କହିଥିଲେ ଯେ, ଏହି ଆନ୍ଦୋଳନ କୌଣସି ରାଜନୈତିକ ଶକ୍ତି ହାସଲ କିମ୍ବା ନୂଆ ଦଳ ଗଠନ ପାଇଁ ନୁହେଁ, ବରଂ ଯୁବପିଢ଼ିଙ୍କ ଭବିଷ୍ୟତ ଓ ଦେଶର ଶିକ୍ଷା ବ୍ୟବସ୍ଥାକୁ ସୁରକ୍ଷିତ କରିବା ପାଇଁ।
ୱାଙ୍ଗଚୁକ କହିଛନ୍ତି ଯେ, ପରୀକ୍ଷା ବାତିଲ, ପ୍ରଶ୍ନପତ୍ର ଲିକ୍ ଓ ଅନ୍ୟାନ୍ୟ ଅନିୟମିତତା ଦେଶର ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ସତ୍ୟ ଓ ଅହିଂସାର ପଥରେ ଏହି ଆନ୍ଦୋଳନ ଜାରି ରହିବ ବୋଲି ସେ କହିଥିବା ବେଳେ, ଦେଶର କିଛି ସ୍କୁଲ ବିଶ୍ୱସ୍ତରୀୟ ଶିକ୍ଷା ଦେଉଥିବା ସମୟରେ ଅଧିକାଂଶ ଛାତ୍ରଛାତ୍ରୀ ନିମ୍ନମାନର ଶିକ୍ଷା ବ୍ୟବସ୍ଥାରେ ଅଟକି ରହିଛନ୍ତି ବୋଲି ମତ ଦେଇଛନ୍ତି। ଆନ୍ଦୋଳନକାରୀମାନେ ଶିକ୍ଷା କ୍ଷେତ୍ରରେ ବ୍ୟାପକ ସଂସ୍କାର ଏବଂ ଦାୟିତ୍ୱବୋଧ ସୁନିଶ୍ଚିତ କରିବାକୁ କେନ୍ଦ୍ର ସରକାରଙ୍କୁ ଦାବି କରିଛନ୍ତି।
