ଆମେରିକା ଥିଲା ଅଧିକ ବ୍ୟଗ୍ର, ଇରାନ ନୁହେଁ: ଟ୍ରମ୍ପଙ୍କୁ ଟାର୍ଗେଟ୍ କଲେ ଖାମେନେଇ

ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

ଇରାନ-ଆମେରିକା ମଧ୍ୟରେ ସ୍ୱାକ୍ଷରିତ ନୂତନ ବୁଝାମଣା ଚୁକ୍ତି (MoU)କୁ ନେଇ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ମୋଜତବା ଖାମେନେଇ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ ଏହି ଚୁକ୍ତି ପାଇଁ ଇରାନ ନୁହେଁ, ବରଂ ଆମେରିକା ଅଧିକ ବ୍ୟଗ୍ର ଥିଲା। ଖାମେନେଇଙ୍କ ଅଭିଯୋଗ ଅନୁଯାୟୀ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଚୁକ୍ତି ସମ୍ପନ୍ନ କରିବା ପାଇଁ ସମସ୍ତ ପ୍ରକାରର ଚାପ ଓ କୌଶଳ ପ୍ରୟୋଗ କରିଥିଲେ।

ଖାମେନେଇ ସ୍ୱୀକାର କରିଛନ୍ତି ଯେ ବ୍ୟକ୍ତିଗତ ଭାବେ ସେ ଏହି ଚୁକ୍ତି ସପକ୍ଷରେ ନଥିଲେ। ତେବେ ଇରାନର ରାଷ୍ଟ୍ରପତି ଦେଶର ସ୍ୱାର୍ଥ ଓ ‘ରେଜିଷ୍ଟାନ୍ସ ଫ୍ରଣ୍ଟ’ର ଅଧିକାର ସୁରକ୍ଷିତ ରହିବ ବୋଲି ଆଶ୍ୱାସନ ଦେବା ପରେ ସେ ଅନୁମତି ଦେଇଥିବା କହିଛନ୍ତି। ସେ ଆହୁରି ଚେତାବନୀ ଦେଇ କହିଛନ୍ତି ଯେ ଚୁକ୍ତିର ସୀମା ବାହାରେ ଯଦି ଆମେରିକା ଅତିରିକ୍ତ ଦାବି ଉଠାଏ, ତେବେ ଇରାନ କୌଣସି ପରିସ୍ଥିତିରେ ସ୍ୱୀକାର କରିବ ନାହିଁ।

ନିଜ ସନ୍ଦେଶରେ ଖାମେନେଇ କହିଛନ୍ତି ଯେ ଇରାନୀ ଅଧିକାରୀମାନେ ସତ୍ୟନିଷ୍ଠାର ସହ ଆଲୋଚନା କରିଥିଲେ, କିନ୍ତୁ ଚୁକ୍ତି ହାସଲ ପାଇଁ ଆମେରିକା ପକ୍ଷରୁ ଅଧିକ ଆଗ୍ରହ ଦେଖାଯାଇଥିଲା। ଏହି ବୟାନକୁ ଟ୍ରମ୍ପ ପ୍ରଶାସନ ଉପରେ ଏକ କୂଟନୈତିକ ଆକ୍ରମଣ ଭାବେ ଦେଖାଯାଉଛି। ଚୁକ୍ତିକୁ ନେଇ ଉଭୟ ଦେଶର ଭିନ୍ନ ଭିନ୍ନ ବ୍ୟାଖ୍ୟା ସାମ୍ନାକୁ ଆସୁଥିବା ବେଳେ ଆଗାମୀ ଦିନରେ ଏହାର ପ୍ରକୃତ ପ୍ରଭାବ ଉପରେ ବିଶ୍ୱର ନଜର ରହିଛି।