ସୁଭଦ୍ରା ଓ ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନାକୁ ନେଇ ଓଡ଼ିଶା ହାଇକୋର୍ଟରେ PIL, ସରକାରୀ ଅର୍ଥ ଅପବ୍ୟବହାର ଅଭିଯୋଗ
ଓଡ଼ିଶା ସରକାରଙ୍କ ଦୁଇଟି ପ୍ରମୁଖ କଲ୍ୟାଣକାରୀ ଯୋଜନା ‘ସୁଭଦ୍ରା ଯୋଜନା’ ଏବଂ ‘ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନା (MKBY)’ର ସାମ୍ବିଧାନିକ ଓ ଆଇନଗତ ବୈଧତାକୁ ଚ୍ୟାଲେଞ୍ଜ କରି ଓଡ଼ିଶା ହାଇକୋର୍ଟରେ ଏକ ଜନସ୍ୱାର୍ଥ ମାମଲା (PIL) ଦାଖଲ ହୋଇଛି। କଟକର ୭୮ ବର୍ଷୀୟ ଆଇନଜୀବୀ ରମାନ୍ତ ନାୟକ ଏହି ମାମଲା ଦାଖଲ କରି ଅଭିଯୋଗ କରିଛନ୍ତି ଯେ, ଏହି ଦୁଇ ଯୋଜନା ଓଡ଼ିଶା ଆର୍ଥିକ ଦାୟିତ୍ୱ ଓ ବଜେଟ୍ ପରିଚାଳନା ଆଇନ (OFRBM Act, 2005)ର ବିଭିନ୍ନ ବ୍ୟବସ୍ଥାକୁ ଉଲ୍ଲଂଘନ କରୁଛି। ସେ ଏହି ଯୋଜନାଗୁଡ଼ିକୁ ବନ୍ଦ କରିବାକୁ ହାଇକୋର୍ଟଙ୍କ ହସ୍ତକ୍ଷେପ ଲୋଡ଼ିଛନ୍ତି।
ଆବେଦନରେ କୁହାଯାଇଛି ଯେ ସୁଭଦ୍ରା ଯୋଜନା ଅନୁସାରେ ୨୦୨୪-୨୫ରୁ ୨୦୨୮-୨୯ ପର୍ଯ୍ୟନ୍ତ ଯୋଗ୍ୟ ମହିଳାଙ୍କୁ ପାଞ୍ଚ ବର୍ଷରେ ମୋଟ ୫୦ ହଜାର ଟଙ୍କା ସହାୟତା ଦିଆଯିବ। ୨୧ରୁ ୬୦ ବର୍ଷ ବୟସର ପ୍ରାୟ ଏକ କୋଟି ମହିଳା ଏହି ଯୋଜନାର ଲାଭ ପାଇବାକୁ ଥିବାବେଳେ ଏହା ପାଇଁ ବିପୁଳ ପରିମାଣର ସରକାରୀ ଖର୍ଚ୍ଚ ହେଉଛି। ସେହିପରି ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନାରେ ଯୋଗ୍ୟ ପରିବାରଙ୍କୁ ବିବାହ ଖର୍ଚ୍ଚ ପାଇଁ ୬୦ ହଜାର ଟଙ୍କା ସହାୟତା ଦିଆଯାଉଛି, ଯାହା ପାଇଁ ପାଞ୍ଚ ବର୍ଷରେ ପ୍ରାୟ ୬୫୦ କୋଟି ଟଙ୍କା ବ୍ୟୟ ହେବାର ଆକଳନ ରହିଛି।
ଆବେଦନକାରୀ ମତରେ, ଏହି ଦୁଇ ଯୋଜନା କେବଳ କ୍ୟାବିନେଟ୍ ନିଷ୍ପତ୍ତି ଆଧାରରେ ଆରମ୍ଭ କରାଯାଇଛି ଏବଂ ବିଧାନସଭାର ସ୍ପଷ୍ଟ ଆଇନଗତ ଅନୁମୋଦନ ବିନା ହଜାର ହଜାର କୋଟି ଟଙ୍କା ଖର୍ଚ୍ଚ କରାଯାଉଛି। ଏହା ରାଜ୍ୟର ଆର୍ଥିକ ଶୃଙ୍ଖଳା, ଜନଧନର ସଠିକ୍ ବ୍ୟବହାର ଓ ସମ୍ବିଧାନର ସମାନତା ନୀତି ଉପରେ ପ୍ରଶ୍ନ ଉଠାଉଛି ବୋଲି ସେ ଦାବି କରିଛନ୍ତି। ଏପର୍ଯ୍ୟନ୍ତ ମାମଲାଟି ଶୁଣାଣି ପାଇଁ ତାଲିକାଭୁକ୍ତ ହୋଇନଥିବା ବେଳେ, ଏହାକୁ ନେଇ ରାଜନୈତିକ ଓ ପ୍ରଶାସନିକ ମହଲରେ ଚର୍ଚ୍ଚା ଜୋର ଧରିଛି।
