ଭେନେଜୁଏଲାରେ ଭୂକମ୍ପ ତାଣ୍ଡବ; ମୃତ୍ୟୁସଂଖ୍ୟା ୧୪୩୦କୁ ବୃଦ୍ଧି, ହଜାର ହଜାର ଲୋକ ନିଖୋଜ
ଦକ୍ଷିଣ ଆମେରିକାର ଭେନେଜୁଏଲାରେ ଘଟିଥିବା ଭୟଙ୍କର ଭୂକମ୍ପ ପରେ ପରିସ୍ଥିତି ଅତ୍ୟନ୍ତ ସଙ୍ଗୀନ ରହିଛି। ବୁଧବାର ପରପରି ୭.୨ ଏବଂ ୭.୫ ତୀବ୍ରତାର ଦୁଇଟି ଶକ୍ତିଶାଳୀ ଭୂକମ୍ପରେ ମୃତ୍ୟୁସଂଖ୍ୟା ବଢ଼ି ୧,୪୩୦ରେ ପହଞ୍ଚିଛି। ଉଦ୍ଧାରକାରୀ ଦଳ ଏବେ ମଧ୍ୟ ଧ୍ୱଂସାବଶେଷ ତଳେ ଜୀବିତ ଲୋକଙ୍କୁ ଖୋଜିବା ପାଇଁ ଅଭିଯାନ ଜାରି ରଖିଛନ୍ତି। ସରକାରୀ ସୂଚନା ଅନୁସାରେ, ପ୍ରାୟ ୬୮,୯୦୦ ଜଣ ଲୋକ ଏପର୍ଯ୍ୟନ୍ତ ନିଖୋଜ ଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି।
ସବୁଠାରୁ ଅଧିକ କ୍ଷତିଗ୍ରସ୍ତ ଲା ଗୁଆଇରା ରାଜ୍ୟରେ ଉଦ୍ଧାରକାରୀ ଦଳ ସହ ସାଧାରଣ ଲୋକମାନେ ମଧ୍ୟ ନିଜ ପରିଜନଙ୍କୁ ଖୋଜିବା ପାଇଁ କୁଦାଳ, ଦଉଡ଼ି, ଭାରୀ ଯନ୍ତ୍ରପାତି ଏବଂ ଖାଲି ହାତରେ ଧ୍ୱଂସସ୍ତୂପ ହଟାଉଛନ୍ତି। ଭୂକମ୍ପରେ ଅନେକ କୋଠା ଭୁଶୁଡ଼ି ପଡ଼ିଥିବାରୁ ଉଦ୍ଧାର କାର୍ଯ୍ୟ ଅତ୍ୟନ୍ତ କଷ୍ଟସାଧ୍ୟ ହୋଇପଡ଼ିଛି।
ଏହାରି ମଧ୍ୟରେ ଭେନେଜୁଏଲାର ମଧ୍ୟ ଅଞ୍ଚଳରେ ପୁଣି ୪.୧ ତୀବ୍ରତାର ଆଉ ଏକ ଭୂକମ୍ପ ଅନୁଭୂତ ହୋଇଛି। ଭେନେଜୁଏଲା ସିସ୍ମୋଲୋଜିକାଲ ରିସର୍ଚ୍ଚ ଫାଉଣ୍ଡେସନ୍ ସୂଚନା ଦେଇଛି ଯେ, ଏହାର କେନ୍ଦ୍ରସ୍ଥଳ ଲା ଗୁଆଇରାଠାରୁ ପ୍ରାୟ ୩୫ କିଲୋମିଟର ପଶ୍ଚିମରେ ଏବଂ ମାତ୍ର ୫ କିଲୋମିଟର ଗଭୀରତାରେ ଥିଲା। କମ୍ ଗଭୀରତାରେ ଭୂକମ୍ପ ହୋଇଥିବାରୁ ଭୂପୃଷ୍ଠରେ କମ୍ପନର ପ୍ରଭାବ ଅଧିକ ଅନୁଭୂତ ହୋଇଥିବାବେଳେ ଆହୁରି କ୍ଷୟକ୍ଷତି ହେବାର ଆଶଙ୍କା ପ୍ରକାଶ ପାଇଛି।
