ପଶ୍ଚିମ ଏସିଆରେ ଯୁଦ୍ଧ ବିରତି ପାଇଁ ଆମେରିକା-ଇରାନ ସହମତି, ଜୁନ୍ ୩୦ରେ ଦୋହାରେ ହୋଇପାରେ ଗୁରୁତ୍ୱପୂର୍ଣ୍ଣ ଆଲୋଚନା
ପଶ୍ଚିମ ଏସିଆରେ ଦୀର୍ଘଦିନ ଧରି ଚାଲିଥିବା ଉତ୍ତେଜନା ମଧ୍ୟରେ ଆମେରିକା ଓ ଇରାନ ପରସ୍ପର ଉପରେ ଆକ୍ରମଣ ବନ୍ଦ କରିବାକୁ ସହମତ ହୋଇଥିବା ଖବର ସାମ୍ନାକୁ ଆସିଛି। ଆକ୍ସିଓସ୍ର ରିପୋର୍ଟ ଅନୁସାରେ, ଉଭୟ ଦେଶ ଜୁନ୍ ୩୦ରେ କତାରର ରାଜଧାନୀ ଦୋହାରେ ବୈଠକ କରି ହର୍ମୁଜ୍ ସାଗର ପ୍ରଣାଳୀକୁ କେନ୍ଦ୍ର କରି ଉପୁଜିଥିବା ବିବାଦର ସମାଧାନ ପାଇଁ ଆଲୋଚନା କରିପାରନ୍ତି। ବିଶ୍ୱ ତୈଳ ପରିବହନ ପାଇଁ ହର୍ମୁଜ୍ ସାଗର ପ୍ରଣାଳୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମାର୍ଗ ହୋଇଥିବାରୁ ଏହି ବୈଠକ ଉପରେ ସମଗ୍ର ବିଶ୍ୱର ନଜର ରହିଛି।
ଏହାରି ମଧ୍ୟରେ ଇରାନର ବୈଦେଶିକ ମନ୍ତ୍ରୀ ସତର୍କ କରାଇ କହିଛନ୍ତି ଯେ, ହର୍ମୁଜ୍ ସାଗର ପ୍ରଣାଳୀକୁ ଏଡ଼ାଇ ଅନ୍ୟ କୌଣସି ମାର୍ଗରେ ଜାହାଜ ଚଳାଚଳ କରିବାକୁ ଉଦ୍ୟମ କଲେ ପଶ୍ଚିମ ଏସିଆରେ ଉତ୍ତେଜନା ଆହୁରି ବଢ଼ିପାରେ। ଏହି ବିବୃତ୍ତି ଏପରି ସମୟରେ ଆସିଛି, ଯେତେବେଳେ ଆମେରିକା ଓ ଇରାନ ମଧ୍ୟରେ ସାମରିକ କାର୍ଯ୍ୟକଳାପ ଏବଂ ପ୍ରତିଆକ୍ରମଣ ଜାରି ରହିଛି।
ଅନ୍ୟପଟେ, ଇସ୍ରାଏଲ୍-ଲେବାନନ ସୀମାରେ ମଧ୍ୟ ତନାତନି କମିନାହିଁ। ଉଭୟ ଦେଶ ମଧ୍ୟରେ ଶତ୍ରୁତା ଶେଷ କରିବାକୁ ଚୁକ୍ତି ସ୍ୱାକ୍ଷର ହେବାର ଦୁଇ ଦିନ ପରେ ଦକ୍ଷିଣ ଲେବାନନରେ ହୋଇଥିବା ସଂଘର୍ଷରେ ଇସ୍ରାଏଲର ଜଣେ ସେନା ଅଧିକାରୀ ନିହତ ହୋଇଛନ୍ତି। ଏପଟେ ହିଜବୁଲ୍ଲା ପକ୍ଷରୁ କୁହାଯାଇଛି ଯେ, ଇସ୍ରାଏଲୀ ଆକ୍ରମଣ ଜାରି ରହିଲେ ସେମାନେ ନିଜ ଦେଶର ସୁରକ୍ଷା ପାଇଁ ପ୍ରତିରକ୍ଷାତ୍ମକ ପଦକ୍ଷେପ ନେବାର ଅଧିକାର ସଂରକ୍ଷିତ ରଖିଛନ୍ତି।
