କେତନ ହତ୍ୟାକାଣ୍ଡରେ ନୂଆ ଖୁଲାସା: ବାଲି ଯିବା ପୂର୍ବରୁ କ୍ୟାବରେ କ’ଣ କରିଥିଲେ ସିୟା?
ପୁଣେର ବହୁଚର୍ଚ୍ଚିତ କେତନ ଅଗ୍ରୱାଲ ହତ୍ୟାକାଣ୍ଡର ତଦନ୍ତ ଯେତେ ଆଗକୁ ବଢ଼ୁଛି, ସେତେ ନୂଆ ତଥ୍ୟ ସାମ୍ନାକୁ ଆସୁଛି। ଏବେ ପୋଲିସ ତଦନ୍ତରେ ବାଲି ଯାତ୍ରା ପୂର୍ବରୁ କ୍ୟାବରେ ଘଟିଥିବା କିଛି ଘଟଣା ସନ୍ଦେହର କେନ୍ଦ୍ରବିନ୍ଦୁ ପାଲଟିଛି। କ୍ୟାବ୍ ଡ୍ରାଇଭର ବୈଭବ ଯାଦବଙ୍କ ବୟାନ ଅନୁଯାୟୀ, ପ୍ରି-ୱେଡିଂ ସୁଟ୍ ପାଇଁ ବାଲି ଯିବା ବେଳେ ସିୟା ଗୋୟଲ ପ୍ରଥମେ ଗାଡ଼ିରେ ବସିବାକୁ ରାଜି ହୋଇନଥିଲେ। ପରେ ତାଙ୍କ ଭାଇ ସାହିଲ ଗୋୟଲ ବୁଝାଇବା ପରେ ସେ ଯାତ୍ରା ଆରମ୍ଭ କରିଥିଲେ। ରାସ୍ତାରେ ସିୟା ଓ ସାହିଲଙ୍କ ମଧ୍ୟରେ ତୀବ୍ର ବଚସା ହୋଇଥିବା କଥା ମଧ୍ୟ ଡ୍ରାଇଭର କହିଛନ୍ତି।
ତଦନ୍ତ ବେଳେ ଆଉ ଏକ ସନ୍ଦେହଜନକ ଘଟଣା ସାମ୍ନାକୁ ଆସିଛି। ଖାଇବା ପାଇଁ ଏକ ଫୁଡ୍ କୋର୍ଟରେ ଅଟକିଥିବା ସମୟରେ ସମସ୍ତେ ବାହାରେ ଥିବାବେଳେ ସିୟା ଏକାକୀ କ୍ୟାବ୍ ନିକଟକୁ ଫେରିଯାଇ ଗାଡ଼ିରୁ କିଛି ସାମଗ୍ରୀ ବାହାର କରି ନିଜ ପକେଟରେ ରଖିଥିବା ଡ୍ରାଇଭର ଦାବି କରିଛନ୍ତି। ପରେ ମୁମ୍ବାଇ ବିମାନବନ୍ଦରରେ କେତନ ଅଗ୍ରୱାଲଙ୍କ ପାସପୋର୍ଟ ନିଖୋଜ ଥିବା ଜଣାପଡ଼ିଥିଲା। ସିୟା ପାସପୋର୍ଟ ଲୁଚାଇଥିଲେ କି ନାହିଁ, ସେନେଇ ପୋଲିସ ତଦନ୍ତ ଜାରି ରଖିଛି। ତେବେ ଏହି ଅଭିଯୋଗଗୁଡ଼ିକର ସ୍ୱାଧୀନ ପୁଷ୍ଟି ଏପର୍ଯ୍ୟନ୍ତ ହୋଇନାହିଁ।
ଏପଟେ ହତ୍ୟାକାଣ୍ଡର ଷଡ଼ଯନ୍ତ୍ରରେ ଆଉ କାହାର ସମ୍ପୃକ୍ତି ରହିଛି କି ନାହିଁ, ତାହା ଖୋଜିବା ପାଇଁ ପୋଲିସ ସିୟାଙ୍କ ମାତା-ପିତା ଓ ଭାଇ ସାହିଲଙ୍କୁ ପ୍ରାୟ ୧୨ ଘଣ୍ଟା ଧରି ପଚରାଉଚରା କରିଛି। ଚେତନ ଚୌଧୁରୀ ସହ ସିୟାଙ୍କ ସମ୍ପର୍କ, କେତନଙ୍କ ସହ ବିବାହ ପ୍ରସ୍ତୁତି ଏବଂ ପରିବାରର ଏହା ସମ୍ପର୍କରେ କେତେ ଜ୍ଞାନ ଥିଲା, ସେନେଇ ପ୍ରାୟ ୧୦ଟି ଗୁରୁତ୍ୱପୂର୍ଣ୍ଣ ପ୍ରଶ୍ନ ପଚରାଯାଇଥିବା ସୂଚନା ମିଳିଛି। ସୂତ୍ର ଅନୁସାରେ, ସାହିଲଙ୍କୁ ସିୟା ଓ ଚେତନଙ୍କ ସମ୍ପର୍କ ବିଷୟରେ ପୂର୍ବରୁ ଜଣାଥିଲା ଏବଂ ସେ ଚେତନଙ୍କ ସହ କ୍ରିକେଟ୍ ମଧ୍ୟ ଖେଳୁଥିଲେ। ପୋଲିସର ବିଶ୍ୱାସ, ସାହିଲଙ୍କ ବୟାନରୁ ଏହି ହାଇ-ପ୍ରୋଫାଇଲ୍ ହତ୍ୟାକାଣ୍ଡର ଅନେକ ରହସ୍ୟ ଉନ୍ମୋଚିତ ହୋଇପାରେ।
