କେତନ ହତ୍ୟାକାଣ୍ଡରେ ନୂଆ ବିବାଦ: ସିୟା ଗୋୟଲଙ୍କ ଭାଇଙ୍କୁ ୧୦ କୋଟିର ମାନହାନୀ ନୋଟିସ୍
ବହୁଚର୍ଚ୍ଚିତ କେତନ ଅଗ୍ରୱାଲ ହତ୍ୟାକାଣ୍ଡରେ ଏବେ ଏକ ନୂଆ ଆଇନଗତ ବିବାଦ ସାମ୍ନାକୁ ଆସିଛି। ସିୟା ଗୋୟଲଙ୍କ ପକ୍ଷରୁ ମାମଲା ଲଢ଼ୁଛନ୍ତି କିଏ, ତାହାକୁ ନେଇ ଦୁଇ ଓକିଲଙ୍କ ମଧ୍ୟରେ ବିବାଦ ଦେଖାଦେଇଛି। ପୁଣେର ଓକିଲ ଆଶୁତୋଷ ଶ୍ରୀବାସ୍ତବ ଦାବି କରିଛନ୍ତି ଯେ, ସିୟା ତାଙ୍କୁ ଆଇନଗତ ଭାବେ ନିଜ ଓକିଲ ଭାବେ ନିଯୁକ୍ତ କରି ଭକାଲତନାମାରେ ଦସ୍ତଖତ କରିଛନ୍ତି। କିନ୍ତୁ ସିୟାଙ୍କ ଭାଇ ସାହିଲ ଗୋୟଲ ଏହି ଦାବିକୁ ଖଣ୍ଡନ କରି କହିଛନ୍ତି ଯେ, ଓକିଲ ବିପୁଲ ଦୁଶିଙ୍ଗ ହିଁ ସିୟାଙ୍କ ପକ୍ଷରୁ ମାମଲା ପରିଚାଳନା କରୁଛନ୍ତି।
ଏହି ବିବାଦ ପରେ ଆଶୁତୋଷ ଶ୍ରୀବାସ୍ତବ ସାହିଲ ଗୋୟଲଙ୍କୁ ୧୦ କୋଟି ଟଙ୍କାର ମାନହାନୀ ନୋଟିସ୍ ପଠାଇଛନ୍ତି। ୧୦ ପୃଷ୍ଠାର ଏହି ନୋଟିସ୍ରେ ସେ ଦାବି କରିଛନ୍ତି ଯେ, ସାହିଲଙ୍କ ସାର୍ବଜନୀନ ବୟାନ ତାଙ୍କ ପେସାଗତ ସମ୍ମାନ, ସୁନାମ ଓ ବିଶ୍ୱସନୀୟତାକୁ କ୍ଷତି ପହଞ୍ଚାଇଛି। ନୋଟିସ୍ରେ ସାହିଲଙ୍କୁ ୪୮ ଘଣ୍ଟା ମଧ୍ୟରେ ସାର୍ବଜନୀନ କ୍ଷମା ପ୍ରାର୍ଥନା କରିବା, ସମସ୍ତ ବିବାଦୀୟ ବୟାନ ଓ ଭିଡିଓ ହଟାଇବା ସହ ୭ ଦିନ ମଧ୍ୟରେ ୧୦ କୋଟି ଟଙ୍କା କ୍ଷତିପୂରଣ ଦେବାକୁ କୁହାଯାଇଛି।
ଅନ୍ୟପଟେ, କେତନ ଅଗ୍ରୱାଲ ହତ୍ୟା ମାମଲାରେ ସିୟା ଗୋୟଲ ଓ ତାଙ୍କ ପ୍ରେମିକ ଚେତନ ଚୌଧୁରୀଙ୍କ ପୋଲିସ ହେପାଜତକୁ ଆଉ ୫ ଦିନ ବୃଦ୍ଧି କରାଯାଇଛି। ପୋଲିସ କହିଛି, ଘଟଣାସ୍ଥଳରେ ଅପରାଧର ପୁନଃନିର୍ମାଣ ଓ ତଦନ୍ତ ପାଇଁ ଉଭୟଙ୍କୁ ଅଧିକ ପଚରାଉଚରା ଆବଶ୍ୟକ। ଏହାସହ ସିୟା କେତନଙ୍କ ପାସପୋର୍ଟ ଚିରି ପୋଡ଼ି ଦେଇଥିବା ଅଭିଯୋଗର ମଧ୍ୟ ତଦନ୍ତ ଚାଲିଥିବା ବେଳେ, ଏହାର ଅବଶେଷ ଉଦ୍ଧାର ପାଇଁ ପୋଲିସ ପ୍ରୟାସ ଜାରି ରଖିଛି।
