ରାମ ମନ୍ଦିର ମାମଲା: ଅଭିଯୁକ୍ତଙ୍କ ପକ୍ଷରେ ଲଢ଼ିବେନି ଆଇନଜୀବୀ! ସୁପ୍ରିମକୋର୍ଟଙ୍କ ପୁରୁଣା ରାୟକୁ ନେଇ ଚର୍ଚ୍ଚା
ଅଯୋଧ୍ୟା: ରାମ ମନ୍ଦିର ଦାନ ଅନିୟମିତତା ମାମଲାରେ ଗିରଫ ଅଭିଯୁକ୍ତମାନଙ୍କ ପକ୍ଷରେ ଓକିଲାତି ନ କରିବାକୁ ଫୈଜାବାଦ ବାର୍ ଆସୋସିଏସନ୍ ପକ୍ଷରୁ ନିଷ୍ପତ୍ତି ନିଆଯାଇଥିବା ବେଳେ, ଏହାକୁ ନେଇ ଏବେ ଆଇନଗତ ଚର୍ଚ୍ଚା ଜୋର ଧରିଛି। କାରଣ, ସୁପ୍ରିମକୋର୍ଟଙ୍କ ୨୦୧୦ ମସିହାର ଏକ ରାୟରେ ସ୍ପଷ୍ଟ କରାଯାଇଛି ଯେ, ଜଣେ “ଦୁଷ୍ଟ” କିମ୍ବା ଗୁରୁତର ଅପରାଧରେ ଅଭିଯୁକ୍ତ ବ୍ୟକ୍ତିଙ୍କର ମଧ୍ୟ ନିଜ ପସନ୍ଦର ଓକିଲଙ୍କ ସହାୟତା ପାଇବା ମୌଳିକ ଅଧିକାର ରହିଛି।
ସୁପ୍ରିମକୋର୍ଟ ନିଜ ରାୟରେ ସମ୍ବିଧାନର ଅନୁଚ୍ଛେଦ ୨୨(୧) ର ଉଲ୍ଲେଖ କରି କହିଥିଲେ ଯେ, ଗିରଫ ହୋଇଥିବା କୌଣସି ବ୍ୟକ୍ତିଙ୍କୁ ତାଙ୍କ ପସନ୍ଦର ଆଇନଜୀବୀଙ୍କ ପରାମର୍ଶ ଓ ଆଇନଗତ ସହାୟତାରୁ ବଞ୍ଚିତ କରାଯାଇପାରିବ ନାହିଁ। ନ୍ୟାୟ ପ୍ରକ୍ରିୟାରେ ପ୍ରତ୍ୟେକ ଅଭିଯୁକ୍ତଙ୍କୁ ନିରପେକ୍ଷ ଶୁଣାଣିର ସୁଯୋଗ ଦେବା ସମ୍ବିଧାନ ପ୍ରଦତ୍ତ ଅଧିକାର ବୋଲି କୋର୍ଟ କହିଥିଲେ।
ଏପରି ସ୍ଥିତିରେ ଫୈଜାବାଦ ବାର୍ ଆସୋସିଏସନ୍ର ଅଭିଯୁକ୍ତମାନଙ୍କ ପକ୍ଷରେ ମାମଲା ନ ଲଢ଼ିବା ନିଷ୍ପତ୍ତି ସୁପ୍ରିମକୋର୍ଟଙ୍କ ଉକ୍ତ ରାୟର ବିରୋଧୀ ହୋଇପାରେ ବୋଲି ଆଇନ ବିଶେଷଜ୍ଞମାନେ ମତ ଦେଉଛନ୍ତି।
ରାମ ମନ୍ଦିର ଦାନ ଅନିୟମିତତା ମାମଲାକୁ ନେଇ ସାରା ଦେଶରେ ଚର୍ଚ୍ଚା ଜାରି ଥିବା ବେଳେ, ଅଭିଯୁକ୍ତଙ୍କ ଆଇନଗତ ଅଧିକାରକୁ ନେଇ ମଧ୍ୟ ନୂଆ ବିତର୍କ ଆରମ୍ଭ ହୋଇଛି।
