ପୁଣେ ହତ୍ୟା ମାମଲାରେ ନୂଆ ମୋଡ଼: କେତନଙ୍କ ସହ ନିର୍ବନ୍ଧ ପରେ ପ୍ରେମିକ ଚେତନଙ୍କୁ ଗୁପ୍ତରେ ବିବାହ କରିଥିଲେ ସିୟା!
ପୁଣେର ଲୋହଗଡ଼ ଦୁର୍ଗରେ ରିଅଲ୍ ଏଷ୍ଟେଟ୍ ବ୍ୟବସାୟୀ କେତନ ଅଗ୍ରୱାଲଙ୍କ ସନ୍ଦେହଜନକ ମୃତ୍ୟୁ ମାମଲାରେ ଏକ ନୂଆ ତଥ୍ୟ ସାମ୍ନାକୁ ଆସିଛି। ସୂତ୍ର ଅନୁସାରେ, ଅଭିଯୁକ୍ତ ସିୟା ଗୋୟଲ ଫେବୃଆରୀରେ କେତନଙ୍କ ସହ ନିର୍ବନ୍ଧ ହେବା ପରେ ନିଜ ପ୍ରେମିକ ଚେତନ ଚୌଧୁରୀଙ୍କୁ ଗୁପ୍ତରେ ବିବାହ କରିଥିଲେ। ଏହି ବିବାହ ସ୍ଥାନୀୟ ରେଜିଷ୍ଟ୍ରାର କାର୍ଯ୍ୟାଳୟରେ ସ୍ପେଶାଲ୍ ମ୍ୟାରେଜ୍ ଆକ୍ଟ ଅନୁଯାୟୀ ହୋଇଥିବା ସନ୍ଦେହ କରାଯାଉଛି। ପୁଲିସ ବର୍ତ୍ତମାନ ଏହାର ମ୍ୟାରେଜ୍ ସାର୍ଟିଫିକେଟ୍ ରହିଛି କି ନାହିଁ, ତାହାର ଯାଞ୍ଚ କରୁଛି।
ତଦନ୍ତକାରୀ ସଂସ୍ଥା ଦାବି କରିଛି ଯେ, ସିୟା ଓ ଚେତନଙ୍କ ବିବାହ ରେଜିଷ୍ଟ୍ରେସନରେ ସାକ୍ଷୀ ଭାବେ ସହି କରିଥିବା ସିୟାଙ୍କ ଦୁଇ ଜଣ କଲେଜ ବନ୍ଧୁଙ୍କୁ ମଧ୍ୟ ପଚରାଉଚରା କରାଯାଉଛି। ଏହାସହ ସିୟାଙ୍କ ବ୍ୟକ୍ତିଗତ ଇନଷ୍ଟାଗ୍ରାମ ଆକାଉଣ୍ଟରୁ ଡିଲିଟ୍ ହୋଇଥିବା ବିବାହ ଫଟୋ ଉଦ୍ଧାର ପାଇଁ ପୁଲିସର ଟେକ୍ନିକାଲ୍ ଟିମ୍ ଉଦ୍ୟମ ଚଳାଇଛି। ଚେତନଙ୍କ ବ୍ୟାଙ୍କ ଖାତା ମଧ୍ୟ ଯାଞ୍ଚ କରାଯାଉଛି, କାରଣ ବିବାହ ପ୍ରକ୍ରିୟାକୁ ଶୀଘ୍ର ସମ୍ପନ୍ନ କରିବା ପାଇଁ କୌଣସି ମଧ୍ୟସ୍ଥଙ୍କୁ ଟଙ୍କା ଦିଆଯାଇଥିଲା କି ନାହିଁ, ସେନେଇ ସନ୍ଦେହ ରହିଛି।
ପୁଲିସର ପ୍ରାଥମିକ ତଦନ୍ତ ଅନୁସାରେ, ନଭେମ୍ବରରେ ଉଦୟପୁରରେ ହେବାକୁ ଥିବା ବିବାହ ପାଇଁ କେତନଙ୍କ ପରିବାର ସିୟାଙ୍କ ଦସ୍ତାବିଜ ମାଗିବା ପରେ ଷଡ଼ଯନ୍ତ୍ରକୁ ତ୍ୱରାନ୍ୱିତ କରାଯାଇଥିଲା। ଜୁନ୍ ୧୮ରେ ଲୋହଗଡ଼ ଦୁର୍ଗରୁ କେତନଙ୍କୁ ଠେଲି ହତ୍ୟା କରାଯାଇଥିବା ଅଭିଯୋଗରେ ସିୟା ଗୋୟଲ ଓ ଚେତନ ଚୌଧୁରୀଙ୍କୁ ଗିରଫ କରାଯାଇଛି। ବର୍ତ୍ତମାନ ଉଭୟ ନ୍ୟାୟିକ ହେପାଜତରେ ଅଛନ୍ତି ଏବଂ ମାମଲାର ତଦନ୍ତ ଜାରି ରହିଛି।
