ହର୍ମୁଜ୍ ପ୍ରଣାଳୀ ପୁଣି ବନ୍ଦ କଲା ଇରାନ; ଆମେରିକାର ନୂଆ ଆକ୍ରମଣ, ବଢ଼ିଲା ଯୁଦ୍ଧ ଆଶଙ୍କା
ତେହେରାନ/ୱାଶିଂଟନ: ହର୍ମୁଜ୍ ପ୍ରଣାଳୀ ଦେଇ ଅନୁମତି ବିନା ଯାଉଥିବା ଏକ ଜାହାଜ ଉପରେ ସତର୍କତାମୂଳକ ଗୁଳି ଚଳାଇବା ପରେ ଇରାନ ପୁଣିଥରେ ହର୍ମୁଜ୍ ପ୍ରଣାଳୀକୁ “ପରବର୍ତ୍ତୀ ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ” ବନ୍ଦ କରିଦେଇଛି। ଇରାନ କହିଛି, ଆମେରିକାର ହସ୍ତକ୍ଷେପ ଶେଷ ନହେବା ପର୍ଯ୍ୟନ୍ତ ଏହି ନିଷ୍ପତ୍ତି ବଳବତ୍ତର ରହିବ। ଏହି ଘଟଣା ପରେ ଆମେରିକା ତୃତୀୟ ପର୍ଯ୍ୟାୟ ସାମରିକ ଆକ୍ରମଣ ଆରମ୍ଭ କରିଥିବା ବେଳେ ବନ୍ଦର ଆବାସ ଓ ସିରିକ୍ ଅଞ୍ଚଳରେ ବିସ୍ଫୋରଣ ଘଟିଥିବା ସୂଚନା ମିଳିଛି।
ଆମେରିକାର ସେଣ୍ଟ୍ରାଲ କମାଣ୍ଡ ଦାବି କରିଛି ଯେ, ସାଇପ୍ରସ୍ ପତାକା ବହନ କରୁଥିବା ଏକ କଣ୍ଟେନର ଜାହାଜ ଇରାନୀ ଗୁଳିରେ କ୍ଷତିଗ୍ରସ୍ତ ହୋଇଛି ଏବଂ ଜଣେ କ୍ରୁ ସଦସ୍ୟ ନିଖୋଜ ଅଛନ୍ତି। ପ୍ରତିକ୍ରିୟାରେ ଆମେରିକା କହିଛି, ବାଣିଜ୍ୟିକ ଜାହାଜ ଉପରେ ଆକ୍ରମଣ କରିବାର ଇରାନର କ୍ଷମତାକୁ ଦୁର୍ବଳ କରିବା ପାଇଁ ଏହି ସାମରିକ ଅଭିଯାନ ଜାରି ରହିବ। ଅନ୍ୟପଟେ ଇରାନ ଦାବି କରିଛି ଯେ, ସମ୍ପୃକ୍ତ ଜାହାଜଗୁଡ଼ିକ ନିର୍ଦ୍ଦିଷ୍ଟ ରୁଟ୍ ଅନୁସରଣ କରିନଥିଲେ ଏବଂ ସତର୍କବାଣୀକୁ ଅବହେଳା କରିଥିଲେ।
ଏହି ଘଟଣା ପରେ ଆମେରିକା-ଇରାନ ମଧ୍ୟରେ ହୋଇଥିବା ଅସ୍ଥାୟୀ ଯୁଦ୍ଧବିରତି ଚୁକ୍ତି ପୁଣି ସଙ୍କଟରେ ପଡ଼ିଛି। ହର୍ମୁଜ୍ ପ୍ରଣାଳୀ ବିଶ୍ୱର ପ୍ରାୟ ୨୦ ପ୍ରତିଶତ ତୈଳ ଓ ପ୍ରାକୃତିକ ଗ୍ୟାସ୍ ପରିବହନର ପ୍ରମୁଖ ମାର୍ଗ ହୋଇଥିବାରୁ ଏହା ବନ୍ଦ ହେବା ବିଶ୍ୱ ଜଳବିଦ୍ୟୁତ ବଜାର ଓ ତୈଳ ଯୋଗାଣ ଉପରେ ବଡ଼ ପ୍ରଭାବ ପକାଇପାରେ। ଉଭୟ ପକ୍ଷର ନୂଆ ସାମରିକ ପଦକ୍ଷେପ ମଧ୍ୟପ୍ରାଚ୍ୟରେ ପୁଣିଥରେ ଉତ୍ତେଜନା ବଢ଼ାଇ ଦେଇଛି।
