ନୋଏଡାର ମାମୁରାରେ ଭୟାବହ ଅଗ୍ନିକାଣ୍ଡ; ୨ ମୃତ, ୧୦୦ରୁ ଅଧିକ ଲୋକଙ୍କୁ ସୁରକ୍ଷିତ ଉଦ୍ଧାର
ଉତ୍ତରପ୍ରଦେଶ: ଉତ୍ତରପ୍ରଦେଶ ନୋଏଡାର ସେକ୍ଟର-୬୬ ଅନ୍ତର୍ଗତ ମାମୁରା ଗାଁର ଏକ ପାଞ୍ଚ ମହଲା ବିଶିଷ୍ଟ ଆବାସିକ କୋଠାରେ ଆଜି ସକାଳେ ଏକ ଭୟାବହ ଅଗ୍ନିକାଣ୍ଡ ଘଟିଛି। ଏହି ଘଟଣାରେ ଧୂଆଁରେ ଶ୍ୱାସରୁଦ୍ଧ ହୋଇ ଜଣେ ପୁରୁଷ ଓ ଜଣେ ମହିଳାଙ୍କ ସମେତ ଦୁଇଜଣଙ୍କ ମୃତ୍ୟୁ ଘଟିଛି। ତେବେ ଅଗ୍ନିଶମ ବିଭାଗ ଓ ପୁଲିସର ତ୍ୱରିତ କାର୍ଯ୍ୟାନୁଷ୍ଠାନ ଫଳରେ କୋଠାରେ ଫସି ରହିଥିବା ପ୍ରାୟ ୫୦ଟି ପରିବାରର ୧୦୦ରୁ ଅଧିକ ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଗ୍ରାଉଣ୍ଡ ଫ୍ଲୋରରେ ଇଲେକ୍ଟ୍ରିକ୍ ଯାନ (EV) ଚାର୍ଜିଂ ସମୟରେ ସର୍ଟ ସର୍କିଟ୍ ହେବାରୁ ଏହି ଅଗ୍ନିକାଣ୍ଡ ଘଟିଥିଲା।
ପୁଲିସ ସୂଚନା ଅନୁଯାୟୀ, କୋଠାର ତଳ ମହଲାରେ ଥିବା ପାର୍କିଂ ସ୍ଥାନରେ ଏକ ଇଲେକ୍ଟ୍ରିକ୍ ଯାନ ଚାର୍ଜ ହେଉଥିବା ବେଳେ ହଠାତ୍ ସ୍ପାର୍କ ସୃଷ୍ଟି ହୋଇ ନିକଟରେ ଥିବା ଅନ୍ୟ ଯାନଗୁଡ଼ିକରେ ନିଆଁ ବ୍ୟାପିଯାଇଥିଲା। ଏହାପରେ ବିସ୍ଫୋରଣ ଘଟି ଘନ କଳା ଧୂଆଁ ସିଡ଼ି ଦେଇ ଉପର ମହଲାଗୁଡ଼ିକୁ ବ୍ୟାପିଯାଇଥିଲା। ଘଟଣାବେଳେ ଅଧିକାଂଶ ଲୋକ ଶୋଇଥିବାରୁ ଧୂଆଁରେ ଫସିଯାଇଥିଲେ। ଖବର ପାଇ ସାତଟି ଦମକଳ ଗାଡ଼ି, ଉଦ୍ଧାରକାରୀ ଯାନ ଓ ହାଇଡ୍ରୋଲିକ୍ ପ୍ଲାଟଫର୍ମ ସହ ଅଗ୍ନିଶମ ବିଭାଗର ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ସଂକୀର୍ଣ୍ଣ ଗଳି ଯୋଗୁଁ ଉଦ୍ଧାର କାର୍ଯ୍ୟରେ ପ୍ରାରମ୍ଭିକ ବାଧା ସୃଷ୍ଟି ହୋଇଥିଲେ ମଧ୍ୟ ଅଗ୍ନିଶମ କର୍ମଚାରୀମାନେ ନିକଟବର୍ତ୍ତୀ କୋଠାର ଛାତ ଓ ଝରକାକୁ ସିଡ଼ି ଲଗାଇ ପିଲା, ମହିଳା ଓ ବୃଦ୍ଧଙ୍କ ସମେତ ଅନେକ ଲୋକଙ୍କୁ ସୁରକ୍ଷିତ ଭାବେ ବାହାର କରିଥିଲେ। ଧୂଆଁରେ ଅଚେତ ହୋଇଥିବା ଦୁଇଜଣଙ୍କୁ ହସ୍ପିଟାଲକୁ ନିଆଯାଇଥିଲେ ମଧ୍ୟ ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ଅଗ୍ନିକାଣ୍ଡର ପ୍ରକୃତ କାରଣ ଜାଣିବା ପାଇଁ ପୁଲିସ ଓ ଅଗ୍ନିଶମ ବିଭାଗ ପକ୍ଷରୁ ତଦନ୍ତ ଜାରି ରହିଛି।
