ପାକିସ୍ତାନ ସେନା ଉପରେ BLAର ବଡ଼ ଆକ୍ରମଣ, ବଲୁଚିସ୍ତାନକୁ ସ୍ୱାଧୀନ ରାଷ୍ଟ୍ର ଘୋଷଣା ପରେ ଦେଖାଇଲା ଶକ୍ତି
ପାକିସ୍ତାନ: ପାକିସ୍ତାନରେ ବଲୁଚିସ୍ତାନକୁ ନେଇ ପରିସ୍ଥିତି ଦିନକୁ ଦିନ ଜଟିଳ ହେଉଛି। ଏକପଟେ ବଲୁଚିସ୍ତାନକୁ ସ୍ୱାଧୀନ ରାଷ୍ଟ୍ର ଘୋଷଣା କରାଯାଇଥିବା ଦାବିକୁ ନେଇ ଚର୍ଚ୍ଚା ଜାରି ଥିବାବେଳେ, ଅନ୍ୟପଟେ ବଲୁଚିସ୍ତାନ ଲିବରେସନ ଆର୍ମି (BLA) ପାକିସ୍ତାନ ସେନା ଉପରେ ବଡ଼ ଆକ୍ରମଣ କରିଥିବା ଦାବି କରିଛି। ଏହି ଘଟଣା ପରେ ପାକିସ୍ତାନର ସୁରକ୍ଷା ବ୍ୟବସ୍ଥା ଓ ଆଭ୍ୟନ୍ତରୀଣ ପରିସ୍ଥିତିକୁ ନେଇ ପୁଣି ଥରେ ପ୍ରଶ୍ନ ଉଠିଛି।
BLA ପକ୍ଷରୁ ଜାରି କରାଯାଇଥିବା ବିବୃତ୍ତି ଅନୁସାରେ, ବଲୁଚିସ୍ତାନର ମାସ୍ତୁଙ୍ଗ ଜିଲ୍ଲାରେ ପାକିସ୍ତାନ ସେନାର ଏକ କାନଭୟକୁ ଲକ୍ଷ୍ୟ କରି ଆକ୍ରମଣ କରାଯାଇଛି। ସଂଗଠନର ଦାବି ଅନୁଯାୟୀ, ଏହି ଆକ୍ରମଣରେ ୪୫ରୁ ଅଧିକ ସୈନିକ ନିହତ ହୋଇଥିବାବେଳେ ଅନେକ ଆହତ ହୋଇଛନ୍ତି। ଘଟଣାଟି ଗୁରୁବାର କ୍ୱେଟା–କରାଚି ରାଜପଥର ଖାଡକୁଚା ନିକଟରେ ଘଟିଥିବା କୁହାଯାଇଛି। ପାକିସ୍ତାନ ସେନା ଆକ୍ରମଣ ଘଟିଥିବା କଥା ସ୍ୱୀକାର କରିଥିଲେ ମଧ୍ୟ, ମୃତାହତଙ୍କ ସଂଖ୍ୟା ସମ୍ପର୍କରେ କୌଣସି ସରକାରୀ ସୂଚନା ଜାରି କରିନାହିଁ।
ଏହି ଘଟଣାରେ, BLAର ମୁଖପାତ୍ର ଜିୟାନ୍ଦ ବାଲୋଚ୍ କହିଛନ୍ତି ଯେ, ‘ଫତେହ ସ୍କ୍ୱାଡ୍’ସଂଗଠନର ପରିଚାଳନାରେ ଏହି ଅଭିଯାନ ଆରମ୍ଭ ହୋଇଥିଲା | ତାଙ୍କ ଦାବି ଅନୁସାରେ, କାନଭୟ ସହିତ ଘଟଣାସ୍ଥଳକୁ ପହଞ୍ଚିଥିବା ଅତିରିକ୍ତ ସେନାର ୟୁନିଟ୍ଗୁଡ଼ିକୁ ମଧ୍ୟ ଲକ୍ଷ୍ୟ କରାଯାଇଥିଲା। BLA କହିଛି, ଘଟଣା ପରେ ମଧ୍ୟ ଉଭୟ ପକ୍ଷ ମଧ୍ୟରେ ସଂଘର୍ଷ ଜାରି ରହିଛି ଏବଂ ପରିସ୍ଥିତିକୁ ଦେଖି ମୃତ୍ୟୁସଂଖ୍ୟା ବଢ଼ିପାରେ। ତେବେ ଏହି ଦାବିଗୁଡ଼ିକର ସ୍ୱାଧୀନ ଭାବେ ପୁଷ୍ଟି ହୋଇନଥିବାବେଳେ ପାକିସ୍ତାନ ସରକାର କିମ୍ବା ସେନା ପକ୍ଷରୁ ଏନେଇ ବିସ୍ତୃତ ପ୍ରତିକ୍ରିୟା ଆସିନାହିଁ।
