ଆଜି ଇତିହାସ ରଚିବ ଭାରତ; ଶ୍ରୀହରିକୋଟାରୁ ଉଡ଼ିବ ପ୍ରଥମ ପ୍ରାଇଭେଟ୍ ଅର୍ବିଟାଲ୍ ରକେଟ୍ ‘ବିକ୍ରମ-୧’
ନୂଆଦିଲ୍ଲୀ: ଭାରତୀୟ ମହାକାଶ କ୍ଷେତ୍ର ପାଇଁ ଆଜିର ଦିନ ଐତିହାସିକ ହେବାକୁ ଯାଉଛି। ହାଇଦ୍ରାବାଦ ଭିତ୍ତିକ ମହାକାଶ ଷ୍ଟାର୍ଟଅପ୍ ‘ସ୍କାଇରୁଟ୍ ଏରୋସ୍ପେସ୍’ ଆଜି ଭାରତର ପ୍ରଥମ ବେସରକାରୀ ଅର୍ବିଟାଲ୍ ରକେଟ୍ ‘ବିକ୍ରମ-୧’ର ଉତ୍କ୍ଷେପଣ କରିବ। ଆନ୍ଧ୍ରପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାୱନ ମହାକାଶ କେନ୍ଦ୍ରରୁ ମଧ୍ୟାହ୍ନ ୧୧ଟା ୩୦ ମିନିଟରେ ଏହି ରକେଟ୍ ଉଡ଼ାଣ ଭରିବ। ୨୦୨୨ ମସିହାରେ ସଫଳତାର ସହ ‘ବିକ୍ରମ-ଏସ୍’ ସବ୍-ଅର୍ବିଟାଲ୍ ରକେଟ୍ ପରୀକ୍ଷା କରିଥିବା ସ୍କାଇରୁଟ୍ ଏବେ ‘ବିକ୍ରମ-୧’ ଜରିଆରେ ଲୋ-ଅର୍ଥ ଅର୍ବିଟ୍ରେ ପେଲୋଡ୍ ସ୍ଥାପନ କରିବାକୁ ଲକ୍ଷ୍ୟ ରଖିଛି।
ଏହି ମିଶନକୁ ‘ମିଶନ ଆଗମନ’ ନାମ ଦିଆଯାଇଛି। ବିକ୍ରମ-୧ ସହ ବିଭିନ୍ନ ବୈଜ୍ଞାନିକ ଓ ପ୍ରଯୁକ୍ତିଗତ ପେଲୋଡ୍ ସହିତ ଏକ ସ୍ୱତନ୍ତ୍ର କଳାକୃତି ମଧ୍ୟ ମହାକାଶକୁ ପଠାଯିବ। ୧୮ କ୍ୟାରେଟ୍ ସୁନାରେ ନିର୍ମିତ ଏହି ମାଇକ୍ରୋ ଆର୍ଟ ପିସ୍ରେ ଭାରତର ତିନିଜଣ ପ୍ରସିଦ୍ଧ ବୈଜ୍ଞାନିକ—ଡ଼. ବିକ୍ରମ ସାରାଭାଇ, ଡ଼. ଏ.ପି.ଜେ. ଅବଦୁଲ କଲାମ ଏବଂ ସାର୍ ସି.ଭି. ରମଣଙ୍କ ସୂକ୍ଷ୍ମ ପ୍ରତିମୂର୍ତ୍ତି ଖୋଦିତ ରହିଛି। ଏହା ସହ ଅନେକ ଗବେଷଣାମୂଳକ ପେଲୋଡ୍ ମଧ୍ୟ ଏହି ମିଶନର ଅଂଶ ହୋଇଛି।
୨୩ ମିଟର ଉଚ୍ଚ ବିକ୍ରମ-୧ ରକେଟ୍ ସମ୍ପୂର୍ଣ୍ଣ କାର୍ବନ-କମ୍ପୋଜିଟ୍ ଗଠନରେ ପ୍ରସ୍ତୁତ ହୋଇଛି, ଯାହା ଏହାକୁ ହାଲୁକା ଏବଂ ଅଧିକ ଇନ୍ଧନ-ଦକ୍ଷ କରିଛି। ପ୍ରାୟ ୪୫୦ କିଲୋମିଟର ଉଚ୍ଚତାର ଲୋ-ଅର୍ଥ ଅର୍ବିଟ୍ରେ ପେଲୋଡ୍ ସ୍ଥାପନ କରିବା ଏହି ମିଶନର ପ୍ରମୁଖ ଲକ୍ଷ୍ୟ। ଏହି ସଫଳ ଉତ୍କ୍ଷେପଣ ଭାରତର ବେସରକାରୀ ମହାକାଶ କ୍ଷେତ୍ର ପାଇଁ ଏକ ନୂଆ ଅଧ୍ୟାୟର ଶୁଭାରମ୍ଭ ବୋଲି ବିବେଚନା କରାଯାଉଛି।
