ଧର୍ମେନ୍ଦ୍ର ପ୍ରଧାନ: ବିଜେପି ଶାସନରେ ସବୁଠାରୁ ଦୀର୍ଘ ସମୟ ୧,୮୪୪ ଦିନ କେନ୍ଦ୍ରୀୟ ଶିକ୍ଷାମନ୍ତ୍ରୀ ରେକର୍ଡ
ନୂଆଦିଲ୍ଲୀ: କେନ୍ଦ୍ରୀୟ ଶିକ୍ଷାମନ୍ତ୍ରୀ ପଦରୁ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ସହ ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟର ଅବସାନ ଘଟିଛି। ୭ ଜୁଲାଇ ୨୦୨୧ରୁ ୨୫ ଜୁଲାଇ ୨୦୨୬ ପର୍ଯ୍ୟନ୍ତ ସେ ମୋଟ ୧,୮୪୪ ଦିନ କେନ୍ଦ୍ରୀୟ ଶିକ୍ଷାମନ୍ତ୍ରୀ ଭାବେ ଦାୟିତ୍ୱ ନିର୍ବାହ କରିଥିଲେ। ଏହି ଅବଧି ସହ ସେ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ବିଜେପି ସରକାରରେ ସବୁଠାରୁ ଦୀର୍ଘ ସମୟ ଶିକ୍ଷାମନ୍ତ୍ରୀ ରହିଥିବା ନେତା ହୋଇଛନ୍ତି। ତାଙ୍କ ପୂର୍ବରୁ ସ୍ମୃତି ଇରାନୀ ୭୭୧ ଦିନ, ପ୍ରକାଶ ଜାଭଡେକର ୧,୦୫୯ ଦିନ ଏବଂ ରମେଶ ପୋଖରିଆଲ ‘ନିଶଙ୍କ’ ୭୬୯ ଦିନ ଏହି ପଦରେ ରହିଥିଲେ।
ଧର୍ମେନ୍ଦ୍ର ପ୍ରଧାନଙ୍କ କାର୍ଯ୍ୟକାଳରେ ନୂତନ ଜାତୀୟ ଶିକ୍ଷା ନୀତି (NEP 2020)ର କାର୍ଯ୍ୟକାରିତାକୁ ଆଗେଇ ନିଆଯାଇଥିଲା। ସ୍କୁଲ ଶିକ୍ଷାରେ ପାଠ୍ୟକ୍ରମ ସଂସ୍କାର, ମାତୃଭାଷାରେ ଶିକ୍ଷା, ଡିଜିଟାଲ ଶିକ୍ଷା ଓ ଉଚ୍ଚଶିକ୍ଷା କ୍ଷେତ୍ରରେ ବିଭିନ୍ନ ପଦକ୍ଷେପ ନିଆଯାଇଥିଲା। କିନ୍ତୁ ତାଙ୍କ କାର୍ଯ୍ୟକାଳ ବିବାଦମୁକ୍ତ ରହିନଥିଲା। ବିଭିନ୍ନ ପ୍ରବେଶିକା ପରୀକ୍ଷାକୁ ନେଇ ବିବାଦ, ପରୀକ୍ଷା ପରିଚାଳନା ଏବଂ ପ୍ରଶ୍ନପତ୍ର ଲିକ୍ ଅଭିଯୋଗକୁ କେନ୍ଦ୍ର କରି ବିରୋଧୀଙ୍କ ତୀବ୍ର ସମାଲୋଚନାର ସମ୍ମୁଖୀନ ହୋଇଥିଲେ। ଶେଷରେ ଲଗାତାର ଚାପ ମଧ୍ୟରେ ସେ ଇସ୍ତଫା ଦେଇଥିଲେ।
ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ପରେ କେନ୍ଦ୍ର ସରକାର ପ୍ରହ୍ଲାଦ ଜୋଶୀଙ୍କୁ ଶିକ୍ଷା ମନ୍ତ୍ରଣାଳୟର ଦାୟିତ୍ୱ ଦେଇଛନ୍ତି। ବିଜେପି ଶାସନକାଳରେ ସବୁଠାରୁ ଦୀର୍ଘ ସମୟ ଶିକ୍ଷାମନ୍ତ୍ରୀ ଭାବେ ଧର୍ମେନ୍ଦ୍ର ପ୍ରଧାନଙ୍କ ୧,୮୪୪ ଦିନର କାର୍ଯ୍ୟକାଳ ଏବେ ଏକ ରେକର୍ଡ ଭାବେ ଲିପିବଦ୍ଧ ହୋଇ ରହିବ।
