ରିଜର୍ଭ ବ୍ୟାଙ୍କ ପରେ କୋର୍ଟରୁ ବଡ଼ ଝଟକା; ପେଟିଏମ୍ ପେମେଣ୍ଟ ବ୍ୟାଙ୍କ ବନ୍ଦ ପାଇଁ ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦେଶ
ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (RBI) ପକ୍ଷରୁ ବ୍ୟାଙ୍କିଙ୍ଗ ଲାଇସେନ୍ସ ବାତିଲ କରାଯିବାର କିଛି ମାସ ପରେ ପେଟିଏମ୍ ପେମେଣ୍ଟ ବ୍ୟାଙ୍କକୁ ନେଇ ଆଉ ଏକ ବଡ଼ ନିଷ୍ପତ୍ତି ଆସିଛି। ଦିଲ୍ଲୀ ହାଇକୋର୍ଟ ପେଟିଏମ୍ ପେମେଣ୍ଟ ବ୍ୟାଙ୍କ ଲିମିଟେଡକୁ ବନ୍ଦ (ଲିକ୍ୱିଡେସନ) କରିବାକୁ ନିର୍ଦ୍ଦେଶ ଦେଇଛନ୍ତି। ଆରବିଆଇ ଜାରି କରିଥିବା ବିଜ୍ଞପ୍ତି ଅନୁସାରେ, ୮ ଜୁଲାଇ ଓ ୨୨ ଜୁଲାଇ ୨୦୨୬ର ଆଦେଶ ଆଧାରରେ ଦିଲ୍ଲୀ ହାଇକୋର୍ଟ ବ୍ୟାଙ୍କିଙ୍ଗ ରେଗୁଲେସନ୍ ଆକ୍ଟ, ୧୯୪୯ ଏବଂ କମ୍ପାନିଜ୍ ଆକ୍ଟ, ୨୦୧୩ ଅନୁଯାୟୀ ଏହି ନିଷ୍ପତ୍ତି ଦେଇଛନ୍ତି।
ଆରବିଆଇ ଏପ୍ରିଲ୍ ୨୦୨୬ରେ ଲଗାତାର ନିୟମ ଉଲ୍ଲଂଘନ ଏବଂ ବ୍ୟାଙ୍କର ପରିଚାଳନା ଜମାକାରୀଙ୍କ ସ୍ୱାର୍ଥ ପ୍ରତି କ୍ଷତିକାରକ ବୋଲି ଦର୍ଶାଇ ପେଟିଏମ୍ ପେମେଣ୍ଟ ବ୍ୟାଙ୍କର ବ୍ୟାଙ୍କିଙ୍ଗ ଲାଇସେନ୍ସ ବାତିଲ କରିଥିଲା। ଏହାପରେ କେନ୍ଦ୍ରୀୟ ବ୍ୟାଙ୍କ ଦିଲ୍ଲୀ ହାଇକୋର୍ଟରେ ବ୍ୟାଙ୍କକୁ ବନ୍ଦ କରିବା ପାଇଁ ଆବେଦନ କରିଥିଲା। କୋର୍ଟ ଏହି ମାମଲାରେ ଭାରତୀୟ ଷ୍ଟେଟ୍ ବ୍ୟାଙ୍କର ପୂର୍ବତନ ଚିଫ୍ ଜେନେରାଲ୍ ମ୍ୟାନେଜର ଗିରିକୁମାର ଏମ୍. ନାୟରଙ୍କୁ ଅଫିସିଆଲ୍ ଲିକ୍ୱିଡେଟର ଭାବେ ନିଯୁକ୍ତ କରିଛନ୍ତି। ୮ ଜୁଲାଇ ୨୦୨୬ରୁ ସେ ବ୍ୟାଙ୍କର ବୋର୍ଡର ସମସ୍ତ କ୍ଷମତା ବ୍ୟବହାର କରୁଛନ୍ତି।
ପେଟିଏମ୍ ପେମେଣ୍ଟ ବ୍ୟାଙ୍କ ବିରୋଧରେ ଆରବିଆଇଙ୍କ କାର୍ଯ୍ୟାନୁଷ୍ଠାନ ୨୦୨୨ରୁ ଆରମ୍ଭ ହୋଇଥିଲା। ମାର୍ଚ୍ଚ ୨୦୨୨ରେ ବ୍ୟାଙ୍କକୁ ନୂଆ ଗ୍ରାହକ ଯୋଡ଼ିବା ଉପରେ ରୋକ୍ ଲଗାଯାଇଥିଲା ଏବଂ ଏହାର ପ୍ରଯୁକ୍ତିଗତ ବ୍ୟବସ୍ଥାର ସ୍ୱାଧୀନ ଯାଞ୍ଚ ପାଇଁ ଆଇଟି ଅଡିଟ୍ କରିବାକୁ ନିର୍ଦ୍ଦେଶ ଦିଆଯାଇଥିଲା। ପରେ ୩୧ ଜାନୁଆରୀ ଓ ୧୬ ଫେବୃଆରୀ ୨୦୨୪ରେ ଆରବିଆଇ ଅଧିକ କଟକଣା ଲାଗୁ କରି ନୂଆ ଜମା ଗ୍ରହଣ, ଋଣ ପ୍ରଦାନ, ଗ୍ରାହକଙ୍କ ଖାତା, ପ୍ରିପେଡ୍ ଇନଷ୍ଟ୍ରୁମେଣ୍ଟ ଏବଂ ୱାଲେଟ୍ରେ ଟପ୍-ଅପ୍ ସୁବିଧା ବନ୍ଦ କରିଦେଇଥିଲା।
ଆରବିଆଇଙ୍କ କହିବା ଅନୁଯାୟୀ, ପେଟିଏମ୍ ପେମେଣ୍ଟ ବ୍ୟାଙ୍କର କାର୍ଯ୍ୟପରିଚାଳନା କେବଳ ନିୟାମକ ନିୟମର ଉଲ୍ଲଂଘନ କରିନଥିଲା, ବରଂ ଜମାକାରୀଙ୍କ ସ୍ୱାର୍ଥକୁ ମଧ୍ୟ ବିପଦରେ ପକାଉଥିଲା। ଏହି କାରଣରୁ ପ୍ରଥମେ ଲାଇସେନ୍ସ ବାତିଲ ଏବଂ ବର୍ତ୍ତମାନ କୋର୍ଟଙ୍କ ନିର୍ଦ୍ଦେଶ ପରେ ବ୍ୟାଙ୍କକୁ ଲିକ୍ୱିଡେସନ୍ ପ୍ରକ୍ରିୟାରେ ନେବାର ପଥ ସ୍ପଷ୍ଟ ହୋଇଛି।
