ପ୍ରଧାନମନ୍ତ୍ରୀଙ୍କୁ ନେଇ ଅପମାନଜନକ ପୋଷ୍ଟ; ଏକ୍ସ ଆକାଉଣ୍ଟକୁ ଦିଲ୍ଲୀ ପୋଲିସର ନୋଟିସ୍, ସୋସିଆଲ ମିଡିଆ ଉପରେ କଡ଼ା ନଜର
ନୂଆଦିଲ୍ଲୀ: ଛାତ୍ର ଆନ୍ଦୋଳନ ଓ ‘ସଂସଦ ଚଲୋ’ ପ୍ରତିବାଦ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସୁରକ୍ଷା ବାହିନୀଙ୍କ ବିରୋଧରେ ସୋସିଆଲ ମିଡିଆରେ ପୋଷ୍ଟ ହୋଇଥିବା ଅପମାନଜନକ ବିଷୟବସ୍ତୁକୁ ନେଇ ଦିଲ୍ଲୀ ପୋଲିସ କଡ଼ା ପଦକ୍ଷେପ ନେଇଛି। କେତେକ ସମ୍ବାଦ ପୋର୍ଟାଲ ସମେତ ଅନେକ ଏକ୍ସ (X) ଆକାଉଣ୍ଟକୁ ନୋଟିସ୍ ଜାରି କରାଯାଇଛି। ଅପମାନଜନକ ଭାଷା ବ୍ୟବହାର କରିଥିବା ପୋଷ୍ଟର ଲେଖକଙ୍କ ସମ୍ପର୍କରେ ସୂଚନା ଦେବାକୁ ପୋଲିସ ସମ୍ପୃକ୍ତ ଆକାଉଣ୍ଟଗୁଡ଼ିକୁ ନିର୍ଦ୍ଦେଶ ଦେଇଛି। କେତେଟି ଆକାଉଣ୍ଟକୁ ନୋଟିସ୍ ପଠାଯାଇଛି, ସେନେଇ ଏପର୍ଯ୍ୟନ୍ତ ସରକାରୀ ଭାବେ ସଂଖ୍ୟା ପ୍ରକାଶ କରାଯାଇନାହିଁ।
ଦିଲ୍ଲୀ ପୋଲିସ କହିଛି, ଛାତ୍ର ଆନ୍ଦୋଳନ ସମୟରେ ଓ ପରବର୍ତ୍ତୀ ହିଂସା ପରେ ସୋସିଆଲ ମିଡିଆରେ ପ୍ରଧାନମନ୍ତ୍ରୀଙ୍କ ବିରୋଧରେ ଅନେକ ଆପତ୍ତିଜନକ ମନ୍ତବ୍ୟ, ଭିଡିଓ ଓ ପୋଷ୍ଟ ପ୍ରକାଶ ପାଇଥିଲା। ଏହାକୁ ନଜରରେ ରଖି ପୋଲିସର ସୋସିଆଲ ମିଡିଆ ମନିଟରିଂ ଟିମ୍ ବିଭିନ୍ନ ଅନଲାଇନ୍ ପ୍ଲାଟଫର୍ମ ଉପରେ ଲଗାତାର ନଜର ରଖୁଛି। ଯେଉଁଠାରେ ଆଇନ ଉଲ୍ଲଂଘନ କିମ୍ବା ସାର୍ବଜନିକ ଶୃଙ୍ଖଳା ଭଙ୍ଗ ହେବାର ସମ୍ଭାବନା ଥିବା ବିଷୟବସ୍ତୁ ଚିହ୍ନଟ ହେଉଛି, ସେଠାରେ ସମ୍ପୃକ୍ତ ସୋସିଆଲ ମିଡିଆ କମ୍ପାନିଙ୍କୁ ତାହା ହଟାଇବା ପାଇଁ ନୋଟିସ୍ ପଠାଯାଉଛି।
ଏହା ପୂର୍ବରୁ ଦିଲ୍ଲୀ ପୋଲିସ ଦାବି କରିଥିଲା ଯେ, ପାକିସ୍ତାନ ସହ ଜଡିତ ୪୦୦ରୁ ଅଧିକ ସୋସିଆଲ ମିଡିଆ ହ୍ୟାଣ୍ଡେଲ୍ ଛାତ୍ର ଆନ୍ଦୋଳନକୁ ନେଇ ଭୁଲ୍ ସୂଚନା, ଗୁଜବ ଓ ଡିପ୍ଫେକ୍ ଭିଡିଓ ପ୍ରଚାର କରୁଥିଲେ। ଜୁଲାଇ ୨୦ର ‘ସଂସଦ ଚଲୋ’ ମାର୍ଚ୍ଚ ପରେ ଜନ୍ତର ମନ୍ତର ଓ ଦିଲ୍ଲୀର ବିଭିନ୍ନ ସ୍ଥାନରେ ହୋଇଥିବା ପ୍ରତିବାଦକୁ ନେଇ ଅନଲାଇନରେ ପ୍ରଚାରିତ ଆପତ୍ତିଜନକ ପୋଷ୍ଟ ହଟାଇବାକୁ ମଧ୍ୟ ପୋଲିସ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମକୁ ନିର୍ଦ୍ଦେଶ ଦେଇଥିଲା। ପୋଲିସ କହିଛି, ନୋଟିସ୍ ପରେ ଅନେକ ଅପମାନଜନକ ପୋଷ୍ଟ ଓ ଭିଡିଓ ହଟାଯାଇଛି। ଏହାସହ ସାଇବର ଓ ସୋସିଆଲ ମିଡିଆ ଟିମ୍ ଆଗାମୀ ଦିନରେ ମଧ୍ୟ ଅନଲାଇନ୍ କାର୍ଯ୍ୟକଳାପ ଉପରେ କଡ଼ା ନଜର ରଖିବ ଏବଂ ନିୟମ ଉଲ୍ଲଂଘନ କରୁଥିବା ବିଷୟବସ୍ତୁ ବିରୋଧରେ ଆବଶ୍ୟକ ଆଇନଗତ ପଦକ୍ଷେପ ନିଆଯିବ।
