ସହ ପ୍ରଶିକ୍ଷାର୍ଥୀଙ୍କୁ ଯୌନ ଉତ୍ପୀଡ଼ନ ଅଭିଯୋଗ: ହାଇଦ୍ରାବାଦରେ ପ୍ରଶିକ୍ଷଣରତ IPS ଅଧିକାରୀ ଗିରଫ
ହାଇଦ୍ରାବାଦ: ହାଇଦ୍ରାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଜାତୀୟ ପୋଲିସ ଏକାଡେମି (SVPNPA)ରେ ପ୍ରଶିକ୍ଷଣ ନେଉଥିବା ଜଣେ IPS ଅଧିକାରୀଙ୍କୁ ସହ ପ୍ରଶିକ୍ଷାର୍ଥୀ ମହିଳା ଅଧିକାରୀଙ୍କୁ ଯୌନ ଉତ୍ପୀଡ଼ନ, ପିଛା କରିବା ଓ ଧମକ ଦେବା ଅଭିଯୋଗରେ ହାଇଦ୍ରାବାଦ ପୋଲିସ ଗିରଫ କରିଛି। ଅଭିଯୁକ୍ତ ଏମ୍. ଉଦୟ କୃଷ୍ଣ ରେଡ୍ଡି (୩୩) ଆନ୍ଧ୍ରପ୍ରଦେଶର ପ୍ରକାଶମ ଜିଲ୍ଲାର ବାସିନ୍ଦା। ସେ ପୂର୍ବରୁ ଜଣେ ପୋଲିସ କନଷ୍ଟେବଳ ଭାବେ କାର୍ଯ୍ୟ କରୁଥିଲେ ଏବଂ UPSC ପରୀକ୍ଷାରେ ସଫଳତା ପାଇ ୨୦୨୫ରେ IPSରେ ଯୋଗ ଦେଇଥିଲେ। ଡିସେମ୍ବର ୨୦୨୫ରୁ ସେ SVPNPAରେ ପ୍ରଶିକ୍ଷଣ ନେଉଥିଲେ। ଜୁଲାଇ ୧୮ରେ ତାଙ୍କ ବିରୋଧରେ ଯୌନ ନିର୍ଯାତନା, ଯୌନ ଉତ୍ପୀଡ଼ନ, ପିଛା କରିବା ଓ ଧମକ ଦେବା ଅଭିଯୋଗରେ ମାମଲା ରୁଜୁ ହୋଇଥିଲା। ଜୁଲାଇ ୨୮ ରାତିରେ ଆରାମଘର କ୍ରସ୍ରୋଡ୍ ନିକଟରୁ ତାଙ୍କୁ ଗିରଫ କରାଯିବା ପରେ ବୁଧବାର ଅଦାଲତରେ ହାଜର କରାଯାଇଥିଲା। ଅଦାଲତ ତାଙ୍କୁ ୧୪ ଦିନିଆ ନ୍ୟାୟିକ ହେପାଜତକୁ ପଠାଇଛନ୍ତି।
ପୋଲିସ କହିଛି, ୨୦୨୫ ମଧ୍ୟଭାଗରେ ସୋସିଆଲ ମିଡିଆ ମାଧ୍ୟମରେ ଅଭିଯୁକ୍ତ ଓ ପୀଡ଼ିତାଙ୍କ ମଧ୍ୟରେ ପରିଚୟ ହୋଇଥିଲା। IPSରେ ଚୟନ ହେବା ଯାତ୍ରା ସମ୍ପର୍କିତ ତାଙ୍କ ପୋଷ୍ଟକୁ ପୀଡ଼ିତା ପ୍ରତିକ୍ରିୟା ଦେବା ପରେ ଉଭୟଙ୍କ ମଧ୍ୟରେ ଯୋଗାଯୋଗ ବଢ଼ିଥିଲା। ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। କିନ୍ତୁ ପ୍ରଶିକ୍ଷଣ ସମୟରେ ଅଭିଯୁକ୍ତଙ୍କ ବ୍ୟବହାର କ୍ରମଶଃ ଆକ୍ରମଣାତ୍ମକ ହୋଇଯାଇଥିଲା। ସେ ବାରମ୍ବାର ଆତ୍ମହତ୍ୟା କରିବାର ଧମକ ଦେବା, ଅସ୍ତ୍ର ଦେଖାଇ ଭୟଭୀତ କରିବା, ପୀଡ଼ିତାଙ୍କୁ ଅପମାନ କରିବା, ଏକାଧିକ ସମ୍ପର୍କ ରଖିବାକୁ ଚାପ ପକାଇବା, ଲାପଟପ୍ ଫିଙ୍ଗି ନଷ୍ଟ କରିବା, ବ୍ଲକ୍ କରାଯିବା ପରେ ନକଲି ସୋସିଆଲ ମିଡିଆ ଆକାଉଣ୍ଟ ଖୋଲିବା, ବ୍ୟକ୍ତିଗତ ଚାଟ୍ ସାର୍ବଜନୀନ କରିବାକୁ ଧମକ ଦେବା ଏବଂ ପୀଡ଼ିତାଙ୍କ ସମ୍ମତି ବିନା ତାଙ୍କ ପରିବାର ଓ ସହକର୍ମୀଙ୍କ ସହ ଯୋଗାଯୋଗ କରି ହଇରାଣ କରୁଥିବା ଅଭିଯୋଗ ହୋଇଛି।
ପୋଲିସ ଅନୁସାରେ, ଅଭିଯୁକ୍ତଙ୍କ ଏପରି ବ୍ୟବହାରରେ ଅତିଷ୍ଠ ହୋଇ ପୀଡ଼ିତା ସମ୍ପର୍କ ଛିନ୍ନ କରି ପରେ ଅନ୍ୟ ଜଣଙ୍କୁ ବିବାହ କରିଥିଲେ। ଏହାପରେ ମଧ୍ୟ ଅଭିଯୁକ୍ତ ତାଙ୍କୁ ବିଭିନ୍ନ ଉପାୟରେ ହଇରାଣ କରିବା ଜାରି ରଖିଥିଲେ। ପୀଡ଼ିତାଙ୍କ ଅଭିଯୋଗ ଆଧାରରେ ପୋଲିସ ଭାରତୀୟ ନ୍ୟାୟ ସଂହିତା (BNS)ର ମହିଳାଙ୍କୁ ଯୌନ ଉତ୍ପୀଡ଼ନ, ପିଛା କରିବା ଓ ଧମକ ସମ୍ପର୍କିତ ବିଭିନ୍ନ ଧାରା ସହ ସୂଚନା ପ୍ରଯୁକ୍ତି ଆଇନ ଅନୁଯାୟୀ ମାମଲା ରୁଜୁ କରିଥିଲା। ତଦନ୍ତ ପରେ ଅଭିଯୁକ୍ତଙ୍କ ବିରୋଧରେ ପ୍ରାଥମିକ ପ୍ରମାଣ ମିଳିଥିବାରୁ ତାଙ୍କୁ ଗିରଫ କରାଯାଇଥିଲା। ତେବେ ଅଭିଯୁକ୍ତ ସୋସିଆଲ ମିଡିଆରେ ସମସ୍ତ ଅଭିଯୋଗକୁ ଭିତ୍ତିହୀନ ବୋଲି ଦାବି କରିଥିବା ବେଳେ, FIR ରଦ୍ଦ ପାଇଁ ତେଲେଙ୍ଗାନା ହାଇକୋର୍ଟରେ ଆବେଦନ କରିଛନ୍ତି। ବୁଧବାର ହାଇକୋର୍ଟ ଏହି ମାମଲାର ପରବର୍ତ୍ତୀ ଶୁଣାଣିକୁ ଚାରି ସପ୍ତାହ ପାଇଁ ସ୍ଥଗିତ ରଖିଛନ୍ତି। ପୋଲିସ ପକ୍ଷରୁ ମାମଲାର ଅଧିକ ତଦନ୍ତ ଜାରି ରହିଛି।
