ବାଙ୍କିପୁର ଉପନିର୍ବାଚନରେ ଜାରି ରହିଛି ମତଦାନ ପ୍ରକ୍ରିୟା, ପ୍ରଶାନ୍ତ କିଶୋରଙ୍କ ପାଇଁ ଅଗ୍ନିପରୀକ୍ଷା!
ପାଟନା: ବିହାରର ବାଙ୍କିପୁର ବିଧାନସଭା ଆସନ ପାଇଁ ଗୁରୁବାର ଅର୍ଥାତ ଆଜି ସକାଳ ୭ଟାରୁ ମତଦାନ ଆରମ୍ଭ ହୋଇଛି। ଭୋଟ ଗ୍ରହଣ ପୂର୍ବରୁ ଜନ ସୁରାଜ ଦଳର କର୍ମୀଙ୍କୁ ପୋଲିସ ଅଟକ ରଖିବା ଘଟଣାକୁ ନେଇ ବିଳମ୍ବିତ ରାତି ପର୍ଯ୍ୟନ୍ତ ଉତ୍ତେଜନା ଦେଖାଦେଇଥିଲା। ଏହି ଉପନିର୍ବାଚନକୁ ଜନ ସୁରାଜର ପ୍ରତିଷ୍ଠାତା ପ୍ରଶାନ୍ତ କିଶୋରଙ୍କ ପାଇଁ ଏକ ବଡ଼ ରାଜନୈତିକ ପରୀକ୍ଷା ଭାବେ ଦେଖାଯାଉଛି। ବାଙ୍କିପୁର ଆସନରେ ପ୍ରାୟ ୩.୮୦ ଲକ୍ଷ ମତଦାତା ୨୬ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ।
ଏହି ଉପନିର୍ବାଚନରେ ବିଜେପି, ରାଷ୍ଟ୍ରୀୟ ଜନତା ଦଳ (RJD) ଏବଂ ପ୍ରଶାନ୍ତ କିଶୋରଙ୍କ ଜନ ସୁରାଜ ମଧ୍ୟରେ ତ୍ରିମୁଖୀ ଲଢ଼େଇ ହେଉଛି। ବିହାର ମନ୍ତ୍ରୀ ରାମ କୃପାଲ ଯାଦବ ଦାବି କରିଛନ୍ତି ଯେ ବାଙ୍କିପୁରର ମତଦାତାମାନେ ବିଜେପି ନେତୃତ୍ୱାଧୀନ NDA ସପକ୍ଷରେ ବିପୁଳ ମତଦାନ କରୁଛନ୍ତି ଏବଂ “ସମସ୍ତେ ପଦ୍ମ ଚିହ୍ନରେ ଭୋଟ ଦେଉଛନ୍ତି”। ଅନ୍ୟପଟେ ବିରୋଧୀ ଦଳମାନେ ମଧ୍ୟ ନିଜ ନିଜ ବିଜୟ ନେଇ ଆଶାବାଦୀ ରହିଛନ୍ତି।
ବିଜେପି ବିଧାୟକ ନିତିନ ନବୀନ ଚଳିତ ବର୍ଷ ଦଳର ଜାତୀୟ ସଭାପତି ହେବା ପରେ ଏପ୍ରିଲ ମାସରେ ରାଜ୍ୟସଭାକୁ ନିର୍ବାଚିତ ହୋଇଥିଲେ। ଏହା ପରେ ବାଙ୍କିପୁର ବିଧାନସଭା ଆସନ ଖାଲି ପଡ଼ିଥିଲା, ଯାହା ପାଇଁ ଏହି ଉପନିର୍ବାଚନ ଅନୁଷ୍ଠିତ ହେଉଛି। ମତଦାନ ଶେଷ ହେବା ପରେ ଭୋଟ ଗଣତିରେ କିଏ ବାଜି ମାରୁଛି ଏବଂ ପ୍ରଶାନ୍ତ କିଶୋରଙ୍କ ନିର୍ବାଚନୀ ଅଭିଯାନ କେତେ ସଫଳ ହେଉଛି, ତାହା ଉପରେ ସମସ୍ତଙ୍କ ନଜର ରହିଛି।
