ବେଙ୍ଗାଲୁରୁରେ ବିହାରର ମହିଳାଙ୍କୁ ହତ୍ୟା; ଚାଦରରେ ଗୁଡ଼ାଇ ଘରେ ଲୁଚାଇ ଫେରାର ହେଲା ସ୍ୱାମୀ
ବେଙ୍ଗାଲୁରୁ: ବେଙ୍ଗାଲୁରୁ ଉପକଣ୍ଠରେ ଜଣେ ପ୍ରବାସୀ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ସାମ୍ନାକୁ ଆସିଛି। ମୃତକ ହେଲେ ବିହାରର ରୀମା କୁମାରୀ। ଅଭିଯୋଗ ଅନୁସାରେ, ତାଙ୍କ ସ୍ୱାମୀ ଧୀରଜ କୁମାର ତାଙ୍କୁ ହତ୍ୟା କରିବା ପରେ ମୃତଦେହକୁ ଏକ ଚାଦରରେ ଗୁଡ଼ାଇ ଘର ଭିତରେ ଲୁଚାଇ ରଖି ଫେରାର ହୋଇଯାଇଥିଲେ। ପ୍ରାୟ ପାଞ୍ଚ ଦିନ ପରେ ଘରୁ ଦୁର୍ଗନ୍ଧ ବାହାରିବାରୁ ଘଟଣା ସାମ୍ନାକୁ ଆସିଥିଲା। ଏହି ଘଟଣା ବେଙ୍ଗାଲୁରୁ-ମୈସୁରୁ ଏକ୍ସପ୍ରେସୱେ ନିକଟସ୍ଥ କୁମ୍ବଳଗୋଡୁ ଥାନା ଅଞ୍ଚଳରେ ଘଟିଛି।
ପୁଲିସ ସୂଚନା ଅନୁସାରେ, ଦମ୍ପତି ପ୍ରାୟ ଏକ ବର୍ଷ ପୂର୍ବରୁ ବିହାରରୁ ବେଙ୍ଗାଲୁରୁ ଆସି ଏକ କାରଖାନାରେ କାମ କରୁଥିଲେ। ରୀମା କିଛି ଦିନ ଧରି କାମକୁ ନଆସିବାରୁ ତାଙ୍କ ସହକର୍ମୀ ଘରକୁ ଯାଇଥିଲେ। ସେଠାରୁ ଦୁର୍ଗନ୍ଧ ବାହାରୁଥିବା ଦେଖି ଘରମାଲିକଙ୍କୁ ଖବର ଦିଆଯାଇଥିଲା। ଘର ଖୋଲିବା ପରେ ଶୌଚାଳୟ ନିକଟରେ ଚାଦରରେ ଗୁଡ଼ାଯାଇଥିବା ରୀମାଙ୍କ ପଚିଯାଇଥିବା ମୃତଦେହ ଉଦ୍ଧାର ହୋଇଥିଲା। ପ୍ରାଥମିକ ତଦନ୍ତରୁ ରବିବାର ଦିନ ହତ୍ୟା ହୋଇଥିବା ସନ୍ଦେହ କରାଯାଉଛି।
ପୁଲିସର ସନ୍ଦେହ, ହତ୍ୟା ପରେ ଧୀରଜ କୁମାର ବିହାରକୁ ଫେରାର ହୋଇଯାଇଛନ୍ତି। ତାଙ୍କୁ ଧରିବା ପାଇଁ ସ୍ୱତନ୍ତ୍ର ତଲାସି ଅଭିଯାନ ଚାଲିଛି। ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିବା ବେଳେ ପୁଲିସ ସିସିଟିଭି ଫୁଟେଜ୍ ଯାଞ୍ଚ କରିବା ସହ ଅନ୍ୟାନ୍ୟ ପ୍ରମାଣ ସଂଗ୍ରହ କରୁଛି। ହତ୍ୟାର ପ୍ରକୃତ କାରଣ ଜାଣିବା ପାଇଁ ତଦନ୍ତ ଜାରି ରହିଛି।
