କିଭ୍ ସମେତ ୟୁକ୍ରେନର ଏକାଧିକ ସହର ଉପରେ କ୍ଷେପଣାସ୍ତ୍ର ମାଡ଼ କଲା ରୁଷ; ଆକ୍ରମଣ ପୂର୍ବରୁ ସତର୍କ କରିଥିଲେ ଜେଲେନସ୍କି
ନୂଆଦିଲ୍ଲୀ: ରୁଷ ପୁଣିଥରେ ୟୁକ୍ରେନ ଉପରେ ବ୍ୟାପକ କ୍ଷେପଣାସ୍ତ୍ର ଆକ୍ରମଣ କରିଛି। ଗୁରୁବାର ରାଜଧାନୀ କିଭ୍ ସମେତ ଡିନପ୍ରୋ ଓ କ୍ରିଭି ରିହ ଭଳି ଏକାଧିକ ସହରକୁ ଟାର୍ଗେଟ୍ କରି ଏହି ଆକ୍ରମଣ କରାଯାଇଛି। ୟୁକ୍ରେନୀୟ ବାୟୁସେନାର ସୂଚନା ଅନୁସାରେ, ରୁଷୀୟ ବିମାନରୁ ଏକାଧିକ କ୍ରୁଜ୍ କ୍ଷେପଣାସ୍ତ୍ର ନିକ୍ଷେପ କରାଯାଇଥିଲା। କିଭ୍ର ସାମରିକ ପ୍ରଶାସନ କହିଛି ଯେ, ଏହି ଆକ୍ରମଣରେ ଅତି କମରେ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଛି। ପରିସ୍ଥିତିକୁ ଦୃଷ୍ଟିରେ ରଖି କିଭ୍ର ମେୟର ନାଗରିକମାନଙ୍କୁ ସୁରକ୍ଷିତ ବଙ୍କର ଓ ଆଶ୍ରୟସ୍ଥଳରେ ରହିବାକୁ ଅନୁରୋଧ କରିଛନ୍ତି।
ଏହି ଆକ୍ରମଣର କିଛି ସମୟ ପୂର୍ବରୁ ୟୁକ୍ରେନର ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଦେଶବାସୀଙ୍କୁ ବଡ଼ ରୁଷୀୟ ଆକ୍ରମଣ ନେଇ ସତର୍କ କରିଥିଲେ। ସେ କହିଥିଲେ, ରୁଷ ସେନା ଏକ ବ୍ୟାପକ ଆକ୍ରମଣ ପାଇଁ ପ୍ରସ୍ତୁତି କରୁଛି। ଜେଲେନସ୍କି ଆହୁରି କହିଥିଲେ ଯେ, ୟୁକ୍ରେନର ସୁରକ୍ଷା ପାଇଁ ଆମେରିକା ଓ ଅନ୍ୟ ପାଶ୍ଚାତ୍ୟ ସହଯୋଗୀଙ୍କ ପାଖରେ ଥିବା ‘ପାଟ୍ରିଅଟ୍’ ବାୟୁ ପ୍ରତିରକ୍ଷା କ୍ଷେପଣାସ୍ତ୍ର ବ୍ୟବସ୍ଥା ଅତ୍ୟନ୍ତ ଜରୁରୀ ଏବଂ ଏହାର ସହାୟତା ଉପରେ ଅନେକ ନାଗରିକଙ୍କ ଜୀବନ ନିର୍ଭର କରୁଛି।
ଅନ୍ୟପକ୍ଷରେ, ରୁଷ ରାଷ୍ଟ୍ରପତି ଭ୍ଲାଡିମିର ପୁଟିନ୍ ୟୁକ୍ରେନରେ ଚାଲିଥିବା ସାମରିକ ଅଭିଯାନକୁ ପୁଣିଥରେ ସମର୍ଥନ କରିଛନ୍ତି। ସେ କହିଛନ୍ତି, ରୁଷ ନିଜର ସମସ୍ତ ସାମରିକ ଲକ୍ଷ୍ୟ ହାସଲ କରିବ ଏବଂ ଅଭିଯାନ ଜାରି ରହିବ। ଏହି ନୂତନ କ୍ଷେପଣାସ୍ତ୍ର ଆକ୍ରମଣ ପରେ ୟୁକ୍ରେନ-ରୁଷ ଯୁଦ୍ଧ ଆହୁରି ତୀବ୍ର ହେବାର ଆଶଙ୍କା ବଢ଼ିଥିବା ବେଳେ ଅନ୍ତର୍ଜାତୀୟ ସମୁଦାୟ ମଧ୍ୟ ପରିସ୍ଥିତି ଉପରେ କଡ଼ା ନଜର ରଖିଛି।
