ପ୍ରଧାନମନ୍ତ୍ରୀଙ୍କ ବିରୋଧରେ ଅପଶବ୍ଦ ପ୍ରସଙ୍ଗରେ ଭିଡିଓ କରି କ୍ଷମା ପ୍ରାର୍ଥନା କଲେ ଛାତ୍ରୀ: କହିଲେ ‘ମୋର ବଡ଼ ଭୁଲ୍ ହୋଇଗଲା’
ନୂଆଦିଲ୍ଲୀ: ଦିଲ୍ଲୀର ଜନ୍ତର ମନ୍ତରରେ ଗତ ଜୁଲାଇ ୨୩ରେ ଆୟୋଜିତ ପ୍ରତିବାଦ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୋଧରେ ଅଶାଳୀନ ଭାଷା ବ୍ୟବହାର କରିଥିବା ଅଭିଯୋଗରେ ଚର୍ଚ୍ଚାକୁ ଆସିଥିବା ରୁଚିକା ସିଂହଙ୍କ ଏକ କ୍ଷମା ପ୍ରାର୍ଥନା ଭିଡିଓ ସାମ୍ନାକୁ ଆସିଛି। ଭାଇରାଲ୍ ଭିଡିଓରେ ସେ ନିଜକୁ ୧୫ ବର୍ଷ ବୟସର ନାବାଳିକା ବୋଲି କହିବା ସହ ହାତ ଯୋଡ଼ି କ୍ଷମା ମାଗୁଥିବା ଦେଖିବାକୁ ମିଳିଛି। ସେ କହିଛନ୍ତି ଯେ, କନଟ୍ ପ୍ଲେସ୍ ବୁଲିବାକୁ ଯାଇଥିବା ବେଳେ ସାଙ୍ଗମାନଙ୍କ ସହ ପ୍ରତିବାଦ ସ୍ଥଳରେ ପହଞ୍ଚିଥିଲେ ଏବଂ ସେଠାର ପରିବେଶର ପ୍ରଭାବରେ ଆସି ଅନୁଚିତ ମନ୍ତବ୍ୟ କରିଦେଇଥିଲେ।
ରୁଚିକା ଭିଡିଓରେ କହିଛନ୍ତି ଯେ, ଏହା ତାଙ୍କ ଜୀବନର ସବୁଠାରୁ ବଡ଼ ଭୁଲ୍ ଏବଂ ଏପରି ଘଟଣା ଆଉ କେବେ ଦୋହରାଇବେ ନାହିଁ। ସେ ନିଜ କାର୍ଯ୍ୟ ପାଇଁ ଲଜ୍ଜିତ ବୋଲି ମଧ୍ୟ ପ୍ରକାଶ କରିଛନ୍ତି। ଉଲ୍ଲେଖଯୋଗ୍ୟ ଯେ, ପ୍ରଧାନମନ୍ତ୍ରୀ ମୋଦୀ ଶୁକ୍ରବାର ଇନଷ୍ଟାଗ୍ରାମରେ ଏକ ପୋଷ୍ଟ କରି ସମ୍ପୃକ୍ତ ଛାତ୍ରଛାତ୍ରୀଙ୍କୁ କ୍ଷମା କରିଥିବା କହିବାର କିଛି ଘଣ୍ଟା ପରେ ଏହି ଭିଡିଓ ସାମ୍ନାକୁ ଆସିଛି। ଏହା ପୂର୍ବରୁ ଜୁଲାଇ ୨୯ରେ ନୋଏଡାର ଏକ୍ସପ୍ରେସୱେ ଥାନାରେ ରୁଚିକାଙ୍କ ବିରୋଧରେ ଜିରୋ ଏଫ୍ଆଇଆର୍ ରୁଜୁ କରାଯାଇଥିଲା। ପରେ ମାମଲାଟି ଦିଲ୍ଲୀର ପାର୍ଲାମେଣ୍ଟ ଷ୍ଟ୍ରିଟ୍ ଥାନାକୁ ହସ୍ତାନ୍ତର କରାଯାଇଛି।
ଅନ୍ୟପଟେ, ପ୍ରତିବାଦର ଆୟୋଜକ ‘କୋକ୍ରୋଚ୍ ଜନତା ପାର୍ଟି’ ଏହି ଘଟଣାକୁ ନେଇ ରୁଜୁ ହୋଇଥିବା ଅପରାଧିକ ମାମଲାକୁ ବିରୋଧ କରିଛି। ଦଳର ମୁଖପାତ୍ର ସୌରଭ ଦାସ କହିଛନ୍ତି ଯେ, ଅଶାଳୀନ ଭାଷା କୌଣସି ପରିସ୍ଥିତିରେ ଗ୍ରହଣୀୟ ନୁହେଁ, କିନ୍ତୁ ଏହାକୁ ନେଇ ଅପରାଧିକ ମାମଲା ରୁଜୁ କରିବା ବାକ୍ ସ୍ୱାଧୀନତା ପ୍ରତି ବିପଦ ସୃଷ୍ଟି କରିପାରେ। ତାଙ୍କ ମତରେ, ଏପରି ମାମଲାରେ ଆବଶ୍ୟକ ହେଲେ ମାନହାନି ଆଇନ ଅନୁସାରେ ପଦକ୍ଷେପ ନିଆଯାଇପାରିଥାନ୍ତା।
