ରାମ ମନ୍ଦିର ଦାନ ହୁଣ୍ଡି ବିବାଦ: ସଂସଦରେ ନାଟକୀୟ ପ୍ରତିବାଦ ପରେ ପପ୍ପୁ ଯାଦବଙ୍କ ବିରୋଧରେ ଅଭିଯୋଗ
ନୂଆଦିଲ୍ଲୀ: ରାମ ମନ୍ଦିରର ଦାନ ପାଣ୍ଠି ଆତ୍ମସାତ୍ ଅଭିଯୋଗକୁ ନେଇ ସଂସଦ ପରିସରରେ ହୋଇଥିବା ନାଟକୀୟ ପ୍ରତିବାଦ ପରେ ପୂର୍ଣ୍ଣିଆର ସ୍ୱାଧୀନ ସାଂସଦ ରାଜେଶ ରଞ୍ଜନ ଓରଫ ପପ୍ପୁ ଯାଦବଙ୍କ ବିରୋଧରେ ଦିଲ୍ଲୀର ଜହାଙ୍ଗୀରପୁରୀ ଥାନାରେ ଅଭିଯୋଗ ଦାଖଲ ହୋଇଛି। ଅଭିଯୋଗକାରୀ ସୂର୍ଯ୍ୟ ମୈଥିଲ ଦାବି କରିଛନ୍ତି ଯେ, ପ୍ରତିବାଦ ସମୟରେ ପପ୍ପୁ ଯାଦବ ଧାର୍ମିକ ପ୍ରତୀକର ଅପମାନ କରିଥିଲେ, ଯାହା ସନାତନ ଧର୍ମାବଲମ୍ବୀଙ୍କ ଧାର୍ମିକ ଭାବନାକୁ ଆଘାତ ପହଞ୍ଚାଇଛି। ଏହି ପ୍ରତିବାଦକୁ ବିରୋଧୀ INDIA ମେଣ୍ଟର ଅନେକ ସାଂସଦ ମଧ୍ୟ ସମର୍ଥନ କରିଥିଲେ।
ଶୁକ୍ରବାର ସଂସଦ ପରିସରରେ ବିରୋଧୀ ସାଂସଦମାନେ ଏକ ନୁକ୍କଡ଼ ନାଟକ ମାଧ୍ୟମରେ କେନ୍ଦ୍ର ସରକାରକୁ ଟାର୍ଗେଟ କରିଥିଲେ। ଗେରୁଆ ବସ୍ତ୍ର ପରିଧାନ କରି ପପ୍ପୁ ଯାଦବ ଜଣେ ପୂଜକର ଭୂମିକାରେ ଅଭିନୟ କରି ଦାନ ବାକ୍ସରେ ପଡ଼ୁଥିବା ଟଙ୍କାକୁ ନିଜ ପକେଟରେ ରଖୁଥିବା ଦୃଶ୍ୟ ପ୍ରଦର୍ଶନ କରିଥିଲେ। ରାହୁଲ ଗାନ୍ଧୀଙ୍କ ସମେତ ବିରୋଧୀ ସାଂସଦମାନେ ଏହି ନାଟକରେ ଭକ୍ତଙ୍କ ଭୂମିକାରେ ଅଭିନୟ କରି ଦାନ କରୁଥିବା ବେଳେ ‘ଚନ୍ଦା ଚୋର, ଗଦ୍ଦି ଛୋଡ଼’ ଓ ‘ଅମିତ ଶାହ, ସଦନକୁ ଆସ’ ଭଳି ସ୍ଲୋଗାନ ଦେଇଥିଲେ। ବିରୋଧୀଙ୍କ କହିବା ଅନୁସାରେ, ଏହି ପ୍ରତୀକାତ୍ମକ ପ୍ରତିବାଦର ଉଦ୍ଦେଶ୍ୟ ଅଯୋଧ୍ୟାରେ ଦାନ ପାଣ୍ଠି ପରିଚାଳନାକୁ ନେଇ ଉଠିଥିବା ଅଭିଯୋଗ ଉପରେ ସଂସଦରେ ଆଲୋଚନା ଦାବି କରିବା ଥିଲା।
ଘଟଣା ପରେ ଲୋକସଭା ସଚିବାଳୟ ସଂସଦ ପରିସରରେ ବେଶଭୂଷା ପରିବର୍ତ୍ତନ କରି କିମ୍ବା ନାଟକୀୟ ଉପାୟରେ ପ୍ରତିବାଦ କରିବାକୁ କଡ଼ା ଆପତ୍ତି ଜଣାଇଛି। ସୂଚନା ଅନୁଯାୟୀ, ଲୋକସଭା ବାଚସ୍ପତି ଓମ ବିର୍ଲା ଏହି ଘଟଣାକୁ ନେଇ ଅସନ୍ତୋଷ ପ୍ରକାଶ କରିଥିବା ବେଳେ ବର୍ତ୍ତମାନର ନିୟମାବଳୀକୁ କଡ଼ାକଡ଼ି ଭାବେ ଲାଗୁ କରିବାକୁ ପ୍ରସ୍ତୁତି ଚାଲିଛି। ଅନ୍ୟପଟେ କେନ୍ଦ୍ରମନ୍ତ୍ରୀ ଗିରିରାଜ ସିଂହ ବିରୋଧୀଙ୍କ ଏହି ପ୍ରତିବାଦକୁ ସନାତନ ଧର୍ମର ଅପମାନ ବୋଲି କହି ତୀବ୍ର ସମାଲୋଚନା କରିଛନ୍ତି।
