ଭାରତ-ପାକର ସଂଘର୍ଷ ବନ୍ଦ କରାଇବାର ପୁଣିଥରେ ନିଜକୁ ଶ୍ରେୟ ଦେଲେ ଟ୍ରମ୍ପ; ଦେଇଥିଲେ ଶୁଳ୍କର ଧମକ!
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣିଥରେ ଭାରତ-ପାକିସ୍ତାନ ସଂଘର୍ଷ ବନ୍ଦ କରାଇବାର ଶ୍ରେୟ ନିଜକୁ ଦେଇଛନ୍ତି। କ୍ୟାମ୍ପ ଡେଭିଡ୍ରେ ଦିଆଯାଇଥିବା ଏକ ଭାଷଣରେ ସେ କହିଛନ୍ତି ଯେ, ଉଭୟ ଦେଶ ସଂଘର୍ଷ ବନ୍ଦ ନ କଲେ ୨୫୦ ପ୍ରତିଶତ ଶୁଳ୍କ ଲାଗୁ କରିବାକୁ ସେ ଧମକ ଦେଇଥିଲେ। ଶୁଳ୍କକୁ ସେ ଏକ କୂଟନୈତିକ ଅସ୍ତ୍ର ଭାବେ ବ୍ୟବହାର କରିଥିବା ଦାବି କରି ଟ୍ରମ୍ପ କହିଛନ୍ତି, ଏହା ପରେ ଉଭୟ ପକ୍ଷ ସଂଘର୍ଷ ବନ୍ଦ କରିବାକୁ ରାଜି ହୋଇଥିଲେ। ସେ ଏହା ମଧ୍ୟ ଦାବି କରିଛନ୍ତି ଯେ, ଭାରତ-ପାକିସ୍ତାନ ସଂଘର୍ଷ ସମୟରେ ୧୧ଟି ବିମାନ ଗୁଳି କରି ଖସାଯାଇଥିଲା।
ଟ୍ରମ୍ପଙ୍କ କହିବା ଅନୁଯାୟୀ, ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ୍ ସରିଫ ତାଙ୍କୁ ଫୋନ୍ କରି ଦୁଇଟି ପରମାଣୁ ଶକ୍ତିଧର ଦେଶ ମଧ୍ୟରେ ଯୁଦ୍ଧ ଏଡ଼ାଇ ଲକ୍ଷାଧିକ ଲୋକଙ୍କ ଜୀବନ ବଞ୍ଚାଇଥିବା ପାଇଁ ଧନ୍ୟବାଦ ଜଣାଇଥିଲେ। ଟ୍ରମ୍ପ ଦାବି କରିଛନ୍ତି ଯେ, ନିଜ ରାଷ୍ଟ୍ରପତିତ୍ୱ ସମୟରେ ସେ ମୋଟ ଆଠଟି ଯୁଦ୍ଧ ବନ୍ଦ କରିଛନ୍ତି। ତେବେ ଏହି ଦାବିକୁ ଭାରତ ପୁଣିଥରେ ଖଣ୍ଡନ କରିଛି। ଭାରତ ସ୍ପଷ୍ଟ କରିଛି ଯେ, ଭାରତ-ପାକିସ୍ତାନ ମଧ୍ୟରେ ହୋଇଥିବା ଅସ୍ତ୍ରବିରତିରେ କୌଣସି ତୃତୀୟ ପକ୍ଷର ମଧ୍ୟସ୍ଥତା ନଥିଲା ଏବଂ ଏହା ଦୁଇ ଦେଶର ସାମରିକ ଅଧିକାରୀଙ୍କ ମଧ୍ୟରେ ସିଧାସଳଖ ଆଲୋଚନା ପରେ ହୋଇଥିଲା।
ଭାରତ ସରକାରଙ୍କ ମତାନୁସାରେ, ପାକିସ୍ତାନର ସାମରିକ ଅଭିଯାନ ମହାନିର୍ଦ୍ଦେଶକ (DGMO) ଭାରତୀୟ ପ୍ରତିପକ୍ଷଙ୍କ ସହ ଯୋଗାଯୋଗ କରିବା ପରେ ହିଁ ‘ଅପରେସନ୍ ସିନ୍ଦୂର’ ସମୟରେ ଅସ୍ତ୍ରବିରତି ଲାଗୁ କରାଯାଇଥିଲା। ପହଲଗାମ୍ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ପରେ ଭାରତ ଗତବର୍ଷ ମେ’ ୭ରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଥିବା ଆତଙ୍କବାଦୀ ଘାଟି ଉପରେ ‘ଅପରେସନ୍ ସିନ୍ଦୂର’ ଆରମ୍ଭ କରିଥିଲା। ମେ’ ୧୦ ପର୍ଯ୍ୟନ୍ତ ଚାଲିଥିବା ସାମରିକ ମୁହାଁମୁହିଁ ପରେ ପରିସ୍ଥିତି ସ୍ୱାଭାବିକ ହୋଇଥିଲା। ଟ୍ରମ୍ପ ଏହି ଘଟଣାକୁ ନେଇ ବାରମ୍ବାର ନିଜକୁ ଶ୍ରେୟ ଦେଉଥିବା ବେଳେ ଭାରତ ତାଙ୍କ ଦାବିକୁ ଲଗାତାର ଅସ୍ୱୀକାର କରିଆସୁଛି।
