ଚଣ୍ଡିଗଡ଼ରେ ଉଚ୍ଛେଦ କାର୍ଯ୍ୟାନୁଷ୍ଠାନ ବେଳେ ଗୁଳିକାଣ୍ଡ; ଘର ମାଲିକାଣୀଙ୍କ ମୁହଁକୁ ଗୁଳି କଲେ ଓକିଲ ଭଡ଼ାଟିଆ
ଚଣ୍ଡିଗଡ଼: ଚଣ୍ଡିଗଡ଼ ସେକ୍ଟର-୪୨ରେ କୋର୍ଟଙ୍କ ନିର୍ଦ୍ଦେଶରେ ଚାଲିଥିବା ଏକ ଉଚ୍ଛେଦ କାର୍ଯ୍ୟାନୁଷ୍ଠାନ ବେଳେ ଶନିବାର ଚାଞ୍ଚଲ୍ୟକର ଗୁଳିକାଣ୍ଡ ଘଟିଛି। ଅଭିଯୋଗ ଅନୁଯାୟୀ, ଜଣେ ଓକିଲ ଭଡ଼ାଟିଆ ନିଜ ଘର ମାଲିକାଣୀ ମଞ୍ଜିନ୍ଦର କୌରଙ୍କ ମୁହଁକୁ ଗୁଳି କରିଥିଲେ। ଗୁରୁତର ଆହତ ଅବସ୍ଥାରେ ତାଙ୍କୁ ପୋଷ୍ଟଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ଏଡୁକେସନ୍ ଆଣ୍ଡ ରିସର୍ଚ୍ଚ (PGIMER)ରେ ଭର୍ତ୍ତି କରାଯାଇଛି।
ପୁଲିସ ସୂଚନା ଅନୁଯାୟୀ, କୋର୍ଟଙ୍କ ନିର୍ଦ୍ଦେଶ ଅନୁସାରେ ସମ୍ପତ୍ତିର ଦଖଲ ହସ୍ତାନ୍ତର ପାଇଁ ପୁଲିସ ଏବଂ କୋର୍ଟ କର୍ମଚାରୀ ଘରକୁ ଯାଇଥିଲେ। ସେହି ସମୟରେ ଭଡ଼ାଟିଆ ତଥା ଓକିଲ ଜେପିଏସ୍ ଚଡ୍ଢା ଘରର କବାଟ ନଖୋଲି ନିଜର ଲାଇସେନ୍ସପ୍ରାପ୍ତ ଡବଲ୍ ବ୍ୟାରେଲ୍ ବନ୍ଧୁକରୁ ଗୁଳି ଚଳାଇଥିଲେ। ଗୁଳିଟି ସିଧାସଳଖ ଘର ମାଲିକାଣୀଙ୍କ ମୁହଁରେ ବାଜିଥିଲା।
ଘଟଣା ପରେ ପୁଲିସ ଅଭିଯୁକ୍ତଙ୍କୁ ଘଟଣାସ୍ଥଳରୁ କାବୁ କରି ଗିରଫ କରିଛି। ଫରେନସିକ୍ ଟିମ୍ ଘଟଣାସ୍ଥଳରୁ ପ୍ରମାଣ ସଂଗ୍ରହ କରିଥିବାବେଳେ ପ୍ରତ୍ୟକ୍ଷଦର୍ଶୀଙ୍କ ବୟାନ ରେକର୍ଡ କରାଯାଉଛି। ପୁଲିସ ଲାଇସେନ୍ସପ୍ରାପ୍ତ ଅସ୍ତ୍ରର ବ୍ୟବହାର ସମ୍ପର୍କରେ ମଧ୍ୟ ଯାଞ୍ଚ କରୁଛି। ପୀଡ଼ିତାଙ୍କ ସ୍ୱାସ୍ଥ୍ୟାବସ୍ଥା ଏବଂ ତଦନ୍ତ ରିପୋର୍ଟ ଆଧାରରେ ପରବର୍ତ୍ତୀ ଆଇନଗତ ପଦକ୍ଷେପ ନିଆଯିବ ବୋଲି ପୁଲିସ କହିଛି।
