ବାଙ୍କିପୁର ଉପନିର୍ବାଚନ: ୫ ରାଉଣ୍ଡ ଗଣତି ପରେ ‘ବିଜେପି’ଠାରୁ ୬,୦୧୧ ଭୋଟରେ ଆଗୁଆ ପ୍ରଶାନ୍ତ କିଶୋର
ବିହାର: ବିହାରର ବାଙ୍କିପୁର ବିଧାନସଭା ଉପନିର୍ବାଚନରେ ଭୋଟ ଗଣତି ଜାରି ରହିଛି। ପ୍ରଥମ ୫ ରାଉଣ୍ଡ ଗଣତି ଶେଷ ସୁଦ୍ଧା ଜନ ସୁରାଜ ପାର୍ଟିର ପ୍ରାର୍ଥୀ ପ୍ରଶାନ୍ତ କିଶୋର ବିଜେପି ପ୍ରାର୍ଥୀ ନୀରଜ କୁମାର ସିହ୍ନାଙ୍କଠାରୁ ୬,୦୧୧ ଭୋଟରେ agua ରହିଛନ୍ତି। ପ୍ରଶାନ୍ତ କିଶୋର ୨୦,୦୫୯ ଭୋଟ ପାଇଥିବାବେଳେ ନୀରଜ କୁମାର ସିହ୍ନା ୧୪,୦୪୮ ଭୋଟ ପାଇଛନ୍ତି। ଆରଜେଡି ପ୍ରାର୍ଥୀ ରେଖା କୁମାରୀ ୩,୯୮୩ ଭୋଟ ସହ ତୃତୀୟ ସ୍ଥାନରେ ରହିଛନ୍ତି। ମୋଟ ୩୧ ରାଉଣ୍ଡରେ ଭୋଟ ଗଣତି ଶେଷ ହେବ।
ସୋମବାର ସକାଳ ୮ଟାରୁ ଭୋଟ ଗଣତି ଆରମ୍ଭ ହୋଇଥିବାବେଳେ ପ୍ରଥମ ଥର ନିର୍ବାଚନ ଲଢ଼ୁଥିବା ପ୍ରଶାନ୍ତ କିଶୋର ବିଜେପିର ଏହି ଗଡ଼କୁ ଦଖଲ କରିପାରିବେ କି ନାହିଁ, ତାହା ଉପରେ ସମସ୍ତଙ୍କ ନଜର ରହିଛି। ବିହାର ମନ୍ତ୍ରୀ ଶ୍ରବଣ କୁମାର କହିଛନ୍ତି, ଏଗୁଡ଼ିକ କେବଳ ପ୍ରାରମ୍ଭିକ ଟ୍ରେଣ୍ଡ ଏବଂ ଆଉ କିଛି ରାଉଣ୍ଡ ପରେ ସ୍ଥିତି ସ୍ପଷ୍ଟ ହେବ। ବିକାଶ କାର୍ଯ୍ୟକୁ ଆଧାର କରି NDA ସପକ୍ଷରେ ଜନାଦେଶ ଆସିବ ବୋଲି ସେ ଆଶା ପ୍ରକାଶ କରିଛନ୍ତି।
ବିଜେପିର ଜାତୀୟ ସଭାପତି ନିତିନ ନବୀନ ରାଜ୍ୟସଭାକୁ ନିର୍ବାଚିତ ହେବା ପରେ ବାଙ୍କିପୁର ଆସନ ଖାଲି ପଡ଼ିଥିଲା। ଏହି ଉପନିର୍ବାଚନ ଜୁଲାଇ ୩୦ରେ ଅନୁଷ୍ଠିତ ହୋଇଥିଲା ଏବଂ ଏଥିରେ ୩୪.୩୦ ପ୍ରତିଶତ ଭୋଟ ପଡ଼ିଥିଲା, ଯାହା ପୂର୍ବ ବିଧାନସଭା ନିର୍ବାଚନ ତୁଳନାରେ ୭ ପ୍ରତିଶତରୁ ଅଧିକ କମ୍। ଭୋଟ ଗଣତି ପୂର୍ବରୁ ଆରଜେଡି ନେତା ତେଜସ୍ୱୀ ଯାଦବ ସୋନପୁରସ୍ଥିତ ବାବା ହରିହର ନାଥ ମନ୍ଦିରରେ ପୂଜା କରିଥିବାବେଳେ, ପାଟନାରେ ବିଜେପି କର୍ମୀମାନେ ବିଜୟ ଆଶାରେ ଲଡ଼ୁ ଅର୍ଡର କରୁଥିବା ଦେଖିବାକୁ ମିଳିଥିଲା।
