‘ମୋ ମୃତ୍ୟୁ ପରେ ମୋ ଶବକୁ ସ୍ୱାମୀ ଛୁଇଁବେ ନାହିଁ’; ସୁଇସାଇଡ୍ ନୋଟ୍ରେ ଯନ୍ତ୍ରଣା ବଖାଣି ଜୀବନ ହାରିଲେ ମହିଳା ଡାକ୍ତର
ଗୁଜରାଟ: ଗୁଜରାଟର ସୁରଟରେ ଜଣେ ୨୯ ବର୍ଷୀୟା ମହିଳା ଡାକ୍ତରଙ୍କ ଆତ୍ମହତ୍ୟା ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ମୃତକା ମନାଲୀ ପଟେଲ ନିଜ ଘରେ ଫାଶି ଲଗାଇ ଜୀବନ ହାରିଥିବାବେଳେ ଘଟଣାସ୍ଥଳରୁ ଏକ ସୁଇସାଇଡ୍ ନୋଟ୍ ମିଳିଛି। ସେହି ନୋଟ୍ରେ ସେ ସ୍ୱାମୀ ଓ ଶ୍ୱଶୁରଘର ଲୋକଙ୍କ ବିରୋଧରେ ମାନସିକ ନିର୍ଯାତନାର ଅଭିଯୋଗ କରିବା ସହ ନିଜ ମୃତ୍ୟୁ ପରେ ସ୍ୱାମୀଙ୍କୁ ତାଙ୍କ ଶବକୁ ଛୁଇଁବାକୁ ମଧ୍ୟ ଦିଆଯିବ ନାହିଁ ବୋଲି ଇଚ୍ଛା ପ୍ରକାଶ କରିଥିବା କୁହାଯାଇଛି। ପୁଲିସ ଘଟଣାର ତଦନ୍ତ ଆରମ୍ଭ କରିଛି।
ପୁଲିସ ସୂଚନା ଅନୁସାରେ, ମନାଲୀ ସନ୍ଧ୍ୟା ପ୍ରାୟ ୫ଟା ସମୟରେ ଫାଶି ଲଗାଇଥିଲେ। ଆତ୍ମହତ୍ୟା ପୂର୍ବରୁ ସେ ଲେଖିଥିବା ସୁଇସାଇଡ୍ ନୋଟ୍କୁ ମୋବାଇଲ୍ ମାଧ୍ୟମରେ ନିଜ ଭାଇଙ୍କୁ ମଧ୍ୟ ପଠାଇଥିଲେ। ନୋଟ୍ରେ ସେ ଲେଖିଥିଲେ ଯେ, ସ୍ୱାମୀ ଓ ଶ୍ୱଶୁରଘର ପକ୍ଷରୁ ଦୀର୍ଘଦିନ ଧରି ମାନସିକ ଭାବେ ତାଙ୍କୁ ନିର୍ଯାତନା ଦିଆଯାଉଥିଲା । ମନାଲୀ କେପି ସଂଘଭୀ ହସ୍ପିଟାଲରେ କାର୍ଯ୍ୟରତ ଥିଲେ ଏବଂ ୨୦୧୩ ମସିହାରେ ଡା. ଚିନ୍ତନ ପଟେଲଙ୍କୁ ବିବାହ କରିଥିଲେ। ବିବାହ ପରେ ପାରିବାରିକ ବିବାଦ ବଢ଼ିଥିବା ଅଭିଯୋଗ ହୋଇଛି।
ମୃତକାଙ୍କ ପରିବାର ଅଭିଯୋଗ କରିଛନ୍ତି ଯେ, ମନାଲୀଙ୍କୁ ସ୍ୱାମୀଙ୍କ ସହ ଶ୍ୱଶୁର, ଶାଶୁ, ନଣନ୍ଦ ଓ ପରିବାରର ଅନ୍ୟ ସଦସ୍ୟମାନେ ମଧ୍ୟ ମାନସିକ ଭାବେ ପ୍ରତାଡ଼ିତ କରୁଥିଲେ। ସେମାନଙ୍କ ଦାବି ଅନୁସାରେ, ସ୍ୱାମୀ ଦୀର୍ଘଦିନ ଧରି ଛାଡପତ୍ର ପାଇଁ ଚାପ ପକାଉଥିଲେ। ଘଟଣା ପରେ ପୁଲିସ ମାମଲା ରୁଜୁ କରି ମୃତକାଙ୍କ ମୋବାଇଲ୍ ଜବତ କରିଛି ଏବଂ ସୁଇସାଇଡ୍ ନୋଟ୍ ସହ ଅନ୍ୟାନ୍ୟ ପ୍ରମାଣର ଆଧାରରେ ତଦନ୍ତ ଜାରି ରଖିଛି। ତଦନ୍ତ ଶେଷ ହେବା ପର୍ଯ୍ୟନ୍ତ ଅଭିଯୋଗଗୁଡ଼ିକର ସତ୍ୟତା ସମ୍ପର୍କରେ ଚୂଡ଼ାନ୍ତ ନିଷ୍କର୍ଷ ଆସିନାହିଁ।
