ଛାଡ଼ପତ୍ର ଆବେଦନ ପ୍ରତ୍ୟାହାର କଲେ ତାମିଲନାଡୁ ମୁଖ୍ୟମନ୍ତ୍ରୀ ବିଜୟଙ୍କ ପତ୍ନୀ ସଙ୍ଗୀତା! ବଢ଼ିଲା ଚର୍ଚ୍ଚା
ଚେନ୍ନାଇ: ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟଙ୍କ ପତ୍ନୀ ସଙ୍ଗୀତା ଶୁକ୍ରବାର ତାଙ୍କ ଛାଡ଼ପତ୍ର ଆବେଦନ ପ୍ରତ୍ୟାହାର କରିଛନ୍ତି। ଚେଙ୍ଗଲପଟ୍ଟୁ ପରିବାର ଅଦାଲତରେ ଚାଲିଥିବା ଏହି ମାମଲାରେ ସଙ୍ଗୀତା ଭିଡିଓ କନଫରେନ୍ସିଂ ଜରିଆରେ ହାଜର ହୋଇ କହିଥିଲେ ଯେ, ସେ ଆଉ ଏହି ଛାଡ଼ପତ୍ର ମାମଲାକୁ ଆଗକୁ ବଢ଼ାଇବାକୁ ଚାହୁଁନାହାନ୍ତି। ଏହା ପରେ ଅଦାଲତ ତାଙ୍କ ଆବେଦନକୁ ମଞ୍ଜୁର କରି ମାମଲାକୁ ପ୍ରତ୍ୟାହୃତ ଭାବେ ଖାରଜ କରିଦେଇଛନ୍ତି।
ଅଦାଲତଙ୍କ ଆଦେଶ ଅନୁସାରେ, ସଙ୍ଗୀତା ପ୍ରଥମେ ଛାଡ଼ପତ୍ର ମାମଲା ପ୍ରତ୍ୟାହାର ପାଇଁ ଆବେଦନ ଦାଖଲ କରିଥିଲେ। ଭିଡିଓ କନଫରେନ୍ସିଂ ମାଧ୍ୟମରେ ସେ ନିଜ ବୟାନରେ ମାମଲା ଆଗକୁ ନେବାକୁ ଇଚ୍ଛା ନଥିବା ସ୍ପଷ୍ଟ କରିଥିଲେ। ପ୍ରତିପକ୍ଷଙ୍କ ଓକିଲଙ୍କ ପକ୍ଷରୁ ମଧ୍ୟ ଏହି ପ୍ରତ୍ୟାହାର ଉପରେ କୌଣସି ଆପତ୍ତି କରାଯାଇନଥିଲା। ଅଦାଲତ ସଙ୍ଗୀତାଙ୍କୁ ଭବିଷ୍ୟତରେ ଆବଶ୍ୟକ ପଡ଼ିଲେ ପୁଣିଥରେ ନୂଆ ଆବେଦନ ଦାଖଲ କରିବାର ସ୍ୱାଧୀନତା ମଧ୍ୟ ପ୍ରଦାନ କରିଛନ୍ତି।
ସଙ୍ଗୀତା ଚଳିତ ବର୍ଷ ଫେବୃଆରୀରେ ଛାଡ଼ପତ୍ର ଆବେଦନ ଦାଖଲ କରି ବିଜୟଙ୍କ ବିରୋଧରେ ପରକୀୟା ସମ୍ପର୍କର ଅଭିଯୋଗ ଆଣିଥିଲେ। ୨୦୨୧ରେ ଏହି ସମ୍ପର୍କ ବିଷୟରେ ଜାଣିଥିବା ଏବଂ ସେଥିରୁ ଦୂରେଇବେ ବୋଲି ବିଜୟ ପ୍ରତିଶ୍ରୁତି ଦେଇଥିଲେ ମଧ୍ୟ ତାହା ପାଳନ କରିନଥିବା ସେ ଦାବି କରିଥିଲେ। ଆବେଦନରେ ସେ ଆହୁରି ଅଭିଯୋଗ କରିଥିଲେ ଯେ, ବିଜୟ ତାଙ୍କୁ ସାମାଜିକ ଓ ବୃତ୍ତିଗତ ଜୀବନରୁ ଦୂରେଇ ଦେଇଥିଲେ, ଯାହାଫଳରେ ସେ ଓ ତାଙ୍କ ଦୁଇ ସନ୍ତାନ ମାନସିକ ଭାବେ ଗଭୀର ଆଘାତ ପାଇଥିଲେ। ତେବେ ବର୍ତ୍ତମାନ ସଙ୍ଗୀତା ଛାଡ଼ପତ୍ର ଆବେଦନ ପ୍ରତ୍ୟାହାର କରିବା ସହ ଏହି ମାମଲାକୁ ନେଇ ଏକ ନୂଆ ଚର୍ଚ୍ଚା ଆରମ୍ଭ ହୋଇଛି |
