ପ୍ରବଳ ବର୍ଷାରେ ଦିଲ୍ଲୀର ସ୍ଥିତି ବେହାଲ; ୮୧ଟି ସ୍ଥାନରେ ଜଳବନ୍ଦୀ ଅଭିଯୋଗ, ୩୨ଟି ସ୍ଥାନରେ ଉପୁଡ଼ିଲା ଗଛ
ନୂଆଦିଲ୍ଲୀ: ଦିଲ୍ଲୀରେ ପ୍ରବଳ ବର୍ଷା ହେବାରୁ ରାଜଧାନୀର ଅନେକ ରାସ୍ତାରେ ଜଳବନ୍ଦୀ ସମସ୍ୟା ଦେଖାଦେଇଥିଲା। ମହିପାଲପୁର, ଧୌଲା କୁଆଁ, ଏମ୍ବି ରୋଡ୍, ରିଙ୍ଗ୍ ରୋଡ୍, ଆଇଟିଓ ସମେତ ଅନେକ ଅଞ୍ଚଳରେ ଯାତାୟାତ ବାଧାପ୍ରାପ୍ତ ହୋଇଥିଲା । ବର୍ଷା ଯୋଗୁଁ ଦିଲ୍ଲୀ ପିଡବ୍ଲ୍ୟୁଡିକୁ ଜଳବନ୍ଦୀ ନେଇ ୬୬ଟି ଏବଂ ଗଛ ପଡ଼ିବା ନେଇ ୧୭ଟି ଅଭିଯୋଗ ମିଳିଥିଲା। ସେହିପରି ଏନ୍ଡିଏମ୍ସିକୁ ଜଳବନ୍ଦୀ ନେଇ ୧୫ଟି ଏବଂ ଗଛ ପଡ଼ିବା ନେଇ ୧୫ଟି ଅଭିଯୋଗ ମିଳିଥିଲା। ଅର୍ଥାତ୍ ଦୁଇଟି ସଂସ୍ଥା ନିକଟରେ ମୋଟ ୮୧ଟି ଜଳବନ୍ଦୀ ଓ ୩୨ଟି ଗଛ ପଡ଼ିବା ଅଭିଯୋଗ ରୁଜୁ ହୋଇଥିଲା।
ଦକ୍ଷିଣ ଓ ଦକ୍ଷିଣ-ପୂର୍ବ ଦିଲ୍ଲୀରେ ବର୍ଷାର ପ୍ରଭାବ ଅଧିକ ଦେଖିବାକୁ ମିଳିଥିଲା। ମହିପାଲପୁର, ଛତରପୁର, ଓଖଲା, ସଙ୍ଗମ ବିହାର, ସୈନିକ ଫାର୍ମସ୍, ବସନ୍ତ କୁଞ୍ଜ, ବସନ୍ତ ବିହାର, ମାଲବୀୟ ନଗର ଓ ଗ୍ରେଟର କୈଳାଶ-୨ରେ ରାସ୍ତାରେ ପାଣି ଜମିଥିଲା। ମେହରୌଲି-ବଦରପୁର ରୋଡ୍, ଏନ୍ଏଚ୍-୪୮, ମଥୁରା ରୋଡ୍ ଓ ରିଙ୍ଗ୍ ରୋଡ୍ରେ ମଧ୍ୟ ଯାତାୟାତ ପ୍ରଭାବିତ ହୋଇଥିଲା। ଶକରପୁର, ମଣ୍ଡାୱଲି, ମୟୂର ବିହାର, ଗାନ୍ଧୀ ନଗର ଓ କୃଷ୍ଣା ନଗର ଭଳି ପୂର୍ବ ଦିଲ୍ଲୀର ଅଞ୍ଚଳରେ ମଧ୍ୟ ଜଳବନ୍ଦୀ ଓ ଟ୍ରାଫିକ୍ ଜାମ୍ ଦେଖାଦେଇଥିଲା। ମହିପାଲପୁରରୁ ଧୌଲା କୁଆଁ ଯାଉଥିବା ରାସ୍ତାରେ ଲମ୍ବା ଗାଡ଼ି ଧାଡ଼ି ଲାଗିଥିଲା। ଫଳରେ ଗୋଟିଏ ରାସ୍ତାର ଜାମ୍ ଏଡ଼ାଇବାକୁ ଯାଇ ଅନ୍ୟ ରାସ୍ତାରେ ମଧ୍ୟ ଲୋକେ ଟ୍ରାଫିକ୍ରେ ଫସିଥିଲେ।
ଭାରି ବର୍ଷା ଯୋଗୁଁ କିଛି ଅଞ୍ଚଳରେ ୧୦୦ ମିଲିମିଟରରୁ ଅଧିକ ବର୍ଷା ରେକର୍ଡ ହୋଇଥିଲା। ଦିଲ୍ଲୀ ପିଡବ୍ଲ୍ୟୁଡି ମନ୍ତ୍ରୀ ପରଭେଶ ବର୍ମା କହିଛନ୍ତି ଯେ, ଅନେକ ସ୍ଥାନରେ ଡ୍ରେନ୍ ଓ ଅନ୍ୟାନ୍ୟ ଭିତ୍ତିଭୂମି କାମ ଚାଲିଥିବାରୁ ସେଠାରେ ସମସ୍ୟା ଦେଖାଦେଇଛି। ସରକାର ପାରମ୍ପରିକ ଜଳବନ୍ଦୀ ସ୍ଥାନଗୁଡ଼ିକରେ ଡ୍ରେନେଜ୍ ଓ ଡିସିଲ୍ଟିଂ କାମ କରିଥିବା ଦାବି କରିଛି। ତେବେ ଗତକାଲି ଭାରି ବର୍ଷା କାରଣରୁ ଏକାଧିକ ରାସ୍ତା ଏକାସାଙ୍ଗରେ ପ୍ରଭାବିତ ହେବାରୁ ରାଜଧାନୀର ଯାତାୟାତ ବ୍ୟବସ୍ଥା ଗୁରୁତର ଭାବେ ପ୍ରଭାବିତ ହୋଇଥିଲା।
