ଲାହୋରରେ ଭାରତୀୟ ଭ୍ଲଗରଙ୍କୁ ପାକିସ୍ତାନୀ ମହିଳାଙ୍କ ପ୍ରଶ୍ନ- ‘ତୁମ ଧର୍ମ କ’ଣ?’; ରମେଶଙ୍କ ଉତ୍ତର ହେଲା ଚର୍ଚ୍ଚାର ବିଷୟ
ନୂଆଦିଲ୍ଲୀ:ପାକିସ୍ତାନ ଗସ୍ତ ସମୟରେ ଭାରତୀୟ ଭ୍ଲଗର ରମେଶ ମାଲହୋତ୍ରାଙ୍କ ସହ ଘଟିଥିବା ଏକ କଥୋପକଥନ ଏବେ ସୋସିଆଲ ମିଡିଆରେ ଚର୍ଚ୍ଚାର କେନ୍ଦ୍ର ପାଲଟିଛି। ଲାହୋରରେ ଘୁରୁଥିବା ସମୟରେ ଜଣେ ପାକିସ୍ତାନୀ ମହିଳା ତାଙ୍କୁ ଦିଲ୍ଲୀରୁ ଆସିଛନ୍ତି କି ଏବଂ ସେ ଶିଖ ନା ହିନ୍ଦୁ ବୋଲି ପଚାରିଥିଲେ। ଏହାର ଉତ୍ତରରେ ରମେଶ ପ୍ରଥମେ ନିଜକୁ ଭାରତୀୟ ବୋଲି ପରିଚୟ ଦେଇଥିଲେ। ପରେ ନିଜ ଧର୍ମ ବିଷୟରେ ପଚରାଯିବାରୁ ସେ ‘ସନାତନ’ ବୋଲି କହିଥିଲେ। ଏହି ସମ୍ପୂର୍ଣ୍ଣ କଥୋପକଥନର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି।
ମହିଳା ଜଣକ ‘ସନାତନ’ର ଅର୍ଥ କ’ଣ ବୋଲି ପଚାରିବା ପରେ ରମେଶ ତାଙ୍କ ନିଜସ୍ୱ ବ୍ୟାଖ୍ୟା ଦେଇଥିଲେ। ସେ କହିଥିଲେ ଯେ ତାଙ୍କ ଧର୍ମ ସନାତନ ଏବଂ ସିନ୍ଧୁ ନଦୀ ସହ ଜଡ଼ିତ ଐତିହାସିକ ପରିଚୟ ବିଷୟରେ ମଧ୍ୟ ମହିଳାଙ୍କୁ ବୁଝାଇଥିଲେ। ଏହି ଆଲୋଚନା ସମୟରେ ମହିଳା ଜଣକ ତାଙ୍କୁ ପାକିସ୍ତାନକୁ ସ୍ୱାଗତ କରିଥିଲେ। ରମେଶଙ୍କ ଅନୁସାରେ, ମହିଳାଙ୍କ ପ୍ରଶ୍ନ ପଛରେ କୌଣସି ଖରାପ ଉଦ୍ଦେଶ୍ୟ ନଥିଲା; ବରଂ ଯାତ୍ରା ସମୟରେ ପରସ୍ପରର ପରିଚୟ, ସଂସ୍କୃତି ଓ ଜୀବନଶୈଳୀ ବିଷୟରେ ଜାଣିବା ପାଇଁ ଏଭଳି ପ୍ରଶ୍ନ ହୋଇଥିଲା।
ନିଜ ଇନଷ୍ଟାଗ୍ରାମ ପୋଷ୍ଟରେ ରମେଶ କହିଛନ୍ତି ଯେ, ସେ ପ୍ରଥମେ ନିଜକୁ ‘ହିନ୍ଦୁସ୍ତାନୀ’ ବୋଲି ପରିଚୟ ଦେଇଥିଲେ ଏବଂ ପରେ ଗର୍ବର ସହ ନିଜ ଧର୍ମ ‘ସନାତନ’ ବୋଲି କହିଥିଲେ। ସମ୍ମାନର ସହ କଥାବାର୍ତ୍ତା କଲେ ଭିନ୍ନ ଦେଶ ଓ ସଂସ୍କୃତିର ଲୋକଙ୍କ ମଧ୍ୟରେ ଭଲ ବୁଝାମଣା ସୃଷ୍ଟି ହୋଇପାରେ ବୋଲି ସେ ମତ ଦେଇଛନ୍ତି। ଭିଡିଓଟିକୁ ନେଇ ସୋସିଆଲ ମିଡିଆରେ ମଧ୍ୟ ବିଭିନ୍ନ ପ୍ରତିକ୍ରିୟା ଆସିଛି। କିଛି ୟୁଜର ରମେଶଙ୍କ ଆଚରଣ ଓ କଥାବାର୍ତ୍ତାର ପ୍ରଶଂସା କରିଥିବାବେଳେ, ଅନ୍ୟମାନେ ଏହି ଘଟଣାକୁ ଭାରତ-ପାକିସ୍ତାନ ମଧ୍ୟରେ ସାଧାରଣ ଲୋକଙ୍କ ସାଂସ୍କୃତିକ ଆଲୋଚନାର ଏକ ଉଦାହରଣ ଭାବେ ଦେଖିଛନ୍ତି।
